Pärni puátimin | Anarâškielâ | KelaMoonâ siskáldâsân

Pärni puátimin

Jis tunnui lii puátimin pärni, te vääldi vistig ohtâvuođâ enijravviittâhân. Ko čuávjum lii ovdánâm, te tun puávtáh uuccâđ Kela torjuid, tego enijtorjuu. Kelast finnee meid pärnilase, Kela-koortâ já ereslágánijd torjuid päärni tiipšon.

Enijravviittâh palvâl čuávjum ulmuid já pärniperruid

Jis tun lah čuávjum, te vääldi ohtâvuođâ ravviittâhân. Ravviittuvah láá pyereestvaijeemkuávlui palvâlus, já toh láá nuuvtá.

Ravviittuvâst peerâ finnee ravvuid čuávjumääigi já šoddâdem várás. Toos lasseen ravviittuvâst čuávuh eeni já päärni tiervâsvuotâtile.

Enni kalga eelliđ ravviittuvâst tiervâsvuođâtäärhistmist čuávjum aalgâst, majemustáá 18. čuávjumohhoost. Ko tuu čuávjum lii pištám ucemustáá 22 okkod (154 peivid), te ravviittâh addel tunjin čuávjumtuođâštus. Tun tarbâšah tom, ko tun uusah Kelast torjuu.

Enijtoorjâ ađai enijpakkeet teikkâ ruttâsumme

Tun puávtáh uuccâđ enijtorjuu, ko čuávjum lii pištám 5 mánuppaje. Tun puávtáh valjiđ enijpakkeet tâi 170 eurod. Enijpakettist láá tipšomtarbâšeh já pihtâseh párnáá várás. Tun puávtáh pivdeđ enijpakettân sämikielâlii vuosâkirje Kelast.

Uusâ enijtorjuu majemustáá 2 mánuppaje ovdil rekinistum ääigi.

Enijpakkeet vuosâkirje

Sämikielâlijd vuosâkiirjijd puáhtá tiiláđ Kelast já vuolgâttep taid äššigâssáid sierâ. Tiilám puáhtá toohâđ Kela sämikielâlii puhelin- tâi káiduspalvâlusân tâi vuolgâtmáin šleđgâpoostâ čujottâsân saame@kela.fi.

Kelast puáhtá tiiláđ Ilo riškáttâl! -vuosâkirje (pdf). Toos lasseen viermist puáhtá laađđâđ uđđâ Kis, kis kisáčivgâ -vuosâkirje (pdf).

Uáppáásm enijpakkeet siskáldâsân

Uáppáásm uđđâ enijpakkeet siskáldâsân video peht (YouTube):

Pärnilase

Kela máksá jyehi päärnist pärnilase. Pärnilase máksoo táválávt iänán, iäčán tâi eres huolâtteijei. Mäksim juátkoo ton mánuppaje loopân, kuás pärni tiävdá 17 ihheed.

Pärnilase máksoo paarnij mere mield:

  • oovtâ päärnist suulân 95 eurod mánuppaajeest
  • kyevti päärnist suulân 200 eurod mánuppaajeest
  • kuulmâ päärnist suulân 334 eurod mánuppaajeest
  • neelji päärnist suulân 557 eurod mánuppaajeest
  • viiđâ päärnist suulân 699 eurod mánuppaajeest.

Vuálá 3-ihásijn paarnijn máksoo stuárráb pärnilase 1.4.2024 rääjist. Aledem lii 26 eurod mánuppaajeest.

Ohtuuhuolâtteijee finnee aledem, mii lii jyehi päärnist suulân 73 eurod mánuppaajeest.

Pärnilasseest ij perruu viäru.

Mušte uuccâđ pärnilase. Tun puávtáh uuccâđ pärnilase jo ovdil ko pärni šadda tâi párnáá šoddâm maŋa.

Kela-korttâ

Ko pärni šadda Suomâst, te tiätu tast mana pyecceiviäsust aalmugregisterân já tast Kelan. Pärni finnee persovntubdâlduv.

Ko pärni lii finnim noomâ, te Kela vuolgât pááikán Kela-koortâ ađai pyecceetáhádâskoortâ.

Luuvâ lase

Sijđo lii peividum 16.2.2024

Mon mielâst tun lah sijđoost?