Mearrádusat ja reivvet oidnojit dál maiddái sámegielat áššiiddikšunbálvalusas
Kela mearrádusat ja reivvet leat dán rádjai oidnon áššehassii dušše suomagielat OmaKelas ja ruoŧagielat MittFPA:s. Dál dat oidnojit maiddái sámegielat MuKela- ja MuuKela-áššiiddikšunbálvalusas.
Kela mearrádusaid ja eará áššebáhpáriid lea dán rádjai sáhttán lohkat dušše suomagielat OmaKelas ja ruoŧagielat MittFPA:s. Dál áššebáhpárat oidnojit maiddái davvisámegielat MuKelas ja anáraš- ja nuortalašgielat MuuKelas.
Ođastus ii váikkut mearrádusaid ja eará áššebáhpáriid gillii, elege dat oidnojit dás ovddosge dainna gielain, mainna dat leat álgo álggos ráhkaduvvon.
Ná mii sáddet mearrádusaid ja reivviid
Oaččut Kela mearrádusaid ja eará áššebáhpáriid álo vuos suomagillii dahje ruoŧagillii dan mielde, goabbá dutnje lea merkejuvvon álbmotdiehtovuogádahkii áššiiddikšungiellan. Mii sáddet mearrádusaid ja reivviid elektrovnnalaččat MuKelai, jos geavahat MuKela ja leat almmuhan midjiide iežat šleađgapoastačujuhusa dahje telefonnummira. Oaččut almmuhusa, go MuKelas lea ođđa poasta. Jos it geavat MuKela, oaččut mearrádusaid ja reivviid báberpoastan ruoktot.
Jos geavahat MuKela, muhto háliidat mearrádusaid ja reivviid ain maiddái báberpoastan, sáhtát rievdadit doaimmahanvuogi suomagielat OmaKelas čuoggás Päivitä omia tietojasi (Beaivit iežat dieđuidat). Sáhtát maiddái riŋget Kela áššehasbálvalussii ja bivdit, ahte oaččut mearrádusaid ja reivviid ain báberpoastan ruoktot. Dihto dáhpáhusain oaččut áššebáhpáriid báberpoastan ruoktot fuolakeahttá das, geavahatgo MuKela vai it.
Ná mii sáddet sámegielat jorgalusa du áššebáhpáriin
Jos leat ohcan ovddu sámegielat ohcanskoviin, dikšon áššiid Kelas sámegillii dahje bivdán Kelas sámegielat jorgalusa, oaččut du guoski mearrádusain ja eará áššebáhpáriin sámegielat jorgalusaid. Áššebábir jorgaluvvo das maŋŋá, go leat vuos ožžon áššebáhpára suomagillii dahje ruoŧagillii.
Sáddet sámegielat áššebáberjorgalusaid álo báberpoastan. Jorgalusat eai vel doaisttážii oidno MuKelas dahje dan earágielat veršuvnnain.
Jos it leat ožžon mearrádusas dahje áššebáhpáris sámegielat jorgalusa, muhto háliidat oažžut dakkára, sádde midjiide dieđu MuKela bokte dahje váldde oktavuođa Kela áššehasbálvalussii.
Ná mii almmuhit ođđa mearrádusas
Oaččut almmuhusa MuKelai boahtán mearrádusas dahje reivves Suomi.fi-poastta bokte: du šleađgapostii boahtá almmuhus, go MuKelas lea ođđa mearrádus dahje reive lohkan láhkai. Jos leat luđen Suomi.fi-áppa telefovdnii, oaččut almmuhusa maiddái dan bokte. Jos dus ii leat Suomi.fi-poasttat geavahusas, oaččut Kelas almmuhusa šleađgapoasttain dahje teakstasániin.
Aitosaš mearrádusaid ja eará áššebáhpáriid sáhtát lohkat MuKelas čuoggás Mearrádusat ja eará áššebáhpárat.
Suomi.fi-poasttat leat Digi- ja álbmotdiehtovuogádaga bálvalus. Bálvalusas sáhtát lohkat poasttaid, maid virgeoapmahaččat leat sádden dutnje. Poasttaid sáhtát lohkat juogo Suomi.fi-mobiilaáppas dahje čujuhusas www.suomi.fi/viestit.
Loga lasi
Sáhtát dál sáddet Kelai maiddái sámegielat poastta (kela.fi)
Mii lea Suomi.fi-dieđut? -dieđáhus sámegillii (dvv.fi)