Miärádâsah já reeivah uáinojeh tääl meid sämikielâlii ášástâllâmpalvâlusâst
Kela miärádâsah já reeivah láá taan räi oinum äššigâsân tuš suomâkielâlii OmaKelast já ruotâkielâlii MittFPA:st. Tääl toh uáinojeh meid sämikielâlii MuKela- já MuuKela-ášástâllâmpalvâlusâin.
Kela miärádâsâid já reeivâid lii taan räi puáhtám luuhâđ tuš suomâkielâlii OmaKelast já ruotâkielâlii MittFPA:st. Tääl äššikirjeh uáinojeh meid tavesämikielâlii MuKelast já anarâš- já nuorttâlâškielâlii MuuKelast.
Miärádâsâi já eres äššikiirjij kielân uđâsmittem ij vaaigut, ađai toh uáinojeh puátteevuođâst-uv ton kielân, moos toh láá algâaalgâst čallum.
Návt mij vuolgâttep miärádâsâid já reeivâid
Tun finniih Kela miärádâsâid já eres äššikiirjijd ain vuossâmužžân suomâkielân tâi ruotâkielân tađe mield, kuábáš-uv tunjin lii merkkejum aalmugtiätuoornigân ášástâllâmkiellân. Mij vuolgâttep miärádâsâid já reeivâid šleđgâlávt MuuKelan, jis tun kiävtáh MuuKela já tun lah almottâm mijjân jieijâd šleđgâpostâčujottâs tâi puhelinnummeer. Tun finniih almottâs, ko MuuKelast lii uđđâ postâ. Jis tun jieh keevti MuuKela, tun finniih miärádâsâid já reeivâid pááppárpostân jieijâd pááikán.
Jis tun kiävtáh MuuKela mutâ halijdah miärádâsâid já reeivâid ain meid pááppárpostân, tun puávtáh mutteđ toimâttemvyevi suomâkielâlii OmaKelast saajeest Päivitä omia tietojasi (Peivid jieijâd tiäđuid). Tun puávtáh meid suáittiđ Kela äššigâspalvâlusân já pivdeđ, ete tun finniih miärádâsâid já reeivâid ain pááppárpostân jieijâd pááikán. Tiätutiilijn tun finniih äššikiirjijd pááppárpostân pááikán tast peerusthánnáá, ete kiävtáh-uv MuuKela vâi jieh.
Návt mij vuolgâttep sämikielâlii jurgâlus tuu äššikiirjijn
Jis tun lah uuccâm hiäđu sämikielâlii uuccâmluámáttuvváin, ášástâllâm Kelast sämikielân tâi pivdám Kelast sämikielâlii jurgâlus, tun finniih miärádâsâin já eres äššikiirjijn sämikielâlijd jurgâlusâid. Jurgâlus ráhtoo tast maŋa, ko tun lah vistig finnim äššikirje suomâkielân tâi ruotâkielân.
Mij vuolgâttep sämikielâlijd äššikirjejurgâlusâid ain pááppárpostân. Jurgâlusah iä vala tuáistáážân oinuu MuuKelast tâi ton sierâkielâlijn versioin.
Jis tun jieh lah finnim jieijâd miärádâsâst tâi äššikirjeest sämikielâlii jurgâlus mutâ halijdah finniđ taggaar, vuolgât mijjân viestâ MuuKelast tâi vääldi ohtâvuođâ Kela äššigâspalvâlusân.
Návt mij almottep uđđâ miärádâsâst
Tun finniih almottâs MuuKelan puáttám miärádâsâst tâi reeivâst Suomi.fi-viestân: šleđgâpoostân puátá almottâs, ko MuuKelast lii uđđâ miärádâs tâi reivâ luuhâmnáál. Jis tun lah luođim jieijâd puhelimân Suomi.fi-heiviittâs, te tun finniih almottâs meid ton peht. Jis tust ij lah vala Suomi.fi-viestah kiävtust, tun finniih Kelast almottâs šleđgâpostáin tâi tekstâviestáin.
Eidusijd miärádâsâid já eres äššikiirjijd tun puávtáh luuhâđ MuuKelast saajeest Tuu miärádâsah já eres äššikirjeh.
Suomi.fi-viestah lii Digi- já aalmugtiätuvirgáduv palvâlus. Palvâlusâst tun puávtáh luuhâđ viestâid, maid virgeomâhááh láá vuolgâttâm tunjin. Viestâid puáhtá luuhâđ jo-uv Suomi.fi-moobiilheiviittâsâst tâi čujottâsâst suomi.fi/viestit.
Luuvâ lase
Tun puávtáh tääl vuolgâttiđ Kelan meid sämikielâlii viestâ (kela.fi)