Keesi puáhtá nubástusâid Kela palvâlemsoojij ávusorroomaigijd
Keessiv-uv Kela-aašijd kannat hoittáđ OmaKelast tâi suáittiđ puhelinpalvâlusân. Maaŋgâin Kela-palvâlemsoojijn ávusorroomääigih muttojeh keesi ááigán, já uđđâ ávusorroomaigijd sirdâšuveh 29.5.2023 rääjist.
Tun puávtáh hoittáđ Kela-aašijd iänááš neetist: uuccâđ hiäđuid, tärhistiđ miärádâs, uáiniđ kuás hiätu máksoo, toimâttiđ lahtosijd já vuolgâttiđ Kelan viestâid. Kela nettisiijđoin chatrooboot rävvee aašijn, moh lohtâseh áigápuátutorjui, almos aassâmtorjui, uáppei torjuid sehe peerâhiäđoid. Kela palvâl äššigâsâid meid Facebookist já Instagramist.
Jis jieččân áášán ij kavnuu vástádâs neetist, te tun puávtáh suáittiđ Kela puhelinpalvâlusân. Puhelinpalvâlus lii keessiv-uv ávus vuossaargâst vástuppiäiván tme 9–16. Puhelimist tun puávtáh hoittáđ siämmáid persovnlijd aašijd ko palvâlemsaajeest-uv. Palvâlemnumereh láá sierrejum eellimtiilij mield. Jis tun jieh kaavnâ hiäivulii nummeer, te tun puávtáh suáittiđ mon peri numerân.
Puhelinpalvâlusân puáhtá meid väridiđ ääigi, kuás Kelast suáittih äššigâsân. Puhelinääigi puáhtá väridiđ neetist tâi suáittiđ mon peri palvâlemnumerân.
Sämikielâliih palvâlusah keessiv
Kela tavesämikielâlâš puhelin- já káiduspalvâlem lii ávus oles keesi argâpeeivij tme 9–11 numerist 020 634 2894. Kela nuorttâlâškielâlâš puhelin- já káiduspalvâlem lii ávus argâpeeivij tme 9–11 numerist 020 634 4795 (kiddâ 10.7.–4.8.). Sämikielâliih äššigâsah pyehtih kyeđđiđ meid ohtâvuođâväldimtáttum šleđgâpoostân čujottâsân saame@kela.fi. Anarâškielân palvâlem finnee tuulhâ peht. Tun kaavnah lasetiäđu Kela sämikielâlijn palvâlusâin čujottâsâst www.kela.fi/saame.
Palvâlemsoojij ávusorroomaaigijn nubástusah 29.5.2023 rääjist
Maaŋgâin Kela palvâlemsoojijn ávusorroomääigih muttojeh keesi ááigán. Kesiávusoromeh puátih vuáimán 29.5.2023 rääjist já noheh majemustáá 30.9.2023.
Stuárráábij kaavpugij kuávdái palvâlemsajeh láá ávus normaallávt tâi masa normaallávt. Ucebij palvâlemsoojij uásild nubástusah láá eenâb. Palvâlemsaje ávusorroomtiäduid kannat tärhistiđ suomi.fist.
Maht mun hoittáám jieččân Kela-aašijd, jis tot ij luhostuu neetist ige puhelimist já aldemus palvâlemsaje lii kiddâ?
Maaŋgâin päikkikuudijn lii virgeomâhái ohtsâš ášástâllâmsaje, mast rävvejeh almolii tääsist Kela-aašijn. Kela-aašijn finnee ravvim meid ovdâmerkkân Ohjaamoin, Lähitorijn já palvâlemkuávdáin. Toos lasseen maaŋgâin päikkikuudijn lii Kela káiduspalvâlus, ađai tiättur, mon peht tun finniih Kela äššitobdei kove- já jienâohtâvuođâ. Káiduspalvâlus västid palvâlem Kela jieijâs palvâlemsaajeest. Tun puávtáh tärhistiđ suomi.fist, ete kost lii aldemus saje, kost finnee Kela káiduspalvâlem.
Tun puávtáh meid väldiđ ohtâvuođâ jieijâd päikkikieldâ sosiaalpalvâlussáid, vádulâšpalvâlussáid tâi tiervâsvuođâhuolâttâsân, kost pyehtih išediđ tuu ovdâmerkkân puhelinääigi väärridmist. Ko tunjin väriduvvoo puhelinäigi, te Kela äššitobdee suáittá tunjin soppum ääigi, ige suáittu määvsi maiden.
Päävirpoostâ kannat vuolgâttiđ Kelan čujottâsân Kela, PL 10, 00056 Kela.
Palvâlemsoojij ávusorroomääigih 29.5.2023 rääjist (suomâkielân)