Eeʹjj 2025 jeäʹnnvuõttpaʹǩǩõs lij õlmstõttum – Kela oođad jeäʹnnvuõttpaʹǩǩõõzz äʹššniiʹǩǩi tuõivvi meâldlânji
Kela lij õlmstâttam eeʹjj 2025 jeäʹnnvuõttpaʹǩǩõõzz. Še tän eeʹjj jeäʹnnvuõttpaʹǩǩõõzz ooudasvaalljstõõǥǥ lij rajjum äʹššneǩmaacctõõzz vuâđald. Äʹššniiʹǩǩi tuõivvi meâldlânji jeäʹnnvuõttpaʹǩǩõõzz ouddaz liâ oouʹdab kuʹǩesäiggsab.
Eeʹjj 2025 jeäʹnnvuõttpaʹǩǩõõzzâst liâ 38 ouddaz. Paʹǩǩõõzz juâkkmõš älgg, ǥu eeʹjj 2024 jeäʹnnvuõttpaʹǩǩõõzz liâ juõkkum loʹppe. Ååʹn vuõǯǯum teâđ mieʹldd eeʹjj 2025 jeäʹnnvuõttpaʹǩǩõõzz juâkkmõš äälǥči sueiʹnn–påʹrǧǧmannu määʹttest.
Äʹššneeʹǩǩ mainste, Kela kuvddal
Jeäʹnnvuõttpaʹǩǩõõzz raajât čõõđ ääiʹj äʹššneǩmaacctõõzzi mieʹldd. Äʹššneeʹǩǩi tuõivvi liâ valddum lokku nuʹt ouddsi ǩeʹrjjõõzzin ǥu še jiijjâsnallšemvuõđin. Kela taʹrjjad äʹššniiʹǩǩid mäŋgg vueiʹtlvažvuõđ vaaikted.
– Juõʹǩǩ eeʹjj äʹššneeʹǩǩ vuäǯǯa jiõnsted vueʹđđemsiâkk da puhsskähttan ǩeʹrjjõõzzin. Lââʹssen paʹǩǩõõzzâst liâ tän eeʹjj ouddaz, koin liâ äʹššniiʹǩǩi tuäivvam jiijjâsnallšemvuõđ. Ouddmiârkkân ååʹn še uuʹccab ǩiõsslem-mallsaž bodyin lij mottjeei sueʹrrkuʹsǩǩ, kuäʹss seämma piiutâs peštt siõʹmest kuuʹǩǩab, plaaneeʹjj Veera Petäjä ärvvtââll.
Äʹššneeʹǩǩest lij sääʹnnväʹldd še ooudasvaʹlljummšest, Petäjä särnn.
– Vuäǯǯaim maacctõõzzid tõʹst, što paʹǩǩõõzzâst ij leämmaž mieʹldd räänn. Taʹnni 2025 jeäʹnnvuõttpaʹǩǩõõzzâst lij räänn mieʹldd.
Jeäʹnnvuõttpaʹǩǩõs lij määŋgaid taarblaž
Jeäʹnnvuõttpaʹǩǩõõzz haʹŋǩǩeemärvv lij 170 euʹrred, kååʹtt lij põõššâm seämmanalla eeʹjjest 2018. Jeäʹnnvuõttpaʹǩǩõõzz ouddsi mieʹrr lij õccnam, ǥu 170 eeuʹrin ij vuäǯǯ teänab ouddsid nuʹt jiânnai ǥu veâl čiččâm eeʹjj mââiårra. Håʹt-i ouddaz liâ uuʹccben ǥu ouddâl, tõk liâ ođđ jiijjâsnallšemvuõđi mieʹldd kuʹǩesäiggsab.
Ååʹn ânnʼjõžääiʹjest jeäʹlet määŋgast päärnažpiârrjest tällõõzzlânji kõrr ääiʹj. Jeäʹnnvuõttpaʹǩǩõs âânn seʹst määŋgaid siõʹme aarǥâst taarblaž tarbbsid.
– Jeäʹnnvuõttpaʹǩǩõõzz miârktõssân lij ođđ jieʹllempooddâst leeʹd tuõrvv määŋg miõlâst piârrjid. Vuäǯǯap äʹššneǩmaacctõõzzid teâđast tõʹst, što paʹǩǩõõzz ouddaz liâ vieʹltʼtem määŋg piârrja, Petäjä peäggat.
Kela oouʹdad nuʹt še juätkast jeäʹnnvuõttpaʹǩǩõõzz äʹššneǩmaacctõõzzi vuâđald. Nääiʹt jeäʹnnvuõttpaʹǩǩõs vaʹsttad še pueʹttiääiʹjest piârrji mottjeei taarbid.
Kelast vuäitt raukkâd jeäʹnnvuõttpaʹǩǩõʹsse sääʹmǩiõllsaž vuõssǩeeʹrj
Kelast vuäitt haaʹleen raukkâd jeäʹnnvuõttpaʹǩǩõʹsse sääʹmǩiõllsaž vuõssǩeeʹrj. Tiʹllʼjõõzz vuäitt tuejjeed vuõltteeʹl neʹttpååʹšt addrõʹsse saame@kela.fi. Kelast vuäitt tiʹllʼjed Rämm kuäškknjâst! -vuõssǩeeʹrj (pdf). Lââʹssen vuäitak tobdstõõttâd kela.fist ođđsumus Loruleipuri leʹbe Lokkõsleiʹbbjeei-vuõssǩeeʹrj sääʹmǩiõllsaž jåårǥlõõzzid (pdf).