Jõs siirdčõõđak Lääʹddjânnmest ålggjânnmid | Nuõrttsääʹmǩiõll | KelaSirddu siiskõʹsse

Jõs siirdčõõđak Lääʹddjânnmest ålggjânnmid

Jõs vuäǯǯääk koon-ne Kela tuärjjõõzz da siirdčõõđak ålggjânnmid, iʹlmmet siirdčõõttmest Kelaaʹje.

Iʹlmmet še Kelaaʹje, jõs jieʹllmad mottai, ko leäk ålggjânnmin.

Muuttâs vuäitt leeʹd ouddmiârkkân

  • mättʼtõõttmõõžž alttummuš leʹbe jõskkmõš
  • reâuggmõõžž alttummuš leʹbe jõskkmõš
  • muuttâs piârkõskkvuõđinad, mâʹte rätkkjummuš pieʹllkueiʹmest leʹbe siirdčõõttmõš jälsted pieʹllkuõiʹmin.

Kõskkpoddsaž avi põõšši siirdčõõttmõš?

Vuõiggâdvuõttad Kela tuärjjõõzzid tuʹmmeet takainalla tõn vuâđald, mõõn kuuʹǩǩ ääiǥak leeʹd ålggjânnmin. Jõs ääiǥak leeʹd ålggjânnmin vuâlla 6 määnpââʹj, tuʹst lij takainalla vuõiggâdvuõtt Kela mäʹhssem jeältõõǥǥid, päärnažlâssa, jeäʹnnveäʹǩǩvuõʹtte da päʹrnnpiârri jeeʹres tuärjjõõzzid.

Jõs siirdčõõđak ålggjânnmid põõššjen, jiõk vueiʹt takainalla teänab vuäǯǯad Kela tuärjjõõzzid. Siirdčõõttmõõžž ââʹnet põõššjen, jõs tuu mieʹrren lij jälsted ålggjânnmin pâʹjjel 6 määnpââʹj. Teʹl vuõiggâdvuõttad Kela tuärjjõõzzid takainalla poott tâʹlles, ko siirdčõõđak meädda Lääʹddjânnmest.

6 määnpââʹj äiʹǧǧraaj vueiʹtet šiõttõõllâd, jõs siirdčõõđak kõskkpoddsânji Lääʹddjânnmest EU-jânnma, Etv-jânnma, Sveiʹccjânnma leʹbe Jõnn-Britannian. Ouddmiârkkân mättʼtõõttjin da tuâjjuʹvddi vuõltteem tuâjjlain vuäitt še leeʹd vuõiggâdvuõtt Kela tuärjjõõzzid, håʹt sij leʹčče ålggjânnmin pâʹjjel 6 määnpââʹj.

Ko siirdčõõđak jeeʹres jânnma, seʹlvvet, vuäitak-a vuäǯǯad tuärjjõõzzid ođđ jälstemjânnmastad.

Vueʹss eeʹjjest ålggjânnmin

Jõs jälstak ålggjânnmin mieʹrrkõõski pâʹjjel peäʹl eeʹjjest, tuʹst ij takainalla leäkku vuõiggâdvuõtt Kela tuärjjõõzzid. Äiʹǧǧraaj vueiʹtet šiõttõõllâd, jõs jälstak vueʹzz eeʹjjest koon-ne EU-jânnmest, Etv-jânnmest, Sveiʹccjânnmest leʹbe Jõnn-Britanniast.

Looǥǥ lââʹzz

Seidd peeiʹvtum 16.2.2024

Mõõnn miõl leäk seeidast?