Kela sääʹmǩiõl da kulttuur lokku väʹlddem säursmâʹttemkääzzkõõzz čõõđtemääiʹj jueʹtǩet
Kela njuhččmannust 2026 jåttjam sääʹmǩiõl da kulttuur lokku väʹlddem säursmâʹttemkääzzkõõzz čõõđtemääiʹj jueʹtǩet 31.1.2028 räjja.
Kela jåttʼti njuhččmannust 2026 ođđ määŋgämmtallaš säursmâʹttemkääzzkõõzz ǩiõččlõõddmõõžž, Veâlmm – sääʹmǩiõllsa miõltiõrvâsvuõttsäursmâttmõõžž. Kääzzkõs lij jurddum 18–67-âkksaid sääʹmǩiõllsaid da/leʹbe sääʹmkulttuur meâldlaž säursmâttmõõžž taarbšeei äʹššniiʹǩǩid, ǩeäin liâ miõltiõrvâsvuõđ vaʹǯǯtõõzz.
Täävtõssân tåimmampâstlvaž argg
Säursmâttmõõžž täävtõssân lij trauma- da miõltiõrvâsvuõttoudldõõzzin šõddi vaʹǯǯtõõzzi fiʹttjummuš di vuäittmõõžž, toiʹmmjemoodd da aarǥtuõʹllʼjemtääidai raavšummuš.
Kääzzkõs vueiʹtet viikkâd čõõđ persoonʼnallšemnalla da soojjlânji aarǥ pirrõõzzin, kääzzkõspuuʹtʼteeʹj tåimmpääiʹǩest leʹbe ougglõsõhttvuõđin videosaǥstõõllmõõžž ââʹneeʹl. Säursmâttmõš âânn seʹst nuʹt persoonlaž ǥu joukknoorõõttmõõžžid, da tõʹst vääʹldet lokku še õõldâsoummu da jeeʹres âʹlddpirrõs. Taarbšeen joukknoorõõttmõõžžid lij vueiʹtlvaž muʹtted persoonlaž noorõõttmõššân.
– Säursmâʹttemkääzzkõʹsse lij vueiʹtlvaž ooccâd koon åʹrnn Lääʹddjânnmest täättas, ǥu säursmâttmõš lij vueiʹtlvaž viikkâd čõõđ še obbnes ougglõsõhttvuõttân, projeʹkttjååʹđteei Laura Jokiranta särnn.
Õhttsažtuâjast rajjum kääzzkõs
Kela lij plaanääm säursmâttmõõžž siiskõõzz õhttsažtuâjast sääʹmteeʹǧǧ da Lappi pueʹrrvââjjamvuuʹd di jeeʹres čõõnâsjooukivuiʹm.
Säursmâʹttemkääzzkõõzz čõõđviikki määŋgämmtallaš jooukâst lij uuʹccmõsân õhtt sääʹmǩiõl täiddsaž ämmat-tuâjjlaž. Kela jääʹrjast sääʹmǩiõl õõʹnni äʹššnekka tuʹlǩǩõõzz suu jiijjâs ǩiõlin, jõs säursmâʹttemkääzzkõõzzâst ââʹnet lääʹddǩiõl leʹbe jeeʹres ǥu äʹššneeʹǩǩ mainstem sääʹmǩiõl.
Säursmâʹttemkääzzkõõzzâst lij vueiʹtlvaž ââʹnned še lääʹddǩiõl leʹbe lääʹdd da sääʹmǩiõl palddlõõžži. Kela ij õõlǥât säursmâʹttemkääzzkõõzz äʹššneeʹǩǩest sääʹmǩiõl tääid, leša äʹššneǩ vuäitt ooʒʒõõttâd kääzzkõʹsse še vuäǯǯam diõtt sääʹmkulttuur jiijjâsnallšemvuõđid lokku väʹlddem säursmâttmõõžž.
Säursmâʹttemkääzzkõõzz čõõđat Coronaria Kuntoutuspalvelut Oy Oulu. Säursmâʹttemobbvuõđi čõõđtemääiʹj jueʹtǩǩeš 31.1.2028 räjja.
– Tät miârkat tõn, što äʹššneeʹǩǩ vueiʹtte ooccâd sääʹmǩiõllsiʹžže miõltiõrvâsvuõttsåursmâttmõʹšše 30.4.2027 räjja, projeʹkttjååʹđteeʹjj Laura Jokiranta kovvad. Tuäivvap, što veâl jäänab äʹššniiʹǩǩin da siʹjjid säursmâttmõʹšše ohjjeei vueʹssbeäʹl kaaunče tän määusteʹmes kääzzkõõzz. Ǩiõččlâsttmõš puuʹtat Kelaaʹje tääʹrǩes teâđaid äʹššneǩvuâlǥažvuõđâst di tobdlmid sääʹmǩiõl da kulttuur lokku väʹlddem kääzzkõõzz čõõđ viikkmõõžžâst, Jokiranta lââʹzzat.
Kela rääjj kääzzkõõzz õõutsââʹjest säursmâʹttemkääzzkõõzz puuʹtʼteeʹjin da koordinâstt obbvuõđ vueʹssen Säursmâttmõõžž sääʹmǩiõllsaid -projeeʹkt. Säursmâttmõõžžâst tuejjeet še ärvvtõõllâmtuʹtǩǩummuš.
Nääiʹt säursmâttmõʹšše ooʒʒât
Vaʹlljed ooccâmlomaakkâst Tuʹmmjemvärrsaž säursmâttmõš (KU 132sms, pdf) säursmâʹttemkurss-vaajtõsmäinn da tiuddâd ooccmõõžžâst ooʒʒi teâđai lââʹssen paaiʹǩid 2–8. Kääzzkõs ij âânn seʹst innsââʹj.
- Ooccmõõžž meâlddõssân taarbšak õõlmâs tiõrvâsvuõtthuâlast tuejjuum B-ciâlkâlm leʹbe jeeʹres taalkâstiõđla čiõǥltõõzz, kååʹtt âânn seʹst vaʹstteei teâđaid. Säursmâttmõš lij jurddum äʹššniiʹǩǩid, ǩeäin lij tuõttum lääiʹves leʹbe kõskkvaiggâd loʹssesmiõll, tåʹsǩǩvuõttrõttjõs, kueiʹtårrsaž miõllrõttjõs, trauʹmmvuõđlaž streʹssheämmõs leʹbe mii-ne jeeʹres traumaaʹje õhttneei kuʹǩesäiggsaž oudldâsttmõš.
- Vuäitak vuõltteed ooccmõõžž Kelaaʹje liâdǥlânji MuuKelast.
- Ooccmõõžž vuäitt vuõltteed Kelaaʹje še pååʹšt mieʹldd addrõʹsse Kela, PL 10, 00056 KELA.
- Jõs taarbšak vieʹǩǩ ooccmõõžž teâuddmõõžžâst leʹbe tuʹst liâ jeeʹres ääʹšš kõõččâmnalla, vuõlttâd õhttvuõđväʹlddemraukkmõš addrõʹsse saame@kela.fi.
Veâlmm – sääʹmǩiõllsaž miõltiõrvâsvuõttsäursmâttmõš
Brosyyr: Veâlmm – sääʹmǩiõllsaž miõltiõrvâsvuõttsäursmâttmõš (pdf)