Kela doarjagat bargguheapmái | Davvisámegiella | KelaMana sisdollui

Kela doarjagat bargguhis olbmui

Bargguhisvuohta unnuda sisaboađuid. Sáhtát oažžut bargguhisvuođadoarjaga Kelas, jos dus ii leat bargosadji itge oaččo bargguhisvuođadoarjaga eará sajis.

Kela doarjagat bargguhisvuođa áigge leat

  • bargguhisvuođabeaiveruhta
  • bargomárkandoarjja.

Kela máksá bargguhisvuođadoarjaga olbmuide, geat ásset Suomas fásta. Sin lassin bargguhisvuođadoarjja máksojuvvo EU-riikkain boahtán olbmuide, geat leat maŋimužžan bargan Suomas.

Dárkkis maiddái, sáhtátgo oažžut eará Kela doarjagiid, ovdamearkka dihte ássandoarjaga.

Jos bázat bargguheapmin

Jos bázat bargguheapmin, almmut iežat dakkaviđe bargguhis bargguohccin bargo- ja ealáhusdoaimmahahkii dahjege BE-doaimmahahkii.

Bargguhisvuođaovdu máksojuvvo dušše áiggis, go leat bargguohccin BE-doaimmahagas. BE-doaimmahat maiddái addá Kelai cealkámuša das, sáhttágo dutnje máksit doarjaga.

Bargguhisvuođa áigge dus lea geatnegasvuohta ohcat aktiivvalaččat barggu. Fertet maiddái váldit vuostá fállojuvvon barggu dahje skuvlema. Das ii sáhte biehttalit almmá siva haga, muđuid sáhttá massit doarjagiid.

Muitte doallat bargguohcama fámus. Dan sáhttá dahkat BE-doaimmahaga neahttasiidduin: BE-bálvalusaid áššiiddikšunbálvalusas (tyomarkkinatori.fi, suomagillii).

Barggolašvuođa gieldaiskkadeapmi

Oassi bargguhis bargoohcciin searvá barggolašvuođa gieldaiskkadeapmái. Gieldaiskkadeamis ruoktogielda veahkeha gávdnat barggu dahje skuvlejumi. Go leat almmuhan iežat bargoohccin, oaččut dieđu dikšugo du áššiid ruoktogielda vai BE-doaimmahat.

Nuppástusdorvoruhta badjel 55-jahkásažžii

Nuppástusdorvoruhta lea doarjja, man sáhtát oažžut Kelas dahje bargguhisvuođakássas, jos don leat eret celkon barggustat. Lea dárkkuhus, ahte nuppástusdorvoruhta álkidahttá ođđa bargosaji gávdnama. Dan mearri lea seammá go sullii ovtta mánotbaji bálká.

Sáhtát oažžut nuppástusdorvoruđa, jos buot dát eavttut ollašuvvet:

  • Leat deavdán 55 jagi.
  • Du leat eret cealkán bargosajis buvttaduslaš ja ekonomalaš sivaid geažil.
  • Leat bargan seammá bargosajis uhcimustá 5 jagi.

Jos gulat bargguhisvuođakássii, oza nuppástusdorvoruđa iežat bargguhisvuođakássas. Jos it gula bargguhisvuođakássii, oza nuppástusdorvoruđa Kelas.

Bargguhisvuođaáiggi almmuhus

Jos bargguhisvuohta joatkašuvvá, galggat doaimmahit Kelai 4 vahku gaskkaid bargguhisvuođaáigái guoskevaš almmuhusa. Kela máksá dutnje doarjaga almmuhusa vuođul.

Bárgguhisvuođaáigge almmuhusa sáhttá dahkat neahtas dahje skoviin, man sáhttá čálihit Kela neahttasiidduin dahje viežžat Kela doaimmahagain.

Merke almmuhussii, guđe beivviid leat leamašan bargguheapmin ja guđe beivviid leat oassálastán BE-doaimmahagain sohppojuvvon doaimmaide.

Jos leat bargguhisvuođa áigge leamašan soaittáhagas barggus, merke almmuhussii, guđe beivviid leat leamašan barggus.

Loga lasi

Maid jurddašat siiddu birra?