Vuõiggâdvuõtt Kela tuärjjõõzzid ålggjânnmin | Nuõrttsääʹmǩiõll | KelaSirddu siiskõʹsse

Vuõiggâdvuõtt Kela tuärjjõõzzid ålggjânnmin

Jõs tuʹst lij vuõiggâdvuõtt Lääʹddjânnam sosiaalstaaʹne, vuäitak vuäǯǯad takainalla seämma tuärjjõõzzid, koid vuäǯǯčiǩ Lääʹddjânnmest. Ålggjânnmid vueiʹtet mäʹhssed ouddmiârkkân päärnažlââʹzz, jeäʹnnveäʹǩǩvuõđ da jeeʹres päʹrnnpiârrji tuärjjõõzzid.

Pukid Kela tuärjjõõzzid jeät kuuitâǥ mahssu ålggjânnmid.

Jeältõõǥǥi mäʹhssem ålggjânnmid

Jõs vuäǯǯak jeältõõǥǥ da siirdčõõđak põõššjen ålggjânnmid, Kela mähss tuʹnne narodjeältõõǥǥ da piârjeältõõǥǥ jäänmõsân eeʹjj ääiʹj siirdčõõttmest.

EU-jânnmid, Etv-jânnmid, Sveiʹccjânnma, Jõnn-Britanniaaʹje leʹbe sosiaalstaansuåppmõšjânnmid siirdčõõttjid Kela mähss jeältõõǥǥ kuuitâǥ takainalla kuuʹǩǩab ääiʹj.

Reâuggpââʹstʼteʹmesvuõttjeältõõǥǥ määuʹset tåʹlǩ EU-jânnmid, Etv-jânnmid da Sveiʹccjânnma. Jõs vuäǯǯak reâuggpââʹstʼteʹmesvuõttjeältõõǥǥ da ääiǥak siirdčõõttâd jeeʹres päikka, vääʹld ooudbeäʹlnn siirdčõõttmõõžž õhttvuõđ Kelaaʹje. Kela seʹlvvad, lij-a tuʹst vuõiggâdvuõtt jeältõʹǩǩe.

Staanjeältõõǥǥ jeät mahssu, jõs siirdčõõđak põõššjen ålggjânnmid.

Tuâjj-jeältõõǥǥi nårrjummšest da mäʹhssmest ålggjânnmid vuäǯǯak lââʹssteâđ Jeältõkstaankõõskõõzzâst (etk.fi, lääddas).

Ouddmiârkk: Õhttõõvvâmvaaʹldid mättʼtõõttâd

Heʹlssen universiteeʹttest mättʼtõõtti Väʹsǩǩ vuâlgg serddmättʼtõõttjen Õhttõõvvâmvaaʹldid 9 määnpââjas. Ko Väʹsǩǩ lij mättʼtõõtti, suʹst lij vuõiggâdvuõtt Kela tuärjjõõzzid. Väʹlddtåimmsaž mättʼtõõtti vuäitt vuäǯǯad Kela tuärjjõõzzid še pâʹjjel 6 määnpââʹj ålggjânnmest mättʼtõõttmõõžž ääiʹj.

Ouddmiârkk: Saujj-Afriʹǩǩe tuõjju

Eʹll serdd 5 määnpââjas tuõjju Saujj-Afriʹǩǩe. Suu piâr serdd mieʹldd. Eeʹllest da suu piârrjest seill vuõiggâdvuõtt Kela tuärjjõõzzid, ko åårummuš ålggjânnmest peštt vuâlla 6 määnpââʹj. Seeʹst lij vuõiggâdvuõtt Kela tuärjjõõzzid, koid vueiʹtet mäʹhssed ålggjânnma. Ålggjânnma jie määuʹs ouddmiârkkân takai jälstemtuärjjõõzz leʹbe päärnai dommhååid tuärjjõõzz.

Jõs Eeʹll piâr siirdčõõđče põõššjen Saujj-Afriʹǩǩe, sij vuõiggâdvuõtt Lääʹddjânnam sosiaalstaaʹne puuđče siirdčõõttâmpoʹdde.

Euroopplaž puõccihåiddkortt

Vuäitak tiʹllʼjed Kelast euroopplaž puõccihåiddkoort. Kortt lij määustem. Ko tuʹst lij kortt, vuäǯǯak hååid kroota puâccjummša EU-jânnmest, Etv-jânnmest, Sveiʹccjânnmest da Jõnn-Britanniast seämma hõõʹddin ko pääiklaž oummu.

Vuäitak tiʹllʼjed koort neeʹttest. Neeʹttest vuäitak tiʹllʼjed koort tuu päärnže še.

Vuäitak še tiʹllʼjed koort kääzzkõsnââmrest 020 692 204.

Seidd peeiʹvtum 16.2.2024

Mõõnn miõl leäk seeidast?