Kela almmustahtii jagi 2022 vuosttas čielgabrošyraid

Kela lea almmustahttán vuosttas jagi 2022 čielgabrošyraid. Čielgabrošyrat muitalit Kela ovdduid birra čielgagielain sierra eallindiliin. Maiddái ovttasbargoguoimmit sáhttet diŋgot brošyraid alcceseaset.

Kela almmustahttá jahkásaččat 8 iešguđetlágan čielgagielat ovdobrošyra guđege eallindili mielde. Vihtta dáin lea dál almmustahtton suomagillii ja ruoŧagillii. Seammá háve leat beaiváduvvon maiddái brošyraid sámegielat giellaveršuvnnat.

Dál gárvánan brošyrat leat

• Áigáiboahtodoarjja
• Bargguhisvuohta
• Almmolaš ássandoarjja
• Buohcan ja veajuiduhttin
• Fárren Supmii dahje Suomas olgoriikkaide.

Mánnábearrašat ja Ealáhagat ja ealáhatoažžuid eará doarjagat -brošyrat gárvánit maiddái lagašáiggiid. Mánnábearrašat-brošyras vuhtii váldo dán jagi erenomážit bearašfriddjavuođaođastus. Ođđa brošyras muitaluvvo sihke boares ja ođđa vuogádaga mieldásaš dilis. Studeanttaid ja bálvalusgeatnegasaid doarjagiid guoski brošyra beaiváduvvo lohkanjagi, ii kaleandarjagi guoskin. Dat almmustahtto maŋŋá giđđat.

Váttes čuoggát leat hábmejuvvon ovddibu čielgasabbon, ja ovdamearkan Fárren Supmii -brošyrii leat lasihuvvon ovdamearkaolbmot vuoi dat buktet tekstii konkrehtalašvuođa. Lassin brošyraide leat dieđusge beaiváduvvon maiddái ođđa ovdosupmit ja vejolaš eará ovdonuppástusat.

Beaivádeami oktavuođas maiddái brošyraid bajiloaidnu lea muhtin veardde ođasmuvvan; ivnnit leat ain ovddeža geahppasabbot ja teavstta gaskkas ovdanbukton neahttačujuhusat oidnojit buorebut. Brošyraid bajildussii lea maiddái lasihuvvon ávkkálaš jahkelohku.

Suoma- ja ruoŧagielat čielgabrošyrat ja daid sámegielat veršuvnnat beaiváduvvon jahkásaččat. Eaŋgals-, ruošša- ja esttegielat veršuvnnat beaiváduvvojit juohke nuppi jagi.

Bargoguoimmit sáhttet diŋgot brošyraid Kelas

Kela sádde brošyraid iežas bálvalanbáikkiid lassin maiddái ovdamearkan sosiáladoaimmahagaide, BE-doaimmahagaide ja rávvehagaide. Lassin ovttasbargoguoimmit sáhttet ieža diŋgot čielgabrošyraid ja eará brošyraid Kela skovvevuorkkás šleađgapoastta bokte (lomakevarasto@kela.fi). Minimadiŋgonmearri lea 10 stuhka/sádden.

Kela čielgabrošyraid ja eará brošyraid ja infogihppagiid pdf-neahttaveršuvnnaide sáhttá oahpásmit kela.fi-siidduin. Brošyraid neahttaveršuvnnain vuhtii váldojit olahahttivuođagáibádusat, nu ahte daid bláđen lihkosmuvvá bures maiddái ruvttolohkkiin.

Čielgagiella lea iežas giellahápmi

Selkokeskus (Čielgagiellaguovddáš) lea mieđihan Kela čielgabrošyraide čielgagielladovddaldaga. Dovddaldat lea mearka das, ahte preanttus deavdá čielgagiela kriteraid. Čielgagiella lea suomagiela iežas hápmi, mas sisdoallu, sátnerádju ja ráhkadusat leat heivehuvvon álkibut áddehahttin.

Čielgamateriálain ávkašuvvet erenomážit

• olbmot, geain leat muitinbuozalmasat dahje lohkama ja oahppama váttisvuođat
• ovdánanváttolaš olbmot
• dakkár olbmot, geaidda suoma- dahje ruoŧagiella ii leat eatnigiella.

Kelas eai leat sierra standárdagielat ovdobrošyrat, go lea jurddašuvvon, ahte čielgabrošyrat bálvalit buot geavaheaddjiid. Čielgagiella heive buohkaide, ja dat lea seammá háve buorre vuolggasadji maiddái earret eará jorgalusaide.

Čielgabrošyraid sisdoallu gávdno maiddái kela.fi-neahttasiidduin suomagillii, ruoŧagillii ja sámegillii.

Oahpásmuva Kela brošyraide: