Bargguhis olbmo doarjagat
Bargguhisvuohta unnuda sisaboađuid. Dáid siidduin muitaluvvo, man ruđalaš doarjaga sáhtát oažžut Kelas, jos dus ii leat bargosadji.
Kela doarjja bargguhisvuođa áigái lea almmolašdoarjja. Almmolašdoarjja lea boahtán bargomárkandoarjaga ja vuođđobeaiveruđa sadjái. Kela ii mávsse bargomárkandoarjaga iige vuođđobeaiveruđa šat miessemánu 2026 rájes.
Jos bázat bargguheapmin
Jos bázát bargguheapmen, almmut dalán bargguhis bargoohccin barggolašvuođabálvalusaide Työmarkkinatori-siidduin (tyomarkkinatori.fi, suomagillii).
Sáhtát oažžut bargguhisvuođadoarjaga dušše áigodagas, goas leat bargoohccin ruoktogielddat barggolašvuođabálvalusain. Barggolašvuođabálvalusat maiddái addet Kelai cealkámuša das, sáhttágo dutnje máksit doarjaga.
Bargguhisvuođa áigge dus lea geatnegasvuohta ohcat aktiivvalaččat barggu. Don galggat maiddái vuostáiváldit fállojuvvon barggu dahje skuvlema. Jos das biehttala almmá siva haga, sáhttá manahit doarjagiid.
Muitte doallat bargoohcama fámus. Oaččut dasa dárkilut rávvagiid barggolašvuođabálvalusain.
Vulobeale govus čájeha, maid don galggat bargat, jos bázát bargguheapmin.
Goas válddát oktavuođa Kelai ja goas barggolašvuođabálvalusaide?
Váldde oktavuođa Kelai, jos dus leat jearaldagat doarjagiid birra, maid Kela máksá. Sáhtát riŋget bálvalannummirii 020 692 210.
Váldde oktavuođa barggolašvuođabálvalusaide, jos du jearaldat guoská
- dieđiheami bargoohccin
- bargoohcangeatnegasvuođa
- bargofápmopolitihkalaš cealkámuša
- bargguhisvuođadoarjaga karensa áiggi
- barggu oažžuma ovddideaddji bálvalusaid.
Don gávnnat iežat gieldda barggolašvuođabálvalusaid oktavuođadieđuid Työmarkkinatori.fi-guovlosiidduin (tyomarkkinatori.fi, suomagillii).
Sáhtát maid riŋget riikaviidosaš bargguhemiid rávvemii: 0295 020 701.