Nube ulmuu váldásmittem Kela-aašijd hoittáámân

Taan siijđost:

Návt tun váldásmitáh väldikirjijn
Návt tun váldásmitáh Suomi.fi-váldásmitmáin

Jis tun lah 18 ihheed tâi puárásub, te tun puávtáh adeliđ nube ulmui love ađai váldásmittiđ suu hoittáđ Kela-aašijd tuu peeleest. Váldásmittum olmooš kalga leđe ucemustáá 18 ihheed. Tun puávtáh meid váldásmittiđ maaŋgâid sierâ ulmuid. Váldásmitmist puáhtá kiäsádâttâđ kuás peri.

Tun puávtáh toohâđ váldásmittem čuávvoo vuovvijn:

Väldikirjijn tun puávtáh váldásmittiđ nube ulmuu hoittáđ tuu Kela-aašijd puhelimist, palvâlemsaajeest já poostâ peht.
Suomi.fi-váldásmitmáin tun puávtáh váldásmittiđ hoittáđ tuu Kela-aašijd neetist MuuKelast.

Huámmáš, ete aaibâs puoh aašijd ij pyevti vala hoittáđ MuuKelast. Jis tun halijdah, ete nube olmooš puáhtá hoittáđ tuu Kela-aašijd neetist já puhelimist, te adde sehe Suomi.fi-váldásmittem já väldikirje.

Návt tun váldásmitáh väldikirjijn

Väldikirjijn tun puávtáh váldásmittiđ olesahasii ulmuu hoittáđ tuu Kela-aašijd puhelimist, palvâlemsaajeest já poostâ peht. Jis tun halijdah, ete nube olmooš puáhtá hoittáđ aašijd meid neetist, ovdâmerkkân uuccâđ hiäđu tuu peeleest MuuKelast, tun koolgah adeliđ sunjin Suomi.fi-váldásmittem.

Maid aašijd väldikirjijn puáhtá hoittáđ?

Tun meridah jieš, ete maid aašijd väldikirjijn puáhtá hoittáđ. Tun puávtáh adeliđ nube ulmui love hoittáđ tuu puoh hiätuaašijd tâi tuš tiätu hiäđu tâi ääši. Jis tun halijdah, ete váldásmittum olmooš hoittáá tuu peeleest tuš oovtâ hiätun lohtâseijee aašijd, te čääli väldikiirján hiäđu noomâ, ovdâmerkkân iäláttuvfinnejeijee aassâmtoorjâ.

Väldikirjijn puáhtá meid väidiđ miärádâsâst tuu peeleest. Jis tun toovah väldikirje Kela luámáttuvváin, te toos kalga čäälliđ, ete väldikirje lii väidimääši hoittám várás. Sierâ väldikirje ij kuittâg taarbâš toohâđ, jis siämmáš olmooš lii hoittám siämmáá ääši väldikirjijn ovdil.

Väldikirjijn váldásmittum olmooš puáhtá finniđ tiäđuid, maid kalga toollâđ syeligâsâst, jis toh láá velttidmettum aašij hoittám várás já jis tun lah väldikirjijn adelâm miettâm tiäđui addelmân.

Návt tun toovah väldikirje

Tun puávtáh toohâđ väldikirje luámáttuvváin Väldikirje – Hiätuaašij hoittám Kelast VAL 3smn (pdf). Luuvâ tärhibijd ravvuid luámáttuv tevdimân: Nube peeleest ášástâllâm – Raavâ väldikirjeluámáttuv tevdimân (pdf).

Muulsâiävtulávt tun puávtáh toohâđ väldikirje rijjâhámásávt. Rijjâhámásii väldikirjeest kalga leđe

tuárvi tiäđuh spesifisistiđ váldásmittee já váldásmittum ulmuu tâi ulmuid
tiätu tast, moid aššijd váldásmittem kuáská
tiätu tast, uážžu-uv váldásmittum ulmui adeliđ aašij hoittám várás váldásmittest tiäđuid, maid kalga toollâđ syeligâsâst (love puáhtá adeliđ om. hiätutiäđui já eres tiäđui, moh kyeskih ekonomâlii sajattâhân tâi tiervâsvuotâtilán, addelmân)
vyeimistorroomäigi (tuáistáážân tâi meriääigi)
peivim sehe váldásmittee vuáláčaalâ já noomâ čielgâsmittem.

Návt tun toimâttah väldikirje Kelan

Tun puávtáh toimâttiđ väldikirje MuuKelast, poostâ peht tâi palvâlemsajan. Váldásmittum olmooš puáhtá toimâttiđ väldikirje poostâ peht tâi palvâlemsajan. Váldásmittum ij kuittâg paste vuolgâttiđ väldikirje tuu peeleest MuuKelast.

Návt tun toimâttah väldikirje MuuKelast:

Teevdi luámáttuv Väldikirje – Hiätuaašij hoittám Kelast VAL 3smn (pdf) tâi čääli rijjâhámásâš väldikirje.
Vuorkkii väldikirje jieijâd tiäturân/puhelimân teikâ vääldi tast čuovâkove.
Vuolgât väldikirje lahtosin.
- Valjii Vuolgât lahtos - Eres Kela-ääših - Eres lahtoseh já Väldikirje. Lahte jieijâd väldikirje já teddil Vuolgât.

Väldikirje ij taarbâš vuáláčäälliđ, jis tun vuolgâttah tom MuuKelast jieijâd tubdâlduvâiguin.

Tun puávtáh kuás peri mutteđ väldikirje vyeimistorroomääigi teikâ keessiđ maasâd adelum váldásmittem. Tun jieh taarbâš muštâliđ suujâ toos, mane tun kiäsáh väldikirje maasâd. Almoot maasâdkesimist MuuKelast viestáin, poostâ peht tâi suáittimáin mii puhelinpalvâlusân.

Návt tun váldásmitáh Suomi.fi-váldásmitmáin

Jis tun halijdah adeliđ nube ulmui vääldi hoittáđ Kela-aašijd tuu peeleest MuuKelast, te adde sunjin Suomi.fi-váldásmittem, mon nommâ lii Sosiaaliturvan etuusasioiden hoitaminen (Sosiaaltorvo hiätuaašij hoittám). Suomi.fi-váldásmittem kuáská puoh Kela-aššijd, ađai tom ij pyevti raijiđ tuš tiätuaššijd.

Suomi.fi-váldásmitmáin ij pyevti ášástâllâđ nube peeleest puhelimist, palvâlemsaajeest ige poostâ peht. Jis tun halijdah, ete nubbe olmooš puáhtá hoittáđ Kela-aašijd meid ovdâmerkkân puhelimist, tun koolgah adeliđ sunjin väldikirje.

Huámmáš, ete aaibâs puoh aašijd ij pyevti vala hoittáđ MuuKelast nube peeleest.

Návt tun adelah Suomi.fi-váldásmittem Kela-aašij hoittám várás nube ulmui

Tun puávtáh adeliđ nube ulmui váldásmittem älkkeemus vuovvijn jiešráđálávt Suomi.fi-nettipalvâlusâst. Váldásmittem addelmân láá meid eres muulsâiävtuh. Taan siijđon láá nurrum ravvuuh sierâlágán muulsâiävtuin.

Ko tun halijdah adeliđ váldásmittem nube ulmui Suomi.fi-nettipalvâlusâst

Jis tust láá šleđgâliih tubdâttâttâmniävvuh, tego paŋkkitubdâlduvah tâi moobiilnanodâs, te tun puávtáh adeliđ váldásmittem nube ulmui Suomi.fi-váldásmitmijn.

Tubdâttâd Suomi.fi- nettipalvâlusân (suomi.fi, suomâkielân).
Adde palvâlusâst ton ulmuu tiäđuid, kiäm tun halijdah váldásmittiđ hoittáđ aašijd tuu peeleest.
Valjii váldásmittem Sosiaaliturvan etuusasioiden hoitaminen (Sosiaaltorvo hiätuaašij hoittám) já miäruštâl toos vyeimistorroomääigi.
Täärhist tuu adelem tiäđuid já nonnii váldásmittem.

Lasetiäđuh váldásmittem addelmist: Adde ášástâllâmváldásmittem persovnin (suomi.fi, suomâkielân)

Tuu aldaolmooš puáhtá pivdeđ tust váldásmittem Suomi.fi-nettipalvâlusâst

Tuu aldaolmooš puáhtá pivdeđ váldásmittem tuu Kela-aašij hoittáámân Suomi.fi-nettipalvâlusâst. Váldásmittem nommâ lii Sosiaaliturvan etuusasioiden hoitaminen (Sosiaaltorvo hiätuaašij hoittám). Tun koolgah tuhhiittiđ tuu aldaulmuu pivdem, vâi tot muttoo vyeimist orroo váldásmitmin.

Tun puávtáh tuhhiittiđ váldásmittempivdem ovdâmerkkân Suomi.fi-nettipalvâlusâst tâi Digi- já viestâdemvirgáduv palvâlemsaajeest (DAV, suomâkielân).

Lasetiäđuh váldásmittempivdem tohâmist: Pivde ášástâllâmváldásmittem persovnin (suomi.fi, suomâkielân).

Adde váldásmittem nettipaŋkkitubdâlduvâittáá váldásmittemucâmuššáin

Jis tust ij lah šleđgâlâš tubdâttâttâmniävvu jiehke pyevti eelliđ tubdâttâtmin DAV palvâlemsaajeest, te tun puávtáh adeliđ váldásmittem váldásmittemucâmuššáin.

Váldásmittemucâmuš tun kaavnah neetist: Ucâmuššáin váldásmittem (suomi.fi, suomâkielân).

Tärhibeh ravvuuh láá muštâlum DAV nettipalvâlusâst: Návt tun váldásmitáh, jis jieh paste kevttiđ šleđgâlijd palvâlusâid (suomi.fi, suomâkielân).

Suomi.fi-váldásmittem lii vyeimist váldásmittem adelem ohtâvuođâst miäruštâllum ääigi. Tun puávtáh meid keessiđ maasâd ađai mitáttistiđ váldásmittem (suomâkielân) vyeimistorroomääigi kooskâ.