Vuäitak-a vuäǯǯad Kela tuärjjõõzzid, ǥu seerđak Lääʹddjânnma?
Tuärjjõõzzi määin lie jeeʹresnallšem tõn mieʹldd, seerdak-a Lääʹddjânnma
- tuâjjliʹžžen
- põõrǥâsneʹǩǩen
- vuõlttuum tuâjjliʹžžen
- piârri vuäzzliʹžžen
- mättʼtõõttjen
- jeältõkneʹǩǩen.
Jõs tuʹst lij Lääʹddjânnmest dommkåʹdd, vuäǯǯak hååid õõlmâs tiõrvâsvuõtthuâlast. Tuu hååidat tääuʹjmõsân jiijjad vuuʹd tiõrvâsvuõttsâjldõõǥǥâst. Jõs tuʹst ij leäkku dommkåʹdd, raauk Kela seʹlvvted, lij-a tuʹst vuõiggâdvuõtt õõlmâs tiõrvâsvuõđhuõllu.
Tuâjjla da põõrǥâsneeʹǩǩ tuärjjõõzz
Vuäitak vuäǯǯad koid-ne Kela tuärjjõõzzid, jõs leäk tuâjast Lääʹddjânnmest. Näkam tuärjjõõzz liâ ouddmiârkkân puõʒʒâlmpeiʹvvteäʹǧǧ da päärnažlââʹss.
Jõs tuejjääk tuâj Lääʹddjânnmest uuʹccmõsân 6 määnpââʹj, tuʹst vuäitt leeʹd vuõiggâdvuõtt koid-ne Kela tuärjjõõzzid veâl tuâj puuttmõõžž mâŋŋa.
Jõs leäk tuâjjlaž, tuʹst lij še vuõiggâdvuõtt tuâjjtiõrvâsvuõtthuâllu. Vuäǯǯak lââʹssteâđaid jiijjad tuâjjuʹvddjest.
Vuõlttuum tuâjjla
Vuõlttuum tuâjjla lie oummu, koid ålggjânnamneǩ tuâjjuʹvddi lij vuõlttääm tuõjju Lääʹddjânnma.
Jõs puäđak vuõlttuum tuâjjliʹžžen EU-jânnmest, Eta-jânnmest, Sveiʹccjânnmest leʹbe Jõnn-Britanniast, kuulak vueʹlǧǧemjânnmad sosiaalstaaʹne. Tâʹl tuʹst ij teänab leäkku vuõiggâdvuõtt Kela tuärjjõõzzid, Taarbšak A1-tuõđštõõzz vueʹlǧǧemjânnmastad.
Jos puäđak vuõlttuum tuâjjliʹžžen jânnmest, koin Lääʹddjânnmest lij sosiaalstaansuåppmõš, tääʹrǩest Kelast, vuäitak-a vuäǯǯad tuärjjõõzzid. Suåppmõõžž liâ jeeʹresnallšem jeeʹres jânnmivuiʹm.
Piârri vuäzzla
Jõs seerdak Lääʹddjânnma tuâjjla leʹbe mättʼtõõđi piârri vuäzzliʹžžen, tuʹst feʹrttai takainalla jälsted Lääʹddjânnmest põõššjen, što vuäitak vuäǯǯad Kela tuärjjõõzzid.
Mättʼtõõđi
Jõs seerdak Lääʹddjânnma jeeʹres ǥu EU-jânnmest, Eta-jânnmest, Sveiʹccjânnmest leʹbe Jõnn-Britanniast tåʹlǩ mättʼtõõttmõõžž diõtt, vuäitak vuäǯǯad koid-ne Kela tuärjjõõzzid, mâta puõʒʒâlmpeiʹvvtieʹǧǧ leʹbe puärrsipeiʹvvtieʹǧǧ. Määtt feʹrttje peʹštted uuʹccmõsân 2 eeʹjj.
EU-jânnmin pueʹtti mättʼtõõđi jie takainalla vuäǯǯ Kela tuärjjõõzzid. Tuʹst vuäitt leeʹd vuõiggâdvuõtt Kela tuärjjõõzzid, jõs mättʼtõõttmõõžž lââʹssen reâuǥak Lääʹddjânnmest. Jiõk kuuitâǥ takainalla vueiʹt vuäǯǯad mätt-tuärjjõõzz Lääʹddjânnmest.
Jõs spraavak õllškooultuʹtǩǩõõzz, vuäǯǯak tiõrvâsvuõtthååid Pâʹjjmättʼtõõttji tiõrvâsvuõtthåiddfoondâst (YTHS).
Jeältõkneeʹǩǩ
Jõs seerdak Lääʹddjânnma jeältõkneʹǩǩen, ton õõlǥak jeälsted Lääʹddjânnmest põõššjen, što vuäitak vuäǯǯad Kela tuärjjõõzzid.
Koon rääʹjest vueʹljeeʹl vuäitak vuäǯǯad Kela tuärjjõõzzid?
Vuäitak vuäǯǯad Kela tuärjjõõzzid takainalla tõn peeiʹvest vueʹljeeʹl, ǥu seerdak Lääʹddjânnma leʹbe alttääk tuâj Lääʹddjânnmest.
Måtam tuärjjõõzzid määuʹset kuuitâǥ tåʹlǩ tõid, kook lie jälstam Lääʹddjânnmest tiõttum ääiʹj ouddâl tuärjjõõzz miõttmõõžž.
Näkam tuärjjõõzz lie ouddmiârkkân
- Kela jeältõõǥǥ
- pâʹjjel 16-ekksa lääʹmesvuõtt-tuärjjõs.
Måtmi tuärjjõõzzi miõttmõõžžâst Kela väldd lokku aaiʹjid, kuäʹss leäk jeälstam leʹbe reâuggam nuuʹbb EU-jânnmest, Eta-jânnmest, Sveiʹccjânnmest leʹbe Jõnn-Britanniast.
Tääʹrǩest Kelast, kuäʹss vuäitak vuäǯǯad Kela tuärjjõõzz. Kõõjj lââʹzz kääzzkâʹsttemnââmrest 020 634 0200.