Jeäʹnnvuõttpaʹǩǩõõzz juâkkmõš älgg – ääiʹjbuužž jäänab ouddaz mieʹldd
Ååʹn õlmstõttum jeäʹnnvuõttpaʹǩǩõs âânn seʹst ääiʹjbuužž jäänab ouddsid tõn diõtt, što jeäʹnnvuõttpaʹǩǩõõzz ärvv šorrni tän eeʹjj. Kela lij jueʹjškuättam paʹǩǩõõzz äʹššniiʹǩǩid.
Jeäʹnnvuõttvieʹǩǩtõs lij jeäʹnnvuõttpaʹǩǩõs leʹbe 210 eeuʹr teäʹǧǧsumm. Jeäʹnnvuõttpaʹǩǩõs vaajtââvv eeǥǥlânji siõmmna jeeʹres aaiʹji. Paʹǩǩõs vaajtââvv, ǥu ääiʹjab paʹǩǩõõzz lie puk juõkkum.
Jeäʹnnvuõttvieʹǩǩtõs šorrni eeʹjj aalǥâst
Tääuʹjmõsân ǩeäččlõs iiʹjji paʹǩǩõõzz jie čårran miârkteeinalla kõskknes. Ååʹn jueʹǩǩma puättam jeäʹnnvuõttpaʹǩǩõõzzâst lie kuuitâǥ ääiʹjbuužž jäänab ouddaz tõn diõtt, što jeäʹnnvuõttvieʹǩǩtõs šorrni 170 eeuʹrest 210 eurra. Jeäʹnnvuõttvieʹǩǩtõõzz äärv pââʹjummuš kooll halltõõzz täävtõʹsse raaveed dommtäälai åskkmõõžž puäđlviʹžže.
– Jeäʹnnvuõttvieʹǩǩtõõzz äärv šorrnem mieʹldd ååʹn jueʹǩǩma puättam jeäʹnnvuõttpaʹǩǩõs taʹrjjad jeänna da õmmǥa õinn pueʹrab tuärj ođđ jieʹllempoodd, Kela äʹšštobddi Veera Petäjä särnn.
Jeäʹnnvuõttpaʹǩǩõõzz plaanât jieʹnnid da õmmǥaid juuʹrdeeʹl. Ouddsid vaʹlljeet tässa da staanvuõʹtte vuâđđõõvvi kriteeʹrivuiʹm. Äʹššneǩmaacctõs lij še miârkteei roolâst jeäʹnnvuõttpaʹǩǩõõzz plaanâmtuâjast.
– Ǥu jiiʹjjes õmmǥaž šâdd jeäʹnnvuõttpaʹǩǩõõzz ouddsin rääʹj, ouddsid vuäitt uʹvdded õõudårra. Kelaaʹje da piârrjid lij vääžnai, što jeäʹnnvuõttpaʹǩǩõõzz ouddsid vuäitt äuʹǩǩeed kuuʹǩǩ, Petäjä tuâtt.
Ođđân jieʹnnvuõttpaʹǩǩõõzzâst päll da siâŋggčuuʹǩǩ kaart
Ååʹn jueʹǩǩma puättam jieʹnnvuõttpaʹǩǩõõzzâst lij mieʹldd päll. Tõn teäggad halltõsprograʹmme siskkneei Suomi liikkeelle ‑programm, koon täävtõsân lij vuäǯǯad läʹddlaid liikkeed jeänab. Jeäʹnnvuõttpaʹǩǩõõzz teeʹmes da euʹnnreeʹǧǧes päll tuärjjad puärraz da õmmǥa vuârrvaaiktõõzz da älšsmâtt piârrjid õhttsaž tuejjummša.
Ođđân jieʹnnvuõttpaʹǩǩõõzzâst lij še siâŋggčuuʹǩǩ kaartʼtõs. Tõt lij kaartʼteei Eveliina Muotkavaara plaanâm da nõõmâld Kuvitellaan tulevaa (Miõlljurddi pueʹtti årra).
– Haaʹleem raajjâd maall, kååʹtt rämmâtt da kollai pakksen tän piârrjid oʹdinak jieʹllempoodd. Persikkeunnsaž âʹlmmveeidasvuõttaaunâs kåčč miõlljurddjid pueʹtti da šõddmõõžž årra, Muotkavaara kovvââll.
Jieʹnnvuõttpaʹǩǩõʹsse vuäitt tiʹllʼjed sääʹmǩiõllsa vuõssǩeeʹrj
Sääʹmǩiõllsai piârri vuäiʹtte tiʹllʼjed jieʹnnvuõttpaʹǩǩõʹsse tiõddum sääʹmǩiõllsa vuõssǩeeʹrj. Vuõssǩeeʹrj vuäitt tiʹllʼjed lomaakkin SV 300 (pdf, lääddas). Tiʹllʼjõslomakk käunnai še kela.fist koolm sääʹmǩiõʹlle:
- nuõrttsääʹmǩiõʹlle SV300 sms (pdf)
- aanarsääʹmǩiõʹlle SV300 smn (pdf)
- tâʹvvsääʹmǩiõʹlle SV300 sme (pdf).
Tiâddum vuõssǩeeʹrj lââʹssen jieʹnnvuõttpaʹǩǩõõzzâst åårrai ođđsab lääʹdd- da ruõccǩiõllsaž vuõssǩeeʹrj sääʹmǩiõllsaž jåårǥlâttmõõžžid vuäitt tobdstõõttâd kela.fi sääʹmǩiõllsain seeidain.
Tobdstõõđ jeäʹnnvuõttpaʹǩǩõʹsse
Ååʹn õlmstõttum jeäʹnnvuõttpaʹǩǩõs âânn seʹst ääiʹjbuužž jäänab ouddsid, teeʹmes päll da ođđ siâŋggčuuʹǩǩ kaartʼtõs. Kela lij jueʹjškuättam paʹǩǩõõzz äʹššniiʹǩǩid.