Kela vajodittempalvâlus, mii váldá vuotân sämikielâ já -kulttuur, olášuttemäigi juátkoo

Kela cuáŋuimáánust 2026 algâttem vajodittempalvâlus, mii váldá vuotân sämikielâ já -kulttuur, olášuttem juátkoo 31.1.2028 räi.

Kela algâttij cuáŋuimáánust 2026 uđđâ maaŋgâáámmátlii vajodittempalvâlus keččâlem, Viälmá – sämikielâlii mielâtiervâsvuođâvajodittem. Palvâlus lii uáivildum 18–67-ihásáid sämikielâláid tâi sämikulttuur miäldásii vajodittem tarbâšeijee äššigâssáid, kiäin láá mielâtiervâsvuođâ hástuseh.

Ulmen lii toimâmnavcâlâš argâeellim

Vajodittem ulmen lii trauma- já mielâtiervâsvuođâsymptomijn šaddee hástusij iberdem sehe vaijeem, toimâmnaavcâ já aargâhaldâšemtááiđui nanodem.

Palvâlus puáhtá olášuttiđ persovnlávt já njyebžilávt aargâ pirrâsijn, palvâluspyevtitteijee toimâsaajeest tâi káidusohtâvuođáin kovesuáittun. Vajodittem ana sistees sehe persovnlijd já juávkkuteivâdmjid, já tast váldojeh huámmášumán meid aldaulmuuh já eres aldapiirâs. Táárbu mield juávkkuteivâdmijd puáhtá mutteđ persovnlâžžân teivâdmin.

– Vajodittempalvâlusân puáhtá uuccâđ pirrâ Suomâ, ko vajodittem lii máhđulâš olášuttiđ meid ollásávt káidusin, proojeekthovdâ Laura Jokiranta muštâl.

Oovtâstpargoost ovdedum palvâlus

Kela lii vuávám vajodittem siskáldâs oovtâstpargoost sämitiggijn já Laapi pyereestvaijeemkuávloin sehe eres čonâsjuávhuiguin.

Vajodittempalvâlus olášuttee maaŋgâáámmátlii tiimist lii ucemustáá ohtâ sämikielâ mättee áámmátolmooš. Kela uárnee sämikielâ sárnoo äššigâsân tulkkum suu jieijâs kielân, jis vajodittempalvâlusâst kiävttoo suomâkielâ tâi eres ko äššigâs sárnum sämikielâ. 

Vajodittempalvâlusâst lii máhđulâš kevttiđ meid suomâkielâ tâi suomâ- já sämikielâ paldluvâi. Kela ij vaađâ vajodittempalvâlus äššigâsâst sämikielâ mättim, peic äššigâs puáhtá ucâluđ palvâlusân meid vâi finnee vajodittem, mii váldá huámmášumán sämikulttuur sierânâsjiešvuovijd.

Vajodittempalvâlus olášut Coronaria Kuntoutuspalvelut Oy Oulu. Vajodittemolesvuođâi olášuttemäigi juátkoo 31.1.2028 räi.

– Taat uáivild tom, ete äššigâsah pyehtih uuccâđ sämikielâlii mielâtiervâsvuođâvajoditmân 30.4.2027 räi, proojeekthovdâ Laura Jokiranta iätá. Mij tuáivup, ete ain eenâb äššigâsah já sii vajoditmân stivrejeijee peleh kavnâččii taam nuuvtá palvâlus. Keččâlem pyevtit Kelan mávsulii tiäđu äššigâsâi táárbui vuotânväldimist já vuáttámušâid sämikielâ já -kulttuur vuotân väldee palvâlus olášutmist, Jokiranta lasseet.

Kela oovded palvâlus oovtâst vajodittempalvâlus pyevtitteijein já koordinist olesvuođâ uássin Vajodittem sämikielâláid -projektist. Vajoditmist tahhoo meid árvuštâllâmtutkâmuš.

Návt vajoditmân puáhtá uuccâđ

Valjii uuccâmluámáttuvâst Kuorâttâllâmmiäldásâš vajodittem (KU 132smn, pdf) vajodittemkurssâ-muulsâiävtu já teevdi ucâmušâst occee tiäđui lasseen soojijd 2–8. Palvâlusân ij kulluu ijâstâllâmsaje.

• Ucâmuš lahtosin tun tarbâšah almos tiervâsvuođâhuolâttâsâst tohhum B-ciälkkámuš tâi eres talhâstieđâlii čielgiittâs, mast láá västideijee tiäđuh.  Vajodittem lii vuávájum äššigâssáid, kiäin lii kavnâttum läivis tâi koskâvädis šlundevuotâ, atâštâshemâdâs, kyevtsundásâš mielâtilehemâdâs, trauma tovâttem stressihemâdâs tâi mohnii iärásijd trauman lohtâseijee kuhesáigásijd symptomijd.
• Tun puávtáh vuolgâttiđ ucâmuš Kelan šleđgâlávt MuuKelast.
• Ucâmuš puáhtá vuolgâttiđ Kelan meid poostâ peht čujottâsân Kela, PL 10, 00056 KELA.
• Jis tun tarbâšah iše ucâmuš tevdimist tâi tust láá eres koččâmušah, te vuolgât ohtâvuotâväldimtáttum čujottâsân saame@kela.fi.

Viälmá – sämikielâlâš mielâtiervâsvuođâvajodittem

Tieđettemčáálus: Viälmá – sämikielâlâš mielâtiervâsvuotâvajodittem (pdf)