Põʹmmaipååʹšt serdd čorru – Kela ǩeeʹrj puäʹtte juätkast tåʹlǩ MuuKelaaʹje
Kela tååimat tuʹmmstõõǥǥid da ǩiiʹrjid tåʹlǩ MuuKelaaʹje 15.1.2026 ääʹljeeʹl. Põʹmmaipååʹšt vuäǯǯa juätkast äʹššneeʹǩǩ, kook jiâ ââʹn MuuKela. Sääʹmǩiõllsa vuäǯǯa tuʹmmstõkjåårǥlõõzzid ooudâs põʹmmaipååʹšten.
Kela tuʹmmstõõǥǥi da ǩiiʹrji tååimtemnääʹll mottai 15.1.2026. Äʹššneeʹǩǩ, kook âʹnne MuuKela da liâ iʹlmmtam neʹttpååʹštaddrõõzzâs leʹbe teʹlfoon-nââmres, vuäǯǯa tuʹmmstõõǥǥid da ǩiiʹrjid tåʹlǩ liâdǥlânji MuuKelaaʹje. Seämma ǩeeʹrj jeät teänab vuõlttâd pååʹštin. Ǥu ođđ tuʹmmstõk leʹbe ǩeʹrjj lij lookkâmnalla MuuKelast, äʹššneǩ vuäǯǯ iʹlmmtõõzz Suomi.fi-saakkân, neʹttpååʹštin leʹbe teʹksttsaaǥǥin.
Muuttâs vuâđđââvv skamm-mannust 2025 primmum Kela-lääʹjj oođummša da tuärjj liâdǥlaž äʹššummuž veiddnummuž. Eeʹjjest 2025 Kela vuõlttii nuʹt 6 miljoon ǩeeʹrj põʹmmaipååʹšten da nuʹt 9 miljoon põʹmmaipååʹštʼtaa. Šeäšt priʹnttjem- da vuõltteemkuulin nårrje nuʹt 6 miljoon euʹrred mõõnni eeʹjjest.
– Tuʹmmstõõǥǥ da ǩeeʹrj liâ leämmaž vuäǯǯamnalla MuuKelast juʹn kuuʹǩǩ, da pâʹjjel 1,5 miljoon äʹššniiʹǩǩin liâ juʹn čåuddõõttâm põʹmmaipååʹštest. Liâdǥlaž äʹššummuž lij mäŋggsa jåʹttlummuž da hiâlpmõs nääʹll vuäǯǯad teâtt tuʹmmstõõǥǥin. Muuttâs ǩieʹppad tuʹššen vuõlttummuž da jåʹttlâtt teâđjååttmõõžž, särnn joukkjååʹđteei Anu Lantonen Kela ouddõsäʹššǩeʹrjjpuuʹtʼtõõzzâst.
Iʹlmmtõs MuuKelast åårrai tuʹmmstõõǥǥin da ǩiiʹrjin puätt Suomi.fi-saaǥǥid
Iʹlmmtõõzz ainsmâʹtte, što äʹššneǩ vuäǯǯ teâđ tuʹmmstõõǥǥâst leʹbe ǩeeʹrjest tâʹlles, ǥu tõt lij lookkâmnalla MuuKelast. Iʹlmmtõs ođđ tuʹmmstõõǥǥâst leʹbe ǩeeʹrjest MuuKelast vuõltteet neʹttpååʹštaddrõʹsse, kååʹtt lij ruõkkum Suomi.fi-kääzzkõʹsse. Suomi.fi-suåvldõõzz õõʹnnʼjid iʹlmmtõs puätt še suåvldõõzz pääiʹǩ. Äʹššniiʹǩǩid, kook jiâ ââʹn Suomi.fi-saaǥǥid, Kela vuõlttad iʹlmmtõõzz neʹttpååʹštin leʹbe teʹksttsaaǥǥin.
Põʹmmaipååʹšt seill tiõttum vuõʹjjin
Äʹššneeʹǩǩ, kook jiâ ââʹn MuuKela, vuäǯǯa ooudâs tuʹmmstõõǥǥid da ǩiiʹrjid põʹmmaipååʹšten. Še MuuKela õõʹnni äʹššneǩ vuäitt haaʹleen vaʹlljeed põʹmmaipååʹšt. Vaʹlljummuš tuejjeet MuuKelast leʹbe Kela äʹššneǩ-kääzzkõõzzâst.
Muuttâs ij kuõsk oummuid, kook jiâ jiijj tobddõõđ MuuKelaaʹje pâi liâ ouddam vääʹld nuuʹbb oummu äʹššeed peäʹlstes. Väʹldduum ooumaž vuäitt kuuitâǥ luõppâd põʹmmaipååʹštest väʹldduum peäʹlest MuuKelast.
Pieʹǩǩ ǩiiʹrjin tååimtet še juätkast nuʹt MuuKelaaʹje ǥu pååʹštin. Näkam liâ jeeʹrab mieʹldd piârjeältõõǥǥid, jeältõõǥǥ päärnažpââjõʹsse, jeältõktuärjjõʹsse da lääʹmestuärjjõõzzid õhttneei ǩeeʹrj. Piʹrǧǧeemtuärjjõõzz mähssčõõnõõttmõõžž di preddan kuõskki ǩeeʹrj vuõltteet ooudâs tåʹlǩ põʹmmaipååʹšten.
Sääʹmǩiõllsaž tuʹmmstõkjåårǥlõõzz da jeeʹres sääʹmǩiõllsaž ǩeeʹrj Kelast vuõltteet äʹššnekka veâl ooudâs pååʹšt mieʹldd. Sääʹmǩiõllsaž vuäǯǯ Kelast tuʹmmstõõǥǥ vuõššân juʹna lääʹddǩiõʹlle leʹbe ruõccǩiõʹlle meer-rekisterteâđaid miõrkkum äʹššeemǩiõl meâldlânji juʹna MuuKelaaʹje leʹbe ǩeʹrjjen vaʹlljummšes meâldlânji. Tõn mâŋŋa Kela jåårǥlâtt tuʹmmstõõǥǥ sääʹmǩiõʹlle, jõs äʹššneǩ lij ooccâm ouddõõzz leʹbe muđoi pohttam ouʹdde tuõivvi äʹššeed sääʹmǩiõlin.
Eeʹjjest 2026 še jeeʹres veʹrǧǧneeʹǩǩ äʹlǧǧe tååimted ǩiiʹrjid vuõss-sââʹjest liâdǥlânji, ǥu liâdǥla äʹššummuž vuõss-sââʹj kuõskki lääʹǩǩ šâdd viõʹǩǩe. Äiʹǧǧtaull täʹrǩsmââvv eeʹttiǩ-kåʹddǩiõttʼtõõllmõõžž ouddneen.
Lââʹssteâđaid
Kela tuʹmmstõõǥǥi da ǩiiʹrji tååimtemnääʹll mottai (lääddas)
Veʹrǧǧneǩpååʹšt puätt eeʹjj 2026 aalǥâst vuõss-sââʹjest liâđǥlânji (dvv.fi, lääddas)