Sáhtát go oažžut Kela doarjagiid olgoriikkaide?
Dán siiddus
Dát áššit váikkuhit dasa, sáhtátgo oažžut doarjaga Kelas:
- olgoriikkaide vuolgimat sivva
- riika, gosa manat
- áigi, man guhká leat olgoriikkain.
Oza iežat dili ja loga maid gánneha váldit vuhtii, go fárret olgoriikkaide.
Vuolggátgo olgoriikkaide bargin dahje bargoohccin?
Bargiin oaivvildit olbmo, guhte vuolgá olgoriikkaide bargat.
Loga eanet
- jos du suopmelaš bargoaddi sádde du bargogohččumii olgoriikkaide
- jos vuolggát olgoriikkaide gáiddusbargui
- jos barggat fitnodatdoallin olgoriikkain.
Sáhtátgo oažžut Kela doarjagiid?
Jus barggat eará EU- dahje Edg-riikkas, Sveiccas dahje Stuorra-Británnias, dus lea dábálaččat vuoigatvuohta iežat barganriikka sosiáladorvui fuolatkeahttá das man guhká barggat dahje das, man riikkas orut. Dalle it dábálaččat sáhte oažžut Kela doarjagiid.
Gulat dan riika sosiáladorvui gos barggat, jus du bargu deavdá ovdamearkka dihte bargoáiggi ja bálkká guoski unnimuseavttuid. Eavttut leat riikka mielde. Dus leat dábálaččat seamma vuoigatvuođat sosiáladorvui ja doarjagiidda go du barganriikka riikkavuložiin. Oaččut lassidieđuid dan riikka sosiáladorvoeiseválddiin.
Sáhtát go oažžut buohccedivššu?
Du barganriika vástida du buohccedivššu ordnemis ja dan goluin. Dus ii leat vuoigatvuohta geavahit Kela-koartta dahje eurohpalaš buohccedikšunkoartta, man Suopma lea mieđihan. Du barganriika meroštallá, makkár sosiáladorvvu ja buohccedikšuma oaččut.
Vuolgágo du bearaš mielde?
Jus du mielde vuolgá bearašlahttu, guhte ii leat barggus, de su vuoigatvuođat Kela doarjagiidda meroštallojuvvojit dan vuođul, árvvoštallatgo mii ahte son fárre olgoriikkaide fásta. Jus du bearašlahttu bargá, de su vuoigatvuođat Kela doarjagiidda meroštallojuvvojit seamma láhkai go eará EU- dahje Edg-riikkas, Sveiccas dahje Stuorra-Británnias bargi olbmuin.
Jus vuolggát bargin dahje fitnodatdoallin eará sadjái go EU- dahje Edg-riikii, Sveicii dahje Stuorra-Británniai, loga eanet dáppe (suomagillii).
Rádjebargi lea olmmoš, guhte bargá riikkas, mas son ii oro. Rádjebargi máhccá jeavddalaččat beaivválaččat dahje unnimustá oktii vahkus iežas fásta orrunriikii.
Leatgo barggus EU- dahje Edg-riikkas, Sveiccas dahje Stuorra-Británnias ja orut Suomas?
Jus barggat rádjebargin EU- dahje Edg-riikkas, Sveiccas dahje Stuorra-Británnias muhto ásat Suomas, dus lea vuoigatvuohta iežat barganriika sosiáladorvui. Dalle sáhtát oažžut seamma áigge dušše muhtun doarjagiid Kelas, dego almmolaš ássandoarjaga dahje etniidveahki.
Almmut midjiide dalán, go álggahat rádjebargin bargama. Sáhtát almmuhit olgoriikkain bargama birra
Doaimmat maiddái iežat barganriikka eiseválddi mieđihan dikšunvuoigatvuohtaduođaštusa S1, jos barggat EU-dahje Edg-guovllus dahje Sveiccas (muhto it Davviriikkain dahje Stuorra-Británnias).
Sáhtátgo oažžut buohccedivššu?
Dus lea riekti buotlágan buohccedikšui, man dárbbašat, sihke du barganriikkas ja Suomas. Oaččut divššu báikkálaš áššehasmávssu hattiin. Oza Kelas dikšovuoigatvuođa. Jus barggat eará sajis go Davviriikkain dahje Stuorra-Británnias, doaimmat Kelai dikšovuoigatvuođa ozadettiinat barganriikkas fidnejuvvon dikšovuoigatvuohtaduođaštusa S1.
Kela mieđiha dutnje áššegirjji Duođaštus vuoigatvuođas dikšoovdduide Suomas (Todistus oikeudesta hoitoetuuksiin Suomessa). Duođaštusain sáhtát fidnet divššu Suomas almmolaš dearvvasvuođafuolahusas áššehasmávssu hattiin. Sáhtát oažžut maiddái buhtadusaid
Suomas šaddan priváhta dearvvasvuođafuolahusa goluin
- dálkasiid oastimis
- buohcuvuođa divššu dihte bargojuvvon mátkkiid goluin.
Dus ii leat vuoigatvuohta Kela-kortii. Eurohpalaš buohccedikšunkoartta mieđiha du barganriika.
Leatgo barggus EU- dahje Edg-riikkaid, Sveicca dahje Stuorra-Británnia olggobealde ja orut Suomas?
Jus barggat muhtun eará riikkas go EU- dahje Edg-riikkas, Sveiccas dahje Stuorra-Británnias muhto ásat Suomas fásta, dus lea vuoigatvuohta Kela doarjagiidda.
Almmut midjiide, jus barggat olgoriikkain badjel 3 mánotbaji. Vuollel 3 mánotbaji guhkkosaš barganáiggis don it dárbbaš almmuhit. Sáhtát almmuhit iežat bargama birra
Sáhtátgo oažžut buohccedivššu?
Jus dus lea ruoktogielda Suomas, oaččut divššu Suomas almmolaš dearvvašvuođafuolahusas áššehasmávssu hattiin.
Jus dus ii leat ruoktogielda Suomas, dus lea vuoigatvuohta dušše hohpolaš dikšui Suomas. Divššu golut sáhttet berrojuvvot dus maŋŋegihtii.
Jus barggat EU- dahje Edg-riikkaid, Sveicca ja Stuorra-Británnia olggobealde, it sáhte oažžut Kelas áššegirjji Duođaštus vuoigatvuođas dikšoovdduide Suomas (Todistus oikeudesta hoitoetuuksiin Suomessa).
Infogihppagaš rádjebargiide: Ruoktu Suomas, bargu Ruoŧas dahje Norggas (pdf).
Máŋgga riikkas bargi olbmuin oaivvildit olbmo, guhte dávjá molsu EU- dahje Edg-guovllus, Sveiccas dahje Stuorra-Británnias barganriikka dahje bargá vurrolagaid sierra riikkain. Dákkár olbmot sáhttet leat fievrridanfitnodagaid bargit, dego goallosbiilavuoddjit.
Sáhtátgo oažžut Kela doarjagiid?
Jos Ealáhatdorvoguovddáš mieđiha dutnje A1-duođaštusa, dus seailu vuoigatvuohta Kela doarjagiidda dan áigge go barggat olgoriikkain. A1-duođaštus čájeha, man riikka sosiáladorvoláhkaásaheapmi dutnje heivehuvvo ja man riikii du sosiáladorvomávssut máksojuvvojit.
Mii oažžut dieđu Ealáhatdorvoguovddáža mieđihan A1-duođaštusaš automáhtalaččat. Don it de dárbbaš váldit sierra oktavuođa midjiide. Čájet A1-duođaštusa dárbbu mielde iežat barganriikkaid eiseválddiide dahje bargoaddiide.
Sáhtátgo oažžut buohccedivššu?
Jus Ealáhatdorvoguovddáš mieđiha dutnje A1-duođaštusa, mii sáddet dutnje eurohpalaš buohccedikšunkoartta. Go čájehat dan, oaččut iežat barganriikkas medisiinnalaččat vealtameahttun divššu.
Veahkkeruhtaoažžuin oaivvildit olbmo, guhte bargá dutkanbarggu dahje dáiddalaš barggu suopmelaš veahkkeruđain ja sus lea MYEL-dáhkádus. Veahkkeruđain sáhttá maiddái čađahit joatkkaoahpuid.
Loga MYEL-dáhkádusa birra (mela.fi, suomagillii).
Sáhtátgo oažžut doarjagiid?
EU- dahje Edg-riika, Sveica, Stuorra-Británnia dahje sosiáladorvosoahpamušriika
Jus oaččut suopmelaš veahkkeruđa dahje dus lea MYEL-dáhkádus ja barggat dutkanbarggu dahje dáiddalaš barggu EU- dahje Edg-riikkas, Sveiccas, Stuorra-Británnias dahje riikkas, mainna Suomas lea soahpamuš sosiáladorvvu birra, oza iežat veahkkeruhtabargama áigái Ealáhatdorvoguovddážis A1-duođaštusa. Duođaštusa vuođul sáhtát ain oažžut Kela doarjagiid, jus dus lea leamaš vuoigatvuohta doarjagiidda ovdal olgoriikkaide vuolgima.
Mii oažžut dieđu Ealáhatdorvoguovddáža mieđihan duođaštusaš automáhtalaččat.
Eará riikkat
Jus oaččut suopmelaš veahkkeruđa ja Kela doarjagiid ja barggat dutkanbarggu dahje dáiddalaš barggu eará sajis go EU- dahje Edg-riikkas, Sveiccas, Stuorra-Británnias dahje riikkas, mainna Suomas lea soahpamuš sosiáladorvvu birra, almmut midjiide iežat bargama birra
Sáhtát ain oažžut Kela doarjagiid, jus dus lea leamaš vuoigatvuohta doarjagiidda ovdal olgoriikkaide vuolgima.
Don fertet ohcat veahkkeruhtabargama áigái MYEL-dáhkádusa.
Loga eanet:
- A1-duođaštusa ohcan Ealáhatdorvoguovddážis (etk.fi, suomagillii)
- MYEL-dáhkádus (mela.fi, suomagillii).
Oaččut dárkilut dieđuid Kela doarjagiin kela.fi-siidduin dahje go riŋget midjiide.
Sáhtátgo oažžut buohccedivššu?
EU- dahje Edg-riika, Sveica dahje Stuorra-Británnia
Jus Ealáhatdorvoguovddáš mieđiha dutnje A1-duođaštusa, oaččut Kelas eurohpalaš buohccedikšunkoartta. Go čájehat dan, oaččut iežat barganriikkas medisiinnalaččat vealtameahttun divššu.
Jus barggat badjel jagi nuppi EU- dahje Edg-riikkas, Sveiccas dahje Stuorra-Británnias, oza Kelas dikšovuoigatvuođa (suomagillii). Jus mii mieđihat dutnje dikšovuoigatvuohtaduođaštusa S1, sáhtát registreret dan iežat barganriikka buohcceoadjolágádusas. Jus barggat Davviriikkain dahje Stuorra-Británnias, it dábálaččat dárbbaš S1-duođaštusa, daningo dat ii geavahuvvo Suoma ja Davviriikkaid ja Suoma ja Stuorra-Británnia gaskkas.
Oaččut iežat barganriikkas buot divššu, man dárbbašat, báikkálaš áššehasmávssu hattiin dan riika láhkaásaheami mielde.
Go ozat dikšovuoigatvuođa, sáhtát oažžut maiddái áššegirjji Duođaštus vuoigatvuođas dikšoovdduide Suomas, jus dus ii leat ruoktogielda Suomas. Duođaštusain sáhtát fidnet divššu Suomas almmolaš dearvvasvuođafuolahusas áššehasmávssu hattiin. Sáhtát oažžut maiddái buhtadusaid
- Suomas šaddan priváhta dearvvasvuođafuolahusa goluin
- dálkasiid oastimis
- buohcuvuođa dikšuma dihte bargon mátkkiid goluin.
Eará riikkat
Oaččut buohccedivššu iežat barganriikka báikkálaš lágaid ja njuolggadusaid mielde. Lassedieđuid oaččut dan riikka sosiáladorvo- ja dearvvasvuohtaeiseválddiin.
Go finat Suomas, sáhtát geavahit Kela-koartta. Oaččut divššu Suomas almmolaš dearvvasvuođafuolahusas áššehasmávssu hattiin, jos dus lea ain ruoktogielda.
Jus dus ii leat ruoktogielda Suomas, dus lea vuoigatvuohta dušše hohpolaš dikšui Suomas. Divššu golut sáhttet berrojuvvot dus maŋŋegihtii.
Jus vuolggát Quebecii, du buohccedivššus sáhttet leat spiehkastagat. Váldde oktavuođa midjiide dalle telefovnnain 020 634 0200.
Barggatgo iežat dutkanbarggu dahje dáiddalaš barggu lassin?
Jus barggat iežat dutkanbarggu dahje dáiddalaš barggu lassin man nu eará barggu EU- dahje Edg-riikkas, Sveiccas dahje Stuorra-Británnias, dus lea dábálaččat vuoigatvuohta iežat barganriikka sosiáladorvui. It sáhte dábálaččat seamma áigge oažžut Kela doarjagiid. Almmut Ealáhatdorvoguovddážii barggu álggaheami birra (etk.fi). Almmut maiddái Kelai barggu birra, man barggat EU- dahje Edg-riikkas dahje Sveiccas
Jus barggat iežat dutkanbarggu dahje dáiddalaš barggu lassin man nu eará barggu EU- dahje Edg-riikkain, Sveiccas dahje Stuorra-Británnias, dus lea dábálaččat vuoigatvuohta Kela doarjagiidda. Doarjagiid oažžuma eaktun lea, ahte du dutkanbargu ja dáiddalaš bargu leat ollesáigásaččat.
Vuolggátgo olgoriikkaide stuđeantan?
Stuđeanttain oaivvildit olbmo, guhte vuolgá olgoriikii oahppilonohallamii dahje dutkkusstuđeantan.
Sáhtátgo oažžut Kela doarjagiid?
Go stuđeret olgoriikkain, sáhtát dábálaččat oažžut Kela doarjagiid, vaikko du stuđeren bisttašii badjel 6 mánotbaji. Eaktun lea, ahte dus lea leamaš vuoigatvuohta Kela doarjagiidda ovdal olgoriikaoahpuid.
Dasa lassin stuđeren galgá leat
- ollesáigásaš
- gárvet ámmáhii dahje dutkosii
- dáhpáhuvvat almmolaš oahppolágádusas, mii lea hálddahusa vuolde.
Sáhtát oažžut Kela doarjagiid nu guhká go du stuđeren, dutkanbargu dahje dáiddalaš bargu lea olgoriikkain ollesáigásaš. Loga eanet oahppodoarjagis olgoriikkaide (suomagillii).
Oaččut dárkilut dieđuid Kela doarjagiin kela.fi-siidduin dahje go riŋget midjiide.
Sáhtátgo oažžut buohccedivššu?
Jus stuđeret EU- dahje Edg-riikkas, Sveiccas dahje Stuorra-Británnias, oaččut medisiinnalaččat vealtameahttun buohccedivššu eurohpalaš buohccedikšunkoarttain.
Jus stuđeret eará sajis go EU- dahje Edg-riikkas, Sveiccas dahje Stuorra-Británnias, mávssát ieš iežat buohccedivššu goluid. It sáhte oažžut Kelas buhtadusa goluin.
Jus vuolggát Quebecii, du buohccedivššus sáhttet leat spiehkastagat. Váldde oktavuođa midjiide dalle telefovnnain 020 634 0200.
Barggatgo stuđerema áigge?
Jus barggat oahpuid lassin EU- dahje Edg-riikkas, Sveiccas dahje Stuorra-Británnias dus lea dábálaččat vuoigatvuohta iežat barganriika sosiáladorvui. Dalle it dábálaččat sáhte oažžut Kela doarjagiid. Oahppodoarjja sáhttá goittotge joatkašuvvat, vaikko álggahivččetge barggu, jos it dine du jahkeboahtoráji badjel.
Almmut midjiide álo iežat bargama birra EU- dahje Edg-riikkas, Sveiccas dahje Stuorra-Británnias
Jus barggat oahpuid dahje dutkanbarggu lassin EU- dahje Edg-riikkaid, Sveicca ja Stuorra-Británnia olggobealde, dus lea dábálaččat vuoigatvuohta Kela doarjagiidda, jus barggat oasseáigásaččat.
Oaččut go ealáhaga ja vuolggát olgoriikkaide?
Ealáhatoažžuin oaivvildit olbmo, guhte oažžu bargoealáhaga dahje álbmotealáhaga Suomas.
Vuolggátgo gaskaboddosaččat eará EU- dahje Edg-riikii, Sveicii dahje Stuorra-Británniai?
Jus stuđeret gaskaboddosaččat EU- dahje Edg-riikkas, Sveiccas dahje Stuorra-Británnias, sáhtát dábálaččat oažžut Kela ovdduid, dego álbmotealáhaga, man Kela mieđiha. Oaččut dárkilut dieđuid Kela doarjagiin kela.fi-siidduin dahje go riŋget midjiide.
Loga eanet
- gaskaboddosaš orrumis EU-dahje Edg-riikkas, Sveiccas dahje Stuorra-Británnias (suomagillii)
- ealáhagas, man Kela lea mieđihan.
Sáhtátgo oažžut buohccedivššu?
Oaččut medisiinnalaččat vealtameahttun buohccedivššu eará EU- dahje Edg-riikkas, Sveiccas dahje Stuorra-Británnias, jus dus lea eurohpalaš buohccedikšunkoarta. Mávssát divššus dušše báikkálaš áššehasmávssu hatti.
Loga eanet eurohpalaš buohccedikšunkoarttas.
Fárretgo fásta eará EU- dahje Edg-riikii, Sveicii dahje Stuorra-Británniai?
Jus fárret fásta eará EU- dahje Edg-riikii, Sveicii dahje Stuorra-Británniai, du vuoigatvuohta eanaš Kela mieđihan doarjagiidda nohká fárrenbeaivái.
Sáhtátgo oažžut buohccedivššu?
Go barggat almmuhusa olgoriikkaide fárremat birra, mii čielggadit, leago dus vuoigatvuohta oažžut iežat ássanriikkas buohccedivššu, man Suopma máksá (suomagillii). Jus mii mieđihat dutnje dikšovuoigatvuohtaduođaštusa S1, doaimmat dan registrerema várás iežat ođđa ássanriikka buohcceoadjolágádussii. Mii sáddet dutnje maiddái eurohpalaš buohccedikšunkoartta.
Loga eanet eurohpalaš buohccedikšunkoarttas.
Jus ásat Davviriikkain dahje Stuorra-Británnias, it dábálaččat dárbbaš S1-duođaštusa, daningo dat ii geavahuvvo Suoma ja Davviriikkaid ja Suoma ja Stuorra-Británnia gaskkas.
Oaččut ealáhatoažžu eurohpalaš buohccedikšunkoarttain Suoma almmolaš dearvvasvuođafuolahusas buot buohccedivššu, man dárbbašat, áššehasmávssu hattiin. Oaččut buhtadusa maiddái
- priváhta dearvvasvuođafuolahusa goluin
- dálkasiid oastimis
- buohcuvuođa dikšuma dihte bargon mátkkiid goluin.
Vuolggátgo eará sadjái go EU- dahje Edg-riikii, Sveicii dahje Stuorra-Británniai?
Jus vuolggát eará sadjái go eará EU- dahje Edg-riikii, Sveicii dahje Stuorra-Británniai, loga eanet vuoigatvuođas Kela doarjagiidda ja buohccedikšui dás (suomagillii).
Vuolggátgo olgoriikkaide bearašlahttun?
Bearašlahtuin oaivvildit náitos- ja rabasguoimmi dahje registrerejuvvon párragaskavuođa oassebealli. Maiddái seamma dállodoalus ássi vuolleahkásaš mánát leat bearašlahtut.
Jus leat sáddejuvvon bargi, diplomáhta, ovddastaga bargi dahje virgeolbmo bearašlahttu, oahpásmuva sáddejuvvon bargi bearašlahtu rávvagiidda (suomagillii).
Sáhtátgo oažžut Kela doarjagiid?
Doarjagiid oažžumii váikkuha erenomážit dat, ásatgo olgoriikkain fásta. Jus mii árvvoštallat, ahte ásat olgoriikkain fásta, it sáhte šat oažžut Kela doarjagiid. Go mii árvvoštallat ahte ásatgo olgoriikkain fásta, dasa váikkuha maiddái dat, mo mii árvvoštallat dan olbmo olgoriikkaide fárrema, gean lusa dahje mielde fárrejit.
Dihto olmmošjoavkkut, dego stuđeanttat ja sáddejuvvon bargit, sáhttet goittotge oažžut Kela doarjagiid olgoriikkaide, vaikko sin olgoriikkain orrun bisttášiige guhká. Jus fárret dákkár olbmo mielde, maiddái dus lea bearašlahttun vuoigatvuohta Kela doarjagiidda olgoriikkaide.
Vuhtii váldde, ahte dušše dakkár bearašlahtut sáhttet oažžut Kela doarjagiid olgoriikkaide, geain lea leamaš vuoigatvuohta Kela doarjagiidda juo ovdal fárrema. Dát njuolggadus ii goittotge guoskka mánáid, geat riegádit olgoriikkain.
Jus fárret bearašlahttun EU- dahje Edg-riikii, Sveicii dahje Stuorra-Británniai, sáhtát dábálaččat oažžut Kela doarjagiid, jus dat olmmoš, gean dihte fárriidet olgoriikkaide, sáhttá oažžut Kela doarjagiid. Jus álggahat bargama muhtun riikkas dain, du dilli nuppástuvvá ja gulat iežat barganriikka sosiáladorvvu biirii. Dalle it šat sáhte oažžut Kela doarjagiid.
Almmut midjiide olgoriikii fárremat birra.
Almmut maiddái, jus álggahat olgoriikkain bargama.
Jus dus leat vuolleahkásaš mánát, geat fárrejit du mielde ja geaid fuolaheaddji don leat, almmut maiddái sin fárrema birra iežat almmuhusas.
Sáhtátgo oažžut buohccedivššu?
Jus fárret olgoriikkaide, du ođđa ássanriika meroštallá, makkár buohccedivššu oaččut. Du vuoigatvuhtii oažžut buohccedivššu sáhttá váikkuhit maiddái dan olbmo eallindilli, gean mielde dahje lusa fárret olgoriikkaide. Čielggat áiggil ovdalgo fárret, mo sáhtát oažžut buohccedivššu iežat ođđa ássanriikkas.
Jus dus lea ruoktogielda Suomas, oaččut divššu Suomas almmolaš dearvvašvuođafuolahusas áššehasmávssu hattiin.
Jus dus ii leat šat ruoktogielda Suomas, muhto dus lea vuoigatvuohta Kela doarjagiidda ja ásat EU- dahje Edg-riikkas, Sveiccas dahje Stuorra-Británnias, sáhtát bivdit Kela čielggadit, leago dus vuoigatvuohta dikšui Suomas.
Jus dus ii leat ruoktogielda ja ásat eará sajis go EU-dahje Edg-riikkas, Sveiccas dahje Stuorra-Británnias, dus lea vuoigatvuohta dušše hohpolaš dikšui Suomas. Divššu golut sáhttet berrojuvvot dus maŋŋegihtii.
Jus fárret olgoriikkaide sáddejuvvon bargi bearašlahttun, loga eanet du vuoigatvuođas Kela doarjagiidda (suomagillii).