Kela teâđat väʹlddummšest määŋg ǩiõʹlle 

Jos äʹššneǩ ij pââʹst jiõčč håiddad Kela-aaʹššid, son vuäitt väʹlddeed nuuʹbb oummu tuejjeed tõn. Kela ođđ vuäʹppõs teâđat määŋg jeeʹres ǩiõʹlle, mõõnn väʹlddummuš miârkkšââvv da mõõnn nalla tõn tuejjeet.  

Kela-aaʹššid ij leäkku päkk håiddad jiõčč, peʹce taarb mieʹldd kååʹtt-ne jeeʹres ooumaž vuäitt håiddad tõid äʹššneeʹǩǩ peäʹlest: ouddmiârkkân pieʹllkueiʹmm, puäʹres, päärnaž leʹbe taaurõš. Väʹlddummša kuulli aaʹšši fiʹttjummuš tääʹrǩben vuäitt leeʹd väʹǯǯel ouddmiârkkân ǩiõl diõtt leʹbe tõn diõtt, što väʹlddummuš lij fiʹttõssân jaakkâs. Kela ođđ vuäppõs čiõlǥsmâtt 14 jeeʹres ǩiõlin tõn, mâid väʹlddummuš miârkkšââvv da ǩeäzz tõn vuäitt tuejjeed.  

Kela haaʹlad ođđ vuäʹppõõzzin ainsmâʹtted, što õiʹdde jânnma serddam äʹššneǩ še fiʹttai jiijjâs vuõiggâdvuõđid jiõččnes toimmjeeʹjen.  

– Äʹššneǩ-kääzzkõõzzâst lij ǩiâvvâm måttmešt nuʹtt, što lij šõddâm huõll äʹššneeʹǩǩ vuõiggâdvuõttstaan teâuddjummšest da lääʹdd õhttsažkååʹdd tääʹssverddsaž toiʹmmjeeivuõđ fiʹttjummšest. Ođđ vuäʹppõõzz veäkka lij mieʹrr vieʹǩǩted äʹššneeʹǩǩ fiʹttjed, mâid väʹlddummuš miârkkšââvv. Vuäʹppõs teâđat še čiõlggsânji tõn, ǩeäzz väʹlddǩeeʹrj vuäitt uʹvdded da koid aaʹššid nuuʹbb oummu peäʹlest vuäitt håiddad, oouʹdeem äʹšštobddi Päivi Nyberg ääʹššlažvuõttjuâkksest tuâtt.   

Kela älšmâtt ǩeerjlaž väʹlddummša 

Väʹlddummuž vuäitt uʹvdded še njäälmlânji, leša tõt toiʹmmai tåʹlǩ õhttân vuâra. Ǩeerjlaž väʹlddummuš eʹpet lij viõǥǥâst meäʹrteʹmes ääiʹj. Kela älšmâtt ǩeerjlaž tuejjeed väʹlddummuž, ko äʹššneeʹǩǩ teâđain käunnʼjeei ǩeerjlaž väʹlddǩeʹrjj hiâlpat nuʹtt äʹššneeʹǩǩ ko suu väʹlddeem oummu äʹššummuž. Seämmast tõt čiõlǥsmâtt še Kela äʹšštobddji tuejjummuž.  

Kelast lij vaalmâš väʹlddǩeʹrjjlomakk Väʹlddǩeʹrjj – Ouddõsaaʹšši håiddmõš Kelast (VAL 3sms) väʹlddummuž ouddmõʹšše.

Äʹššneǩ jiõčč tuʹmmad, koid aaʹššid väʹlddǩiiʹrjin vuäitt håiddad. Nobba vuäitt uʹvdded lååʹv håiddad pukid ouddõsaaʹššid leʹbe tåʹlǩ tiõttum ouddõõzz leʹbe ääʹšš. Tiillnââmar muʹttem vääras âlgg pâi tuejjeet jeeʹrab väʹlddǩeʹrjj.  Väʹlddǩeeʹrj vaaldšeeʹjest lij vuõiggâdvuõtt vuäǯǯad aaʹšši håiddam diõtt vieʹltʼteʹmes peeitast ââʹnnem vuâllsaž teâđaid, jos väʹlddǩeeʹrjest lij uvddum miâsttmõš  teâđai ouddmõʹšše.  

Väʹlddǩeeʹrj vuäitt raajjâd še luõvâld ǩeeʹrjtum, ko tõt pâi âânn seʹst pukid taarbšum teâđaid da väʹlddǩeeʹrj uʹvddi jiõčč ǩeeʹrjtem vuâllaǩeeʹrjtõõzz. Väʹlddummuž vuäǯǯjen âlgg leeʹd tiuddâkksaž. Väʹlddǩeeʹrj vuäitt tooiʹmted Kelaaʹje OmaKelast, pååʹšt mieʹldd leʹbe kääzzkõspäikka.  

Nuuʹbb oummu peäʹlest ij vueiʹt veâl tuejjeed leʹbe vuõltteed ooccmõõžžid neeʹttest. Õhttsažtuâjjkueiʹm da tuâjjuʹvddi peäʹlstes håidda aaʹššid Kelast Suomi.fi-väʹlddvuõđin.  

Looǥǥ lââʹzz 

Vuäʹppõs Kela väʹlddǩeʹrjjlomaakk tiuddummša jeeʹres ǩiõlivuiʹm