Kela almostitij ive 2023 hiätutieđettemčálusijd
Kela lii almostittám ive 2023 čielgâkielâlijd tieđettemčálusijd. Čielgâkielâliih tieđettemčáluseh oovdânpyehtih Kela hiäđuid čielgâkielân sierâ eellimtiilijn. Meid Kela kyeimih pyehtih tiiláđ tieđettemčálusijd olssis.
Kela almostit jyehi kalenderive käävci eellimtilekuáhtásii čielgâkielâlii hiätutieđettemčáálusid. Tain čiččâm láá tääl almostittum suomâkielân já ruotâkielân. Siämmást mij lep meid peividâm tieđettemčálusij sämi-, eŋgâlâs- já ruošâkielâlijd kielâversioid.
Tääl valmâštum tieđettemčáluseh láá
- Iäláttuvah já eres iäláttuvfinnejeijee hiäđuh
- Pärniperruuh
- Puoccâm já vajodittem
- Áigápuátutoorjâ
- Pargottesvuotâ
- Olgoenâmijn Suomân tâi Suomâst olgoenâmáid
- Almos aassâmtoorjâ.
Uáppei já viärjukenigâsâi torjuid kyeskee tieđettemčáálus peividuvvoo luuhâmihán 2023–2024 kyesken, já tot almostittoo maŋeláá kiđđuv.
Tieđettemčálusáid láá peividum uđđâ hiätusumeh já ive 2023 eres hiätunubástusah. Peividem ooleest meid tieđettemčálusij olgohäämi lii váhá uđâsmum já visuaallii uáinu lii čielgâsmittum ovdiist.
Suomâ- já ruotâkielâliih čielgâkielâliih tieđettemčáluseh já tai sämikielâliih versioh peividuvvojeh jyehi ive. Sämikielân tieđettemčálusijn láá finnimnáál versioh puoh Suomâst sarnum sämikielân ađai tavesämi-, anarâš- já nuorttâlâškielân. Eŋgâlâs- já ruošâkielâliih versioh tieđettemčálusijn peividuvvojeh jyehi nubbe ive.
Kyeimih pyehtih tiiláđ tieđettemčálusijd Kelast
Čielgâkielâlijd tieđettemčálusijd finnee Kela palvâlem- já ášástâllâmsoojijn. Kela vuolgât suomâ- já ruotâkielâlijd čielgâkielâlijd tieđettemčálusijd jieijâs palvâlemsoojij lasseen meid ovdâmerkkân sosiaaltoimâttuvváid, TE-toimâttuvváid já ravviittuvváid. Kyeimih pyehtih tiiláđ čielgâkielâlijd tieđettemčálusijd já tai sierâ kielâversioid sehe Kela eres teddilum tieđettemčálusijd šleđgâpoostâ peht Kela luámáttâhvuárhást čujottâsâst lomakevarasto@kela.fi. Ucâmuš tiilámmeeri lii 10 pittád/vuolgâttem.
Sämikielâlijd tieđettemčálusijd puáhtá tiiláđ šleđgâpoostâ peht čujottâsâst saame@kela.fi. Vuolgâttep sämikielâlijd tieđettemčálusijd táárbu mield meid ucceeb mere ko mii ucâmuš tiilámmeeri lii.
Čielgâkielâláid tieđettemčálusáid puáhtá uápásmuđ meid neetist
Kela tieđettemčálusij já infoloostâi pdf-nettiversioid puáhtá uápásmuđ meid kela.fi-siijđoin. Tieđettemčálusij nettiversioin láá valdum huámmášumán juksâmvuotâvátámâšah, te laađđâm luhostuvá pyereest meid ruuvdulohhein.
Čielgâkielâlij tieđettemčálusij siskáldâs kávnoo meid kela.fi-nettisiijđoin suomâkielân já ruotâkielân sehe tavesämi-, anarâš- já nuorttâlâškielân.
Čielgâkielâ lii meid jieijâs kielâhäämi
Selkokeskus lii mieđettâm Kela čielgâkielâláid tieđettemčálusáid čielgâkielâtubdâldâs. Tubdâldâs lii merkkâ tast, ete almostittem tiävdá čielgâkielâ kriterijd. Čielgâkielâ lii suomâkielâ jieijâs kielâhäämi, mon siskáldâs, sánádâh já ráhtuseh láá hämmejum älkkeebeht iberdettee háámán.
Čielgâkielâlijn materiaalijn lii iše eromâšávt
- ulmuid, kiäin láá muštotaavdah tâi vädisvuođah luhâmist já oppâmist
- ovdánemvádulijd ulmuid
- tagaráid ulmuid, kiäid suomâ- tâi ruotâkielâ ij lah eenikielâ.
Kelast iä lah sierâ almoskielâliih tieđettemčáluseh, ko láá jurdám, ete čielgâkielâliih tieđettemčáluseh palvâleh puoh kevtteid. Čielgâkielâ heivee puohháid, já kii peri sáttá hástulii eellimtiileest tarbâšiđ čielgâkielâ. Čielgâkielâ lii siämmást meid šiev vuolgâsaje jurgâlussáid.