Liâdggtuärjjõõzz ooccmõš älgg ođđeeʹjjmannust
Eeʹttiǩ-kåʹdd lij priimmâm lääʹjj kõskkpoddsaž liâdggtuärjjõõzzâst. Liâdggtuärjjõõzzin lij mieʹrr tuärjjeed uʹccpuåđlaž dommtäälaid vueʹjjest, koʹst liâdǥ hââʹdd äʹppkalšmõõvvmõš šõddad vaiggâdvuõđid jõnn liâdgglaaski mähssmõõžžâst.
Lääʹǩǩ kõskkpoddsaž liâdggtuärjjõõzzâst puätt viõʹǩǩe 1.1.2023. Liâdggtuärjjõs lij jurddum dommtäälaid, ǩeäk jiâ vueiʹt uuʹcces eeʹǩǩpuåttji diõtt äuʹǩǩeed tiuddmeärrsânji ođđ liâdggǩieʹppummuž piiđtummšest. Liâdggǩieʹppummuš lij âʹte vuõss-sâjjsaž kuånstt vuäǯǯad vieʹǩǩ liâdggkoolaid. Dommtääll ij vueiʹt vuäǯǯad veʹt liâdggǩieʹppummuž di liâdggtuärjjõõzz. Še uʹcc mieʹrr liâdggtuärjjõõzz jaukkad obbnes vuõiggâdvuõđ liâdggǩieʹppummša.
Liâdggǩieʹppummuž leʹbe liâdggtuärjjõõzz vuäitt vuäǯǯad liâdggenergiakoolaid leʹbe liâdggenergia, ärvvlââʹsspiiđ da vueiʹtlvaž vuâđđmääus koolaid. Liâdggseerd koolain da vueiʹtlvaž äjjnem-määusain ij vueiʹt vuäǯǯad liâdggǩieʹppummuž, jiâ-ǥa tõin määus liâdggtuärjjõõzz.
Liâdggtuärjjõõzz ij vueiʹt vuäǯǯad, jõs liâdggkool liâ vuâlla 400 e/mp
Ooccmõšlomaakk õlmstââʹttet 7.1.2023. OmaKelast ooccmõõžž vuäitt tooiʹmted 12.1.2023 ääʹljeeʹl.
Ooccmõõžž meâlddõssân taarbšet liâdgglaask. Liâdggtuärjjõs lij jurddum liâdggenergiakoolaid, kook liâ šõddâm ääiʹjest 1.1– 30.4.2023.
Tuärjjõõzz vuäitt vuäǯǯad tåʹlǩ õõut põõššinalla âânnmõõžžâst åårrai aazzâlm liâdggkoolaid. Aazzâlm âlgg leeʹd Lääʹddjânnmest.
Liâdggtuärjjõõzzâst lij jiijjâsvasttõs 400/mp. Tuärjjõõzz mieʹrr lij 60 % tõin liâdggkoolain, kook pââʹjte jiijjâsvasttõõzz. Jäänmõsân liâdggtuärjjõõzz vuäitt vuäǯǯad 660 e/mp. Jäänmõsmeäʹr liâdggtuärjjõõzz vuäǯǯ âʹte tâʹl, jõs liâdggkool liâ 1 500 e/mp leʹbe jäänab. Uuʹccmõsmieʹrren Kela mäʹhssemnalla puätt 5 eeuʹr liâdggtuärjjõõzz.
Liâdggtuärjjõs lij piiđteʹmes ouddõs, ij-ka tõt vaaikât Kela äʹššneeʹǩǩ jeeʹres ouddõõzzid. Jõs äʹššneǩ lij kuuitâǥ vuäǯǯam liâdgglaask diõtt piʹrǧǧeemtuärjjõõzz, son ij vueiʹt takainalla vuäǯǯad seämma laask vuâđald liâdggtuärjjõõzz.
Vueiʹtlvažvuõtt liâdggǩieʹppummša âlgg seʹlvvted vuõššân
Liâdggtuärjjõõzz vuäitt âʹte ooccâd tâʹl, jõs liâdggǩieʹppummuž ij vueiʹt äuʹǩǩeed tiuddmeärrsânji.
Liâdggǩieʹppummuž vuäitt vuäǯǯad, jõs liâdggenergiakool liâ pâʹjjel 2000 euʹrred ääiʹjest 1.1.–30.4.2023. Ǩieʹppummuž mieʹrr lij 60 % tõin liâdggenergiakoolain, kook liâ pâʹjjel 2 000 euʹrred. Jäänmõsân liâdggǩieʹppummuž vuäitt vuäǯǯad 2 400 euʹrred eeʹjjest.
Ouddmiârkkân jõs liâdggenergiakool liâ õhttsiʹžže 4 000 euʹrred ođđeeʹjj-njuhččmannu poodd, suummâst vuäitt ǩieʹppeed piiđtummšest 60 % 2 000 eeuʹr pâiʹlmõõnni vueʹzzest leʹbe 1 200 euʹrred. Jõs dommtallu nårrje eeʹjjest 2023 puåđpiiđ 1 200 euʹrred ij-ǥa tiuddmeärrsaž ǩieʹppummuž vueiʹt tõn diõtt tuejjeed, dommtääll lij vuõiggõttum liâdggtuärjjõʹsse.
Jiijjâs piiđi meäʹr vuäitt ärvvtõõllâd Piiđvaaldâšm piiđproseʹnttlasǩǩeem-mašinain.
Obb eeʹjj 2023 puåđpiiđi da ođđeeʹjj-njuhččmannu liâdggkoolai meäʹr ärvvtõõllmõš ooudbeäʹlnn vuäitt leeʹd vaiggâd. Liâdggtuärjjõõzz vuäitt kuuitâǥ ooccâd eeʹjj 2023 loopp räjja. Ođđeeʹjj-njuhččmannu liâdgglaask kaʹnnte seeilted mähssmõõžž mâŋŋa, ǥu laask taarbšet liâdggtuärjjõõzz ooccmõõžž meâlddõssân.
Teâđtõʹsse peeiʹvtum 1.12. teâtt tõʹst, što ooccmõõžžid vuäitt tooiʹmteškueʹtted OmaKelast 12.1.2023 ääʹljeeʹl.