Kela álggaha davvisámegielat telefon- ja gáiddusbálvalusa
Kela álggaha 14.4. davvisámegielat telefon- ja gáiddusbálvalusa. Bálvaleapmái sáhttá maiddái guođđit oktavuođaváldinbivdaga.
Kela davvisámegielat telefon- ja gáiddusbálvalus álgá maŋŋebárgga 14.4. Bálvaleapmi lea dás duohko rabas juohke maŋŋebárgga ja duorastaga dmu 9–11. Davvisámegielat telefonbálvalusa nummir lea 020 634 2894.
Telefonbálvalusa lassin Kela fállá maiddái gáddusbálvalusa. Gáiddusbálvalusas áššehas fidne gáiddusoktavuođa Kela áššehasbálvaleaddjái jogo dihtora dahje mobiilarusttega bokte dorvvolaččat ja álkit ruovttus orodettiin. Davvisámegielat gáiddusbálvalusa oktavuođaváldinliŋka gávdno sámegielat kela.fi-siidduin.
Nuortalašgielat bálvaleapmi joatkašuvvá nugo ovdalge
Kela fállá telefon- ja gáiddusbálvalusa maiddái nuortalašgillii. Maiddái nuortalašgielat bálvaleapmi lea rabas juohke duorastaga dmu 9–11. Nuortalašgielat telefonbálvalusa nummir lea 020 634 4795. Nuortalašgielat gáiddusbálvalusa njuolggo liŋka gávdno nuortalašgielat kela.fi-siidduin.
Anárašgielat bálvaleami oažžu dárbbu mielde tulkoma bokte.
Sámegielat bálvaleapmái sáhttá guođđit oktavuođaváldinbivdaga
Áššehas sáhttá maiddái guođđit sámegielat bálvaleapmái oktavuođaváldinbivdaga, goas Kela sámegielat bálvalanáššedovdi lea oktavuođas áššehassii. Oktavuođaváldinbivdaga sáhttá sáddet suomagillii dahje sámegillii šleađgapoastačujuhussii saame@kela.fi. Muital šleađgapoasttas iežat nama ja telefonnummira.
Kela sámegielat bálvalusat bálvalit du riikkaviidosaččat ledjet dal gos beare. Kela sámegielat neahttasiidduin muitaluvvo dárkilabbot Kela fállan sámegielat bálvalusain ja Kela ovdduin iešguđetlágan eallindiliin.
Sápmelaš áššehasas lea sámi giellalága vuođul vuoigatvuohta dikšut Kela-ášši iežas gillii.