Mäʹhtt puåtti vaaikte jälstemtuärjjõʹsse? | Nuõrttsääʹmǩiõll | KelaSirddu siiskõʹsse

Mäʹhtt puåtti vaaikte jälstemtuärjjõʹsse?

Vuâđđjiõččvasttõs

Ouddâl ko loopplaž jälstemtuärjjõs lij seʹlvv, jälstemkoolain ǩieʹppeet vuâđđjiõččvasttõõzz.

Vuâđđjiõččvasttõõzz meärra vaaikte

  • vuõrâsoummi da päärnai lååkkmieʹrr poorrâmkååʹddest
  • poorrâmkååʹdd bruttopuåtti määnpââʹjest.

Bruttopuåtti lie puåtti, koin jie leäkku valddum meädda piiđ.

Mõõn šuurab puåtti lie, tõn šuurab lij vuâđđjiõččvasttõs. Jõs puåtti lie samai occka, vuâđđjiõččvasttõs ij leäkku ni vooʹps.

Puåtti

Jälstemtuärjjõõzz meärra vaaikte

  • tiânnâz (ouddmiârkkân päʹlǩǩpuåđ, koʹst lij tuejjuum tiânâsǩeäʹppõs)
  • kapitaalpuåtti (ouddmiârkkân vuåkrrpuåtti da teäʹǧǧruõkkmi koorǥ)
  • määŋg tuärjjõõzz (ouddmiârkkân reâuggmarkkântuärjjõs, mätt-teäʹǧǧ, jeältõõǥǥ da puõʒʒâlmpeiʹvvteäʹǧǧ).

Jälstemtuärjjõõzz meärra jie vaaikât

  • tiõttum tuärjjõõzz (ouddmiârkkân piʹrǧǧeemtuärjjõs, päärnažlââʹss, mätt-tieʹǧǧ huõlteeipââjõs leʹbe roodnairuåtthååid tuärjjõs)
  • mättläinn
  • poorrâmkååʹdd vueʹllâkksaž päärna puåtti
  • sättʼtõõǥǥvärrsa puåtti (ouddmiârkkân äʹrbb leʹbe sǩiâŋkk).

Tuʹst feʹrttai iʹlmmted puk puåttjääd jälstemtuärjjõsooccmõõžžâst.

Kela vuäǯǯ teâđaid mahssum paaʹlǩin še puåđrekisteeʹrest.

Muuʹšt iʹlmmted Kelaaʹje, jõs puåttjad lâssne leʹbe ǩeäppne.

Tiânâsǩeäʹppõs

Tiânâsǩeäʹppõõzzin juuʹrdet tõn, što juõʹǩǩ poorrâmkååʹdd vuäzzla õʹhttelaʹsǩǩuum tiânnsin ǩieʹppeet 300 euʹrred määnpââʹjest. Kela ij âʹte vääʹld tän suum lokku, ko tõt laʹsǩǩad jälstemtuärjjõʹsse vaaikteei puåttji meäʹr.

Tiânâsǩeäʹppõõzz vueiʹtet tuejjeed päʹlǩǩpuåttjest, jieʹllemvueʹǩǩtoiʹmmjummuž puåttjest da mäddtääl puåttjest.

Tiânâsǩieʹppummuž jeäʹt tuejjuku teänab 1.4.2024 ääʹljeeʹl, ko lääʹǩǩ mottai. Mâŋŋa tõʹst puk puåtti vaaikte jälstemtuärjjõʹsse.

Looǥǥ lââʹzz tä'st, mäʹhtt puåtti vaaikte jälstemtuärjjõʹsse (lääddas).

Mäʹhtt tuärjjõõzz meäʹr laʹsǩǩeet?

Jälstemtuärjjõõzz meäʹr laʹsǩǩeet nääiʹt:
Jälstemkoolain ǩieʹppeet vuõššân vuâđđjiõččvasttõõzz. Jälstemtuärjjõs lij 80 proseeʹnt suumâst, kååʹtt pääcc.

1.4.2024 ääʹljeeʹl jälstemtuärjjõs lij 70 proseʹntted suumâst.

Vuäitak ärvvtõõllâd laʹsǩǩeem-mašina veäkka, mâʹmmet vuäǯǯak jälstemtuärjjõõzz (lääddas).

Ouddmiârkk

Õuddimiârki euʹrrmeäʹr lie viõǥǥâst 1.4.2024 ääʹljeeʹl.

Jääkk jäälast õhttu vuåkrrazlmest Turku-gåårdest. Aazzâlm vuåkrr lij 700 euʹrred määnpââʹjest. Jakku puåttjen lij mätt-tieʹǧǧ, mii lij 279,38 euʹrred määnpââʹjest. Ko Jakku puåtti lie occka, vuâđđjiõččvasttõs ij leäkku.

Jakku jälstemkoollan vueiʹtet priimmâd jäänmõsân 447 euʹrred määnpââʹjest. Jälstemtuärjjõõzz meäʹr laʹsǩǩeet jäänmõsjälstemkoolai mieʹldd. Tõn jeät laʹsǩǩuku Jakku vuåkr leʹbe 700 eeuʹr vuâđald.

Jakku jälstemtuärjjõs lij 70 proseeʹnt jäänmõsjälstemkoolain leʹbe 447 euʹrred x 0 ,70 = 312,90 euʹrred määnpââʹjest.

Jääkk mähss jälstummšest jiõčč 387,10 euʹrred määnpââʹjest (700 euʹrred – 312 ,90 euʹrred = 387 ,10 euʹrred).

Seidd peeiʹvtum 22.2.2024

Mõõnn miõl leäk seeidast?