Sáhtát dál sáddet Kelai maiddái sámegielat dieđu
Kela lea váldán atnui sátnebálvalusa maiddái sámegielat áššiiddikšunbálvalusas. Dárbbašat sámegielat dieđu sáddemii sámegielat boallobeavddi.
Persovnnalaš Kela-áššiid ii sáhte dikšut e-poasttain, daningo dat ii leat diehtodorvvolaš. Dieđuid sádden ja vuostáiváldin MuKelas fas lea diehtodorvvolaš. Kela lea dál váldán atnui sátnebálvalusa maiddái sámegielat OmaKela veršuvnnas.
Dieđuin sáhtát jearrat iežat doarjjaáššiid birra, oažžut bagadusa áššiin, mat eai leat hohpolaččat ja sáddet lassedieđuid. Sáhtát maiddái sáddet dieđu, go divššot áššiid nuppi olbmo beales.
Du diehtu manná Kela sámegielat bálvalussii. Fuobmá, ahte dieđuide vástideapmi sáhttá váldit áiggi.
Jos du ášši lea hohpolaš, váldde oktavuođa Kela telefonbálvalussii dahje bivdde, ahte Kelas riŋgejuvvo dutnje ruovttoluotta. Sáhtát guođđit oktavuođaváldinbivdaga e-poasttain čujuhussii saame@kela.fi. Čále e-postii iežat nama ja telefonnummira, vai Kelas sáhttet váldit dutnje oktavuođa. Ale sádde e-poasttain eará persovdnadieđuid dahje áššiid dikšumii gullevaš dieđuid.
Kela dárbbaša lobi dieđuid sáddemii
Kela ii sáhte sáddet dutnje iešráđálaččat dieđuid MuKelas du lobi haga. Lobi dieđuid sáddemii sáhttá addit OmaKelas.
Lobi sáhttá doaisttážii addit dušše suoma- dahje ruoŧagielat OmaKelas. Čálit iežat sisa OmaKelai ja sirdás siidui Päivitä omia tietojasi (Beaivit iežat dieđuid). Sirdás oassái Omat tiedot (Iežan dieđut) ja vállje Viestit OmaKelaan (Dieđut MuKelai). Vástit ”kyllä” (juo) gažaldahkii ”Saako Kela lähettää sinulle viestejä OmaKelaan (Oažžugo Kela sáddet dutnje dieđuid MuKelai)?” Vállje vel, háliidatgo almmuhusaid ođđa dieđuin e-postii vai teakstadieđuin.
Molssaevttolaččat sáhtát addit lobi dieđuid sáddemii go riŋget telefonbálvalussii.
Ná sáddet dieđu MuKelas
Čálit MuKelai álo dorvvolaččat čujuhusas kela.fi. Sámegielat áššiiddikšunbálvalussii lea njuolga liŋka sámegielat kela.fi-siidduid olgeš badječiegas.
Gávnnat dieđuid MuKela fálu oasis Sádde ja loga dieđuid dahje ovdasiiddu oasis Njulgenbálgát. Sáhtát čállit ođđa dieđu oasis Sádde ođđa dieđu. Vállje ovddu, masa du diehtu gullá, ja dan maŋŋá vel dárkkálmuhttima
Oainnát dieđuid, maid leat ožžon Kelas, seamma siiddus, oasis Sáddejuvvon ja boahtán dieđut.
Dárbbašat sámegielat boallobeavddi
Go háliidat sáddet Kelai sámegielat dieđu, dárbbašat dan čállimii sámegielat boallobeavdestivrrana. Jos dus ii leat vel dakkár, sáhtát bidjat dan ieš du rusttegii.
Gávnnat rávvagiid ja veahkkeneavvuid sámegielat boallobeavdestivrraniid ja geavuslohkanprográmmaid bidjamii čujuhusas divvun.no ja borealium.org.