Kela álggaha ođđasit davvisámegielat telefon- ja gáiddusbálvalusa
Kela álggaha 13.2. ođđasit davvisámegielat telefon- ja gáiddusbálvalusa. Bálvaleapmi lea dás duohko rabas juohke árgabeaivve iđitbeivviid. Bálvaleapmái sáhttá maiddái guođđit oktavuođaváldinbivdaga.
Kela davvisámegielat telefon- ja gáiddusbálvalus rahpasa ođđasit measta jagi bottu maŋŋá mánnodaga 13.2.2023. Bálvaleapmi lea rabas árggaid dmu 9-11. Davvisámegielat telefonbálvalusa nummir lea 020 634 2894.
Davvisámegielat gáiddusbálvalusa oktavuođaváldinliŋka gávdno sámegielat kela.fi-siidduin. Gáiddusbálvalusas áššehas fidne gáiddusoktavuođa Kela áššehasbálvaleaddjái jogo dihtora dahje mobiilarusttega bokte dorvvolaččat ja álkit ruovttus orodettiin. Gáiddusbálvalanoktavuođa oažžu álkit maiddái Lappi Virtu-čuoggáin.
Kela lea fállan davvisámegielat telefon- ja gáiddusbálvalusa maiddái ovdal. Bálvaleapmi heaittihuvvui gaskaboddosaččat njukčamánus 2022, daningo Kelas ii dalle lean oktage davvisámegielat bálvalanáššedovdi. Dán vuoro Kelas leat guokte davvisámegielat bálvalanáššedovdi.
Nuortalašgielat bálvaleapmi joatkašuvvá nugo ovdalge
Kela fállá telefon- ja gáiddusbálvalusa maiddái nuortalašgillii. Maiddái nuortalašgielat bálvaleapmi lea rabas juohke árgabeaivve dmu 9-11. Nuortalašgielat telefonbálvalusa nummir lea 020 634 4795. Nuortalašgielat gáiddusbálvalusa njuolggo liŋka gávdno sámegielat kela.fi-siidduin.
Kela álggahii nuortalašgielat bálvaleami jahki dassái. Kelas lea dán háve okta nuortalašgielat bálvalanáššedovdi.
Sámegielat bálvaleapmái sáhttá guođđit oktavuođaváldinbivdaga
Áššehas sáhttá maiddái guođđit sámegielat bálvaleapmái oktavuođaváldinbivdaga, goas Kela sámegielat bálvalanáššedovdi lea oktavuođas áššehassii. Oktavuođaváldinbivdaga sáhttá sáddet suomagillii dahje sámegillii šleađgapoastačujuhussii saame@kela.fi. Muital šleađgapoasttas iežat nama ja telefonnummira ja maiddái dan, maid ášši guoská ja mainna gielain dárbbašat bálvaleami.
Anárašgielat bálvaleami oažžu dárbbu mielde tulkoma bokte. Jos dárbbašat bálvaleami anárašgillii, váldde oktavuođa Kelai. Tulka, gean Kela lea ordnen, lea dutnje oktavuođas soahpan dihte áššiiddikšuma áiggi birra.
Kela sámegielat bálvalusat bálvalit du riikkaviidosaččat ledjet dal gos beare. Kela sámegielat neahttasiidduin muitaluvvo dárkilabbot Kela fállan sámegielat bálvalusain ja Kela ovdduin iešguđetlágan eallindiliin.
Sápmelaš áššehasas lea sámi giellalága vuođul vuoigatvuohta dikšut Kela-ášši iežas gillii.