Báberpoasta rievdá eret geavahusas – Kela reivvet bohtet boahttevuođas dušše MuKelai
Kela doaimmaha mearrádusaid ja reivviid dušše MuKelai 15.1.2026 rájes. Báberpoastta ožžot boahttevuođas áššehasat, guđet eai geavat MuKela. Sámegielagat ožžot mearrádusjorgalusaid ain báberpoastan.
Kela mearrádusaid ja reivviid doaimmahanvuohki rievdá 15.1.2026. Áššehasat, guđet geavahit MuKela ja leat almmuhan iežaset e-poastačujuhusa dahje telefonnummira, ožžot mearrádusaid ja reivviid boahttevuođas dušše elektrovnnalaččat MuKelai. Seamma reive ii šat sáddejuvvo poastta mielde. Go ođđa mearrádusa dahje reivve sáhttá lohkat MuKelas, áššehas oažžu almmuhusa Suomi.fi-dieđu bokte, elektrovnnalaččat dahje teakstadieđuin.
Nuppástus vuođđuduvvá skábmamánus 2025 dohkkehuvvon Kela-lága ođastussii ja doarju elektrovnnalaš áššiiddikšuma viiddideami. Jagi 2025 Kela sáddii sullii 6 miljovnna reivve báberpoastan ja sullii 9 miljovnna báberhaga. Seastimat prenten- ja postengoluin čoggojedje sullii 6 miljovnna euro diibmá.
– Mearrádusat ja reivvet leat leamaš oažžun láhkai MuKelas juo guhká, ja min badjel 1,5 miljovnna áššehasa leat luohpan báberpoasttas. Elektrovnnalaš áššiiddikšun lea máŋgasii johtilamos ja álkimus vuohki oažžut dieđu mearrádusas. Nuppástus geahpeda dušši postema ja jođálmahttá diehtojohtima, dadjá joavkohoavda Anu Lantonen Kela ovdoáššegirjebuvttadeamis.
Almmuhus mearrádusain ja reivviin, mat leat MuKelas, boahtá Suomi.fi-dieđuide
Almmuhusat sihkkarastet, ahte áššehas oažžu dieđu mearrádusas dahje reivves dalán, go dan sáhttá lohkat MuKelas. Almmuhus ođđa mearrádusas dahje reivves MuKelas sáddejuvvo e-poastačujuhussii, mii lea vurkejuvvon Suomi.fi-bálvalussii. Suomi.fi-heivehusa geavaheaddjiide almmuhus boahtá maiddái heivehusa bokte. Áššehasaide, guđet geavahit Suomi.fi-dieđuid, Kela sádde almmuhusa e-poasttain dahje teakstadieđuin.
Báberpoasta seailu dihto diliin
Áššehasat, guđet eai geavat MuKela, ožžot ain mearrádusaid ja reivviid báberpoastan. Maiddái MuKela geavaheaddji áššehas sáhttá, jos háliida, válljet báberpoastta. Válljejupmi dahkkojuvvo MuKelas dahje Kela áššehasbálvalusas.
Nuppástus ii guoskka olbmuid, geat eai ieža čálit sisa MuKelai, muhto leat fápmudan nuppi olbmo dikšut áššiid iežaset beales. Fápmuduvvon olmmoš sáhttá goittotge luohpat báberpoasttas fápmudahtton olbmo beales MuKelas.
Oassi reivviin doaimmahuvvojit boahttevuođasge sihke MuKelai ja poastta mielde. Dát leat earret eará reivvet, mat laktásit bearašealáhagaide, ealáhaga mánnábajádussii, ealáhatdoarjagii ja doaibmaváttogiiddoarjagiidda. Áigáiboahtindoarjaga máksočatnasumit ja árbebesiid reivvet sáddejuvvojit ain dušše báberpoastan.
Sámegielat mearrádusjorgalusat ja eará sámegielat reivvet Kelas sáddejuvvojit áššehassii ain poastta mielde. Sámegielat oažžu Kelas mearrádusa vuos juogo suomagillii dahje ruoŧagillii álbmotregisterdieđuide merkejuvvon áššiiddikšungiela mielde juogo MuKelai dahje reiven iežas válljejumi mielde. Dan maŋŋá Kela jorgalahttá mearrádusa sámegillii, jos áššehas lea ohcan ovddu sámegillii dahje muđui ovdanbuktán iežas sávaldaga dikšut áššiid sámegillii.
Jagi 2026 maiddái eará virgeoapmahaččat doaimmahišgohtet reivviid ovdasajis elektrovnnalaččat, go elektrovnnalaš áššiiddikšuma ovdasaji guoski láhka boahtá fápmui. Áigeplána dárkkálmuvvá go riikkabeaigieđahallan ovdána.
Lassedieđut
Kela mearrádusaid ja reivviid doaimmahanvuohki rievdá (suomagillii)
Virgeoapmahašpoasta boahtá jagi 2026 álggu rájes ovdasajis elektrovnnalaččat (dvv.fi, suomagillii)