Tun puávtáh tääl vuolgâttiđ Kelan meid sämikielâlii viestâ
Kela lii váldám kiävtun viestâpalvâlus meid sämikielâlii ášástâllâmpalvâlusâst. Tun tarbâšah sämikielâlii viestâ vuolgâtmân sämikielâlii puállupeevdi.
Persovnlijd Kela-aašijd ij pyevti hoittáđ šleđgâpostáin, ko tot ij lah tiätutorvolâš. Viestâi vuolgâttem já vuástáväldim MuuKelast vuod lii tiätutorvolâš. Kela lii tääl váldám kiävtun viestâpalvâlus meid sämikielâlijn OmaKela versioin.
Viestáin tun puávtáh koijâdiđ jieijâd toorjâaašijn, finniđ ravvim huáputtes aašijn já vuolgâttiđ lasetiäđuid. Tun puávtáh meid vuolgâttiđ viestâ, ko ášástâlah nube ulmuu peeleest.
Tuu viestâ stivrejuvvoo Kela sämikielâlii palvâlusân. Huámmáš, ete viestáid västidmist puáhtá leđe ájánem.
Jis tuu äšši lii huápulâš, te vääldi ohtâvuođâ Kela puhelinpalvâlusân tâi pivde, ete Kelast suáittih tunjin maasâd. Tun puávtáh kyeđđiđ ohtâvuotâväldimtáttum šleđgâpostáin čujottâsân saame@kela.fi. Čääli šleđgâpoostân jieijâd noomâ já puhelinnummeer, vâi Kelast pyehtih väldiđ tunjin ohtâvuođâ. Ele vuolgât šleđgâpoostâ peht eres persovntiäđuid tâi ášástâlmân lohtâseijee tiäđuid.
Kela taarbâš love viestâi vuolgâtmân
Kela ij pyevti vuolgâttiđ tunjin jiešráđálávt viestâ MuuKelast tuu lovettáá. Love viestâi vuolgâtmân tun puávtáh adeliđ OmaKelast.
Love puáhtá tuáistáážân adeliđ tuš suomâ- tâi ruotâkielâlii MuuKela versiost (OmaKela). Čáládât OmaKelan já moonâ siijđon Päivitä omia tietojasi (Peivid jieijâd tiäđuid). Moonâ sajan Omat tiedot (Muu tiäđuh) já valjii Viestit OmaKelaan (Viestah MuuKelan). Västid ”kyllä (kale)” koččâmušân ”Saako Kela lähettää sinulle viestejä OmaKelaan (Uážžu-uv Kela vuolgâttiđ tunjin viestâid MuuKelan)?” Valjii loopâst, ete halijdah-uv almottâsâid uđđâ viestâin šleđgâpostáin vâi tekstâsaaváin.
Muulsâiävtulávt tun puávtáh adeliđ love viestâi vuolgâtmân suáittimáin puhelinpalvâlusân.
Návt tun vuolgâttah viestâ MuuKelast
Čáládât MuuKelan ain torvolávt čujottâsâst kela.fi. Sämikielâlii ášástâllâmpalvâlusân lii njuolgâ liŋkkâ sämikielâlij kela.fi-siijđoi pajenuskeest uálgispeln.
Tun kaavnah viestâid MuuKela valjiittuv saajeest Vuolgât já luuvâ viestâid tâi ovdâsiijđo saajeest Njuálgupálgáh. Tun puávtáh čäälliđ uđđâ viestâ saajeest Vuolgât uđđâ viestâ. Valjii hiäđu, moos tuu viestâ lohtâs, já tast maŋa vala tärhidem.
Tun uáináh tuu Kelast finnim viestâid siämmáá sijđoost, saajeest Vuolgâttum já puáttám viestah.
Tun tarbâšah sämikielâlii puállupeevdi
Ko tun halijdah vuolgâttiđ Kelan sämikielâlii viestâ, te tun tarbâšah ton čälimân sämikielâlii puállupevdivyeijee. Jis tust ij lah vala taggaar, te tun puávtáh stelliđ tom jieš jieijâd rustigân.
Tun kaavnah ravvuid já išeniävuid sämikielâlij puállupevdivyeijei já njuálguluuhâmohjelmij stelliimân čujottâsâin divvun.no já borealium.org.