Kela seelvât sämikielâláid čuosâttum vajodittempalvâlusâi tááláá tile
Kela tutkâmuš seelvât sämikielâlii aalmugân čuosâttum Kela vajodittempalvâlusâi tááláá tile. Seelvâtmist sahhiittâleh sii, kiäh láá uásálistám vajodittemkurssáid já peelijd, moh stivrejeh vajoditmân, vuolgâttuvvoo koijâdâllâm.
Kela tutkâmuš taha selvâttem, mast kärttejeh sämikielâlij uáivilijd Kela vajodittempalvâlusâin. Tutkâmušâst selvâtteh ovdâmerkkân, ete mon tuđâvááh äššigâsah láá lamaš palvâlusân. Peelijn, moh stivrejeh vajoditmân, selvâtteh tom, maht sämmiliih stivrejuvvojeh vajoditmân.
Selvâttem tahhoo kyevti uásist. Selvâttem aalgij kiđđuv 2023 kärttejeijee kirjálâšvuotâkejâstuvváin. Čuávuvâžžân vuárust láá vajoditmân uásálistei sahhiittâlmeh já koijâdâllâm vajoditmân stivrejeijee peelijd. Selvâttem várás sahhiittâleh äššigâsâid, kiäh láá uásálistám sämikielâláid čuosâttum Tules- já IKKU-kurssáid. Tutkâmušsahhiittâlmeh tahhojeh sämikielân já suomâkielân.
Sämikielâlij vajoditmist uccáá tutkâmuštiätu
Selvâttem ovdâsvástádâstotken tuáimá Kela tutkâmuš juávkkuhovdâ Sari Miettinen. Miettisii tutkâmsyergih lohtâseh vijđáht vajodittemvuáhádâhân sehe sosiaal- já tiervâsvuotâpalvâlusvuáhádâhân. Miettinen lii tutkâm eromâšávt tom, maht äššigâsah stivrejuvvojeh táárbumiäldásáid vajodittempalvâlussáid. Majemui aaigij Miettinen lii tutkâm vajoditmân stivrim kuávlulijd iäruid sehe oovtâstpargo Kela já eres tuáimei kooskâ.
– Selvâttem lii taarbâšlâš, tastko sämikielâlij vajoditmân stivrim já äššigâsâi palvâlemtuđâvâšvuođâ kovvejeijee tutkâmuštiätu lii tuođâi uccáá. Taan selvâttem vuáđuld mij peessâp pyerebeht smiettâđ sämikielâláid čuosâttum vajodittem ovdedemtáárbuid, Sari Miettinen muštâl.
Sämikielâláid čuosâttum vajodittem tááláá tile seelvâtmân lii finnejum siärvuslâš tuhhiittem Suomâ Sämitiggeest. Selvâttem lii vuávájum já amnâstâh lii nurrum oovtâst Sämitige já Laapi pyereestvaijeemkuávlu ovdâsteijeiguin.
Sämikielâlâš puáhtá nuuvt haalijddijn finniđ tulkkum Kela ornim eres vajoditmáid
Kela uárnee jyehi ive motomijd sämikielâláid čuosâttum juávkkuhámásijd vajottemkuursâid. Vajodittemkuursâst vajoduvvee finnee torjuu puácuvuođâst tâi váádust vajoduumán. Kuursâst finnee meid tiäđu puácuvuođâst, viärdásâštorjust sehe torjuu aargâ toimáid.
Sämikielâlij vajodittemkuursah uárnejuvvojeh suomâkielân já tulkkojuvvojeh táárbu mield sierâ sämikieláid. Sämikielâliih pyehtih nuuvt haalijddijn finniđ tulkkum meid eres Kela ornim vajoditmáid.
Kela nettisiijđoin muštâleh tärhibeht sehe sämikielâlij vajodittemkuursâin já eres Kela faallâm vajodittempalvâlusâin.