Vuäitak-a vuäǯǯad Kela tuärjjõõzzid ålggjânnmid?

Reâugglain juuʹrdet oummu, kååʹtt vuâlgg ålggjânnmid reâuggad.

Looǥǥ lââʹzz

• jõs lääʹdd reâugguuʹdi vuõlttad tuu ålggjânnmid reâuggam-mieʹrrummša.
• jõs vuâlǥak ålggjânnmid ougglõssân reâuggad
• jõs reâuǥak põõrǥâsneʹǩǩen ålggjânnmin.

Mâid feʹrttai tuejjeed?

Iʹlmmet miʹjjid reâuggmõõžžâst nuuʹbb jânnmest, ǥu vuäǯǯak Kela tuärjjõõzzid leʹbe tuʹst lij euroopplaž puõccihåiddkortt. Vuäitak iʹlmmted reâuggmõõžžâst

• MuuKelast
• lomaakkin Serddmõš ålggjânnmid leʹbe reâuggmõš ålggjânnmin Y 38sms (pdf).

Vuäitak-a vuäǯǯad Kela tuärjjõõzzid?

Jõs reâuǥak EU- leʹbe Eta-jânnmest, Sveiʹccjânnmest leʹbe Jõnn-Britanniast, tuʹst lij takainalla vuõiggâdvuõtt reâuggamjânnmad sosiaalstaaʹne huõlǩani reâuggmõõžž pešttmõõžžâst leʹbe tõʹst, koon jânnmest jälstak. Täʹl jiõk takainalla vueiʹt vuäǯǯad Kela tuärjjõõzzid.

Kuulak reâuggamjânnmad sosiaalstaaʹne, jõs reâugg teâudd ouddmiârkkân reâuggamääiʹj leʹbe pääʹlǩ kuõskki uuʹccmõsoudldõõzzid. Oudldõõzz liâ jânnam meâldla. Vuõiggâdvuõtt reâuggamjânnmad sosiaalstaaʹne da tuärjjõõzzid lij täujja seämma ǥu reâuggamjânnmad meerlain. Vuäǯǯak lââʹssteâđaid kõõččmõõžžâst åårrai jânnam sosiaalstaanveʹrǧǧniiʹǩǩin.

Vuäitak-a vuäǯǯad puõccihååid?

Reâuggamjânnmad vaʹsttad puõccihååid jäʹrjstummšest da tõn kuulin. Tuʹst ij leäkku vuõiggâdvuõtt ââʹnned Kela-koort leʹbe Lääʹddjânnam miõttâm euroopplaž puõccihåiddkoort. Reâuggamjânnmad meäʹrtââll, måkam sosiaalstaan da puõccihååid vuäǯǯak.

Vuâlgg-a jiijjad piâr mieʹldd?

Jõs tuu mieʹldd vuâlgg piârvuäzzlaž kååʹtt ij reâuǥ, suu vuõiggâdvuõtt Kela tuärjjõõzzid meäʹrtââvv tõn vuâđald, ärvvtõõllâp-a suu serddmõõžž ålggjânnmid põõššjen. Jõs piârvuäzzlad reâugg, suu vuõiggâdvuõtt Kela tuärjjõõzzid meäʹrtââvv mâʹte še järrsin EU- leʹbe Eta-jânnmest, Sveiʹccjânnmest leʹbe Jõnn-Britanniast reâuggai oummuin.

Jõs vuâlǥak reâuggliʹžžen leʹbe põõrǥâsneʹǩǩen jeeʹresårra ǥu EU- leʹbe Eta-jânnma, Sveiʹccjânnma leʹbe Jõnn-Britanniaaʹje, looǥǥ lââʹzz tääiʹben (lääʹddǩiõʹlle).

Raajjreâugglaž lij ooumaž, kååʹtt reâugg jânnmest, koʹst son ij jäälast. Raajjreâugglaž mäcc mieʹrrkõõski juõʹǩǩpeeiʹv leʹbe kuuitâǥ õõut vuâra neäʹttlest põõšši jälstemjânnmes.

Leäk-a reâuǥast EU- leʹbe Eta-jânnmest, Sveiʹccjânnmest leʹbe Jõnn-Britanniast da jälstak Lääʹddjânnmest?

Jõs reâuǥak raajjreâuggliʹžžen EU- leʹbe Eta-jânnmest, Sveiʹccjânnmest leʹbe Jõnn-Britanniast, leša jälstak Lääʹddjânnmest, tuʹst lij vuõiggâdvuõtt reâuggamjânnmad sosiaalstaaʹne. Täʹl vuäitak seämmaäiggsânji vuäǯǯad tåʹlǩ mâid-ne Kela tuärjjõõzzid, mâʹte takai jälstemtuärjjõõzz leʹbe jeäʹnnveäʹǩǩvuõđ.

Iʹlmmet miʹjjid tâʹlles, ǥu alttääk raajjreâuggliʹžžen reâuggmõõžž. Vuäitak iʹlmmted ålggjânnmin reâuggmõõžžâst

• MuuKelast
• lomaakkin Serddmõš ålggjânnmid leʹbe reâuggmõš ålggjânnmin Y 38sms (pdf).

Tååimat še reâuggamjânnmad veʹrǧǧniiʹǩǩi miõttâm håiddvuõiggâdvuõtt-tuõđštõs S1, jõs reâuǥak EU- leʹbe Eta-vuuʹdest leʹbe Sveiʹccjânnmest (leša jiõk Tâʹvvjânnmin leʹbe Jõnn-Britanniast).

Ouddmiârkk: Lääʹddjânnmest jälsteei Eʹll reâugg Taarrjânnmest da šõddad päärna

Eʹll reâugg Taarr beäʹlnn Kaarasjooǥǥâst, leša jäälast Uccjooǥǥ kååʹddest. Eʹll šõddad päärna. Suʹst lij reâuggamriikk vuâđald vuõiggâdvuõtt puärrsipeiʹvvteägga Taarrâst. Täʹst huõlǩâni Eeʹllest lij Lääʹddjânnmest jälstummuž vuâđald vuõiggâdvuõtt ooccâd Lääʹddjânnmest jeäʹnnveäʹǩǩvuõđ.

Vuäitak-a vuäǯǯad puõccihååid?

Tuʹst lij vuõiggâdvuõtt pukid taarbšem puõccihååidaid nuʹt reâuggamjânnmest ǥu Lääʹddjânnmest. Vuäǯǯak hååid pääiklaž äʹššneǩmääus hõõʹddin. Ooʒʒ Kelast håiddvuõiggâdvuõđ. Jõs reâuǥak jeeʹresåʹrnn ǥu Tâʹvvjânnmin leʹbe Jõnn-Britanniast, tååimat Kelaaʹje håiddvuõiggâdvuõđ ooʒʒeen reâuggamjânnam miõttâm håiddvuõiggâdvuõtt-tuõđštõs S1.

Kela meâtt tuʹnne äʹššǩeeʹrj Tuõđštõs vuõiggâdvuõđâst håiddouddõõzzid Lääʹddjânnmest. Tuõđštõõzzin vuäitak vuäǯǯad hååid Lääʹddjânnmest õõlmâs tiõrvâsvuõđhuâlast äʹššneǩmääus hõõʹddin. Vuäitak vuäǯǯad še koʹrvvõõzzid Lääʹddjânnmest šõddâm

• privaatt tiõrvâsvuõtthuâl kuulin
• taalkâsvuästtõõzzin
• puõccmõõžž hååid diõtt tuejjuum maaʹtǩi kuulin.

Tuʹst ij leäkku vuõiggâdvuõtt Kela-koʹrtte. Euroopplaž puõccihåiddkoort meâtt reâuggjânnmad.

Leäk-a reâuǥast EU- leʹbe Eta-jânnmi, Sveiʹccjânnam leʹbe Jõnn-Britannia åålǥbeäʹlnn da jälstak Lääʹddjânnmest?

Jõs reâuǥak koʹst-ne jeeʹresåʹrnn ǥu EU- leʹbe Eta-jânnmest, Sveiʹccjânnmest leʹbe Jõnn-Britanniast leša jälstak Lääʹddjânnmest põõššjen, tuʹst lij vuõiggâdvuõtt Kela tuärjjõõzzid.

Iʹlmmet miʹjjid, jõs ålggjânnmin reâuggmõš peštt tuʹst pâʹjjel 3 määnpââʹj. Vuâlla 3 määnpââʹj reâuggmõõžžâst tuʹst ij taarbaš iʹlmmted. Vuäitak iʹlmmted reâuggmõõžžâst

• MuuKelast
• lomaakkin Serddmõš ålggjânnmid leʹbe reâuggmõš ålggjânnmin Y 38sms (pdf).

Vuäitak-a vuäǯǯad puõccihååid?

Jõs tuʹst lij dommkåʹdd Lääʹddjânnmest, vuäǯǯak hååid Lääʹddjânnmest õõlmâs tiõrvâsvuõtthuâlast äʹššneǩmääus hõõʹddin.

Jõs tuʹst ij leäkku dommkåʹdd Lääʹddjânnmest, tuʹst lij vuõiggâdvuõtt tåʹlǩ akuutt hoiddu Lääʹddjânnmest. Hååid kuul vueiʹtet laaskted tuʹst mââibeäʹlnn.

Jõs reâuǥak EU- da Eta-jânnmi, Sveiʹccjânnam da Jõnn-Britannia åålǥbeäʹlnn, jiõk vueiʹt vuäǯǯad Kelast äʹššǩeeʹrj Tuõđštõs vuõiggâdvuõđâst håiddouddõõzzid Lääʹddjânnmest (Todistus oikeudesta hoitoetuuksiin Suomessa).

Määŋgain jânnmin reâuggai oummuin miârktet, kååʹtt määŋg vuâra vaajat EU- leʹbe Eta-vuuʹdest, Sveiʹccjânnmest leʹbe Jõnn-Britanniast reâuggamjânnam leʹbe reâugg vuârvuârai jeeʹres jânnmin. Näkam oummu vueiʹtte leeʹd jååʹđtempõrggsi reâuggai, mâʹte rekka-aautin vuejjai.

Näkam oummu vueiʹtte leeʹd jååʹđtempõrggsi reâuggai, mâʹte rekka-aautin vuejjai.

Vuäitak-a vuäǯǯad Kela tuärjjõõzzid?

Jõs Jeältõkstaankõõskõs meâtt tuʹnne A1-tuõđštõõzz, tuʹst seill vuõiggâdvuõtt Kela tuärjjõõzzid ålggjânnmin reâuggmad ääiʹj. A1-tuõđštõs čuäʹjat, koon jânnam sosiaalstaanlääʹjjšiõttummuž tuʹnne suåvldet da koon jânnma tuu sosiaalstaanmääusad määuʹset.

Vuäǯǯap teâđ Jeältõkstaankõõskõõzz miõttmest A1-tuõđštõõzzâst automaattlânji. Tuʹst ij nääiʹt taarbâž väʹldded jeeʹrab õhttvuõđ miʹjjid. Čuäʹjet A1-tuõđštõs taarbšeen reâuggamjânnmi veʹrǧǧniiʹǩǩid leʹbe reâugguʹvddjid.

Looǥǥ lââʹzz reâuggmõõžžâst EU-jânnmest da A1-tuõđštõõzz haʹŋǩǩummšest Jeältõkstaankõõskõõzz seeidain (etk.fi, lääddas).

Vuäitak-a vuäǯǯad puõccihååid?

Jõs Jeältõkstaankõõskõs meâtt tuʹnne A1-tuõđštõõzz, vuõltteep tuʹnne euroopplaž puõccihåiddkoort. Tõn čuäʹjteeʹl vuäǯǯak reâuggamjânnmest taalkâstiõđlânji vieltʼteʹmes hååid.

Veäʹǩǩtieʹǧǧvuäǯǯjin juuʹrdet oummu, kååʹtt tuejjad tuʹtǩǩeemtuâj leʹbe čeäppõõzzlaž tuâj lääʹdd veäʹǩǩtieʹǧǧin da lij MYEL-ååsktõõzz vuâllsaž ooumaž. Veäʹǩǩtieʹǧǧin vuäitt še spraavât juätkkmäättaid.

Looǥǥ MYEL-ååsktõõzzâst (mela.fi, lääddas).

Vuäitak-a vuäǯǯad tuärjjõõzzid?

EU- leʹbe Eta-jânnam, Sveiʹccjânnam leʹbe sosiaalstaansuåppmõšjânnam

Jõs vuäǯǯak lääʹdd veäʹǩǩtieʹǧǧ leʹbe leäk MYEL- ååsktõõzz vuâllsaž ooumaž da tuejjääk tuʹtǩǩeemtuâj leʹbe čeäppõõzzlaž tuâj EU- leʹbe Eta-jânnmest, Sveiʹccjânnmest, Jõnn-Britanniast leʹbe jânnmest, koin Lääʹddjânnmest lij suåppmõš sosiaalstaanâst, ooʒʒ veäʹǩǩteäʹǧǧtuâj tuejjeem äigga Jeältõkstaankõõskõõzzâst A1-tuõđštõõzz. Tuõđštõõzz vuâđald vuäitak ooudâs vuäǯǯad Kela tuärjjõõzzid, jõs tuʹst lij leämmaž vuõiggâdvuõtt tuärjjõõzzid ouddâl ålggjânnmid vuâlggmõõžž. Vuäǯǯap teâđ Jeältõkstaankõõskõõzz miõttmest tuõđštõõzzâst automaattlânji.

Jeeʹres jânnam

Jõs vuäǯǯak lääʹdd veäʹǩǩtieʹǧǧ da Kela tuärjjõõzzid da tuejjääk tuʹtǩǩeemtuâj leʹbe čeäppõõzzlaž tuâj jeeʹres sââʹjest ǥu EU- leʹbe Eta-jânnmest, Sveiʹccjânnmest, Jõnn-Britanniast leʹbe jânnmest, koin Lääʹddjânnmest lij suåppmõš sosiaalstaanâst, iʹlmmet miʹjjid tuâj tuejjummšest

• MuuKelast
• lomaakkin Serddmõš ålggjânnmid leʹbe reâuggmõš ålggjânnmin Y 38sms (pdf).

Vuäitak ooudâs vuäǯǯad Kela tuärjjõõzzid, jõs tuʹst lij leämmaž vuõiggâdvuõtt Kela tuärjjõõzzid ouddâl ålggjânnmid vuâlggmõõžž.

Tuʹst feʹrttai ooccâd veäʹǩǩteäʹǧǧtuâj tuejjeem ääiǥas MYEL-ååsktõõzz.

Looǥǥ lââʹzz:

• A1-tuõđštõõzz ooccmõš Jeältõkstaankõõskõõzzâst (etk.fi, lääddas)
• MYEL-ååsktõs (mela.fi, lääddas).

Tuejjääk-a tuʹtǩǩeemtuâj leʹbe čeäppõõzzlaž tuâj veäʹǩǩtieʹǧǧtaa?

Jõs vuâlǥak ålggjânnmid da teäggtak tuʹtǩǩeemtuâj leʹbe čeäppõõzzlaž tuâjad jeeʹresnalla ǥu MYEL-ååsktõõzz vuâllsaž ooumžen veäʹǩǩtieʹǧǧvuäǯǯjen, vääʹld õhttvuõđ miʹjjid teʹlfoonin 020 634 0200.

Jõs tuejjääk tuâj universiteeʹttest da tuâjjuʹvddjad vuõlttad tuu ålggjânnmid tuõjju, tobdstõõđ vuõlttuum reâuggla vuâkka.

Vuäǯǯak tääʹrǩab teâđaid Kela tuärjjõõzzin kela.fist leʹbe sååiteeʹl miʹjjid.

Vuäitak-a vuäǯǯad puõccihååid?

EU- leʹbe Eta-jânnam, Sveiʹccjânnam leʹbe Jõnn-Britannia

Jõs Jeältõkstaankõõskõs meâtt tuʹnne A1-tuõđštõõzz, vuäǯǯak Kelast euroopplaž puõccihåiddkoort. Tõn čuäʹjteeʹl vuäǯǯak reâuggamjânnmest taalkâstiõđlânji vieltʼteʹmes hååid.

Jõs tuejjääk tuâj pâʹjjel eeʹjj EU- leʹbe Eta-jânnmest, Sveiʹccjânnmest leʹbe Jõnn-Britanniast, ooʒʒ Kelast håiddvuõiggâdvuõđ. Jõs miõttâp tuʹnne håiddvuõiggâdvuõtt-tuõđštõõzz S1, vuäitak rekisterâʹstted tõn reâuggamjânnmad puõʒʒâlmååsktõs-stroiʹttlest. Jõs tuejjääk tuâj Tâʹvvjânnmin leʹbe Jõnn-Britanniast, jiõk takainalla taarbâž S1-tuõđštõõzz, ǥu tõn jeät ââʹn Lääʹddjânnam da Tâʹvvjânnmi da Lääʹddjânnam da Jõnn-Britannia kõõskâst.

Vuäǯǯak reâuggamjânnmest pukid taarbšem hååidaid pääiklaž äʹššneǩmääus hõõʹddin kõõččmõõžžâst åårrai jânnam lääʹjjšiõttummuž meâldlânji.

Ǥu ooʒʒak håiddvuõiggâdvuõđ, vuäitak vuäǯǯad še äʹššǩeeʹrj Tuõđštõs vuõiggâdvuõđâst håiddouddõõzzid Lääʹddjânnmest, jõs tuʹst ij leäkku dommkåʹdd Lääʹddjânnmest. Tuõđštõõzzin vuäitak vuäǯǯad hååid Lääʹddjânnmest õõlmâs tiõrvâsvuõđhuâlast äʹššneǩmääus hõõʹddin. Vuäitak vuäǯǯad še koʹrvvõõzzid Lääʹddjânnmest šõddâm

• privaatt tiõrvâsvuõtthuâl kuulin
• taalkâsvuästtõõzzin
• puõccmõõžž hååid diõtt tuejjuum maaʹtǩi kuulin.

Jõs jiõk leäkku MYEL-ååsktõõzz vuâllsaž ooumaž

Jõs tuʹst ij leäkku MYEL-ååsktõs jiõk-ǥa vuäǯǯ Jeältõkstaankõõskõõzzâst A1-tuõđštõõzz, vuäǯǯak taalkâstiõđlânji vieʹltʼteʹmes puõccihååid eurooplaž puõccihåiddkoortin.

Jeeʹres jânnam

Vuäǯǯak puõccihååid reâuggamjânnmad pääiklaž laaʹjji da vuâkkõõzzi mieʹldd. Lââʹssteâđaid vuäǯǯak kõõččmõõžžâst åårrai jânnam sosiaalstaan- da tiõrvâsvuõttveʹrǧǧniiʹǩǩin.

Ǥu jååđak Lääʹddjânnmest, vuäitak ââʹnned Kela-koort. Vuäǯǯak hååid Lääʹddjânnmest õõlmâs tiõrvâsvuõtthuâlast äʹššneǩmääus hõõʹddin, jõs tuʹst lij ooudâs dommkåʹdd Lääʹddjânnmest.

Jõs tuʹst ij leäkku dommkåʹdd Lääʹddjânnmest, tuʹst lij vuõiggâdvuõtt tåʹlǩ akuutt hoiddu Lääʹddjânnmest. Hååid kuul vueiʹtet laaskted tuʹst mââibeäʹlnn.

Jõs vuâlǥak Quebecca, puõccihååidast vueiʹtte leeʹd čårstõõǥǥ. Vääʹld õhttvuõđ miʹjjid täʹl teʹlfoonin 020 634 0200.

Reâuǥak-a tuʹtǩǩeemtuâjad leʹbe čeäppõõzzlaž tuâjad lââʹssen?

Jõs tuejjääk tuʹtǩǩeemtuâjad leʹbe čeäppõõzzlaž tuâjad lââʹssen mõõn-ne jeeʹres tuâj EU- leʹbe Eta-jânnmest, Sveiʹccjânnmest leʹbe Jõnn-Britanniast, tuʹst lij vuõiggâdvuõtt reâuggamjânnmad sosiaalstaaʹne. Jiõk vueiʹt takainalla seämmaäiggsânji vuäǯǯad Kela tuärjjõõzzid.

Iʹlmmet Jeältõkstaankõõskõʹsse reâuggmõõžž alttummšest (etk.fi, lääddas). Iʹlmmet EU- leʹbe Eta-jânnmest leʹbe Sveiʹccjânnmest tuejjeem reâuǥast še Kelaaʹje

• MuuKelast
• lomaakkin Serddmõš ålggjânnmid leʹbe reâuggmõš ålggjânnmin Y 38sms (pdf).

Jõs tuejjääk tuʹtǩǩeemtuâjad leʹbe čeäppõõzzlaž tuâjad lââʹssen mõõn-ne jeeʹres tuâj jeeʹres sââʹjest ǥu EU- leʹbe Eta-jânnmest, Sveiʹccjânnmest leʹbe Jõnn-Britanniast, tuʹst lij takainalla vuõiggâdvuõtt Kela tuärjjõõzzid. Tuärjjõõzzi vuäǯǯmõõžž oudldõssân lij, što tuʹtǩǩeemtuâjad da čeäppõõzzlaž tuâjad lij väʹlddtåimmsaž.

Mättʼtõõđjin juuʹrdet oummu, kååʹtt vuâlgg ålggjânnmid vaajtõsmättʼtõõđjen leʹbe tuʹtǩǩõsmättʼtõõđjen.

Mâid feʹrttai tuejjeed?

Jõs vuäǯǯak mätt-tuärjjõõzz da vuâlǥak vaajtõsmättʼtõõđjen, iʹlmmet miʹjjid vuâlggmõõžžstad mätt-tuärjjõõzz muuttâsiʹlmmtõõzzin

• MuuKelast
• lomaakkin OT 15 (pdf, lääddas).

Jõs vuâlǥak tuʹtǩǩõsmättʼtõõđjen ålggjânnmid, vuäǯǯap teâđ vuâlggmõõžžstad, ǥu ooccâd mätt-tuärjjõõzz ålggjânnmin spraavmid määttaid

• MuuKelast
• lomaakkin OT 3 (pdf, lääddas).

Jõs jiõk vuäǯǯ mätt-tuärjjõõzz, looǥǥ, mäʹhtt tuʹst feʹrttai tåimmad, ǥu vuâlǥak ålggjânnmid (lääddas).

Vuäitak-a vuäǯǯad Kela tuärjjõõzzid?

Ǥu mättʼtõõđak ålggjânnmin, vuäitak takainalla vuäǯǯad Kela tuärjjõõzzid, håʹt mâka tuu mättʼtõõttmõš peeštči pâʹjjel 6 määnpââʹj. Oudldõssân lij, što tuʹst lij leämmaž vuõiggâdvuõtt Kela tuärjjõõzzid juʹn ouddâl ålggjânnam-määttaid.

Lââʹssen mättʼtõõttmõõžž feʹrttai

• leeʹd väʹlddtåimmsaž
• jååʹđted ämmta leʹbe tuʹtǩǩõʹsse
• leeʹd õõlmâs vaaldšemvuâllsaž mättstroiʹttlest.

Vuäitak vuäǯǯad Kela tuärjjõõzzid nuʹt kuuʹǩǩ ǥu mättʼtõõttmõõžžad, tuʹtǩǩeemtuâjad leʹbe čeäppõõzzlaž tuâjad ålggjânnmin lij väʹlddtåimmsaž. Looǥǥ lââʹzz mätt-tuärjjõõzzâst ålggjânnmid.

Vuäǯǯak tääʹrǩab teâđaid Kela tuärjjõõzzin kela.fist leʹbe sååiteeʹl miʹjjid.

Vuäitak-a vuäǯǯad puõccihååid?

Jõs mättʼtõõđak EU- leʹbe Eta-jânnmest, Sveiʹccjânnmest leʹbe Jõnn-Britanniast, vuäǯǯak taalkâstiõđlânji vieltʼteʹmes puõccihååid euroopplaž puõccihååidkoortin.

Jõs mättʼtõõđak jeeʹres sââʹjest ǥu EU- leʹbe Eta-jânnmest, Sveiʹccjânnmest leʹbe Jõnn-Britanniast, määusak jiõčč puõccihååid kuulid. Jiõk vueiʹt vuäǯǯad Kelast koʹrvvõõzz.

Jõs vuâlǥak Quebecca, puõccihååidast vueiʹtte leeʹd čårstõõǥǥ. Vääʹld õhttvuõđ miʹjjid täʹl teʹlfoonin 020 634 0200.

Reâuǥak-a mättʼtõõttmõõžžad poodd?

Jõs reâuǥak määttai poodd EU- leʹbe Eta-jânnmest, Sveiʹccjânnmest leʹbe Jõnn-Britanniast, tuʹst lij vuõiggâdvuõtt reâuggamjânnmad sosiaalstaaʹne. Täʹl jiõk takainalla vueiʹt vuäǯǯad Kela tuärjjõõzzid. Mätt-tuärjjõs vuäitt kuuitâǥ juätkkjed, håʹt-i altteʹčiǩ reâuggmõõžž, jõs eeʹǩǩpuåđraajad ij mõõn pâʹjjel.

Iʹlmmet miʹjjid juõʹǩǩvuâra EU- leʹbe Eta-jânnmest, Sveiʹccjânnmest leʹbe Jõnn-Britanniast tuejjeem reâuǥast

• MuuKelast
• lomaakkin Serddmõš ålggjânnmid leʹbe reâuggmõš ålggjânnmin Y 38sms (pdf).

Jõs reâuǥak määttai leʹbe tuʹtǩǩeemtuâjad paaldâst EU- da Eta-jânnmi, Sveiʹccjânnam da Jõnn-Britannia åålǥbeäʹlnn, tuʹst lij takainalla vuõiggâdvuõtt Kela tuärjjõõzzid, jõs reâuggmõõžžad lij vueʹssäiggsaž.

Jeältõkvuäǯǯjest juuʹrdet oummu, kååʹtt vuäǯǯ reâuggjeältõõǥǥ leʹbe meerjeältõõǥǥ Lääʹddjânnmest.

Mâid feʹrttai tuejjeed?

Jos vuäǯǯak Kelast tuärjjõõzzid leʹbe tuʹst lij euroopplaž puõccihåiddkortt, tueʹjjed iʹlmmtõs ålggjânnmid vuâlggmõõžžstad

• MuuKelast
• lomaakkin Serddmõš ålggjânnmid leʹbe reâuggmõš ålggjânnmin Y 38sms (pdf).

Vuâlǥak-a kõskkpoddsânji nuuʹbb EU- leʹbe Eta-jânnma, Sveiʹccjânnma leʹbe Jõnn-Britanniaaʹje?

Jõs jälstak kõskkpoddsânji EU- leʹbe Eta-jânnmest, Sveiʹccjânnmest leʹbe Jõnn-Britanniast, vuäitak takainalla vuäǯǯad Kela ouddõõzzid, mâʹte Kela miõttâm meerjeältõõǥǥ. Vuäǯǯak tääʹrǩab teâđaid Kela tuärjjõõzzin kela.fist leʹbe sååiteeʹl miʹjjid.

Looǥǥ lââʹzz

• kõskkpoddsaž åårummšest EU- leʹbe Eta-jânnmest, Sveiʹccjânnmest leʹbe Jõnn-Britanniast
• Kela miõttâm meerjeältõõǥǥâst.

Vuäitak-a vuäǯǯad puõccihååid?

Vuäǯǯak taalkâstiõđlânji vieltʼteʹmes puõccihååid nuuʹbb EU- leʹbe Eta-jânnmest, Sveiʹccjânnmest leʹbe Jõnn-Britanniast, jõs tuʹst lij euroopplaž puõccihåiddkortt. Määusak hååidast tåʹlǩ pääiklaž äʹššneǩmääus hââʹdd.

Looǥǥ lââʹzz euroopplaž puõccihåiddkoortâst.

Seerdak-a põõššjen nuuʹbb EU- leʹbe Eta-jânnma, Sveiʹccjânnma leʹbe Jõnn-Britanniaaʹje?

Jõs seerdak põõššjen nuuʹbb EU- leʹbe Eta-jânnma, Sveiʹccjânnma leʹbe Jõnn-Britanniaaʹje, vuõiggâdvuõđad määŋgaid Kela miõttmid tuärjjõõzzid põõtt seʹrddempeivva.

Vuäitak-a vuäǯǯad puõccihååid?

Ǥu tuejjääk iʹlmmtõõzz ålggjânnma serddmõõžžâst, čiõlǥtep, lij-a tuʹst vuõiggâdvuõtt vuäǯǯad jälstemjânnmest puõccihååid, koon Lääʹddjânnam mähss. Jõs miõttâp tuʹnne håiddvuõiggâdvuõtt-tuõđštõõzz S1, tååimat tõn rekisterâʹsttem diõtt ođđ reâuggamjânnmad puõʒʒâlmååsktõs-stroiʹttla. Vuõltteep tuʹnne še euroopplaž puõccihåiddkoort.

Looǥǥ lââʹzz euroopplaž puõccihåiddkoortâst.

Jõs jälstak Tâʹvvjânnmin leʹbe Jõnn-Britanniast, jiõk takainalla taarbâž S1-tuõđštõõzz, ǥu tõn jeät ââʹn Lääʹddjânnam da Tâʹvvjânnmi da Lääʹddjânnam da Jõnn-Britannia kõõskâst.

Vuäǯǯak jeältõkvuäǯǯai euroopplaž puõccihååidkoortin Lääʹddjânnam õõlmâs tiõrvâsvuõtthuâlast puk taarbšem puõccihååidaid äʹššneǩmääus hõõʹddin. Vuäǯǯak koʹrvvõõzz še

• privaatt tiõrvâsvuõtthuâl kuulin
• taalkâsvuästtõõzzin
• puõccmõõžž hååid diõtt tuejjuum maaʹtǩi kuulin.

Vuâlǥak-a jeeʹresårra ǥu EU- leʹbe Eta-jânnma, Sveiʹccjânnma leʹbe Jõnn-Britanniaaʹje?

Jõs vuâlǥak jeeʹres sâjja ǥu nuuʹbb EU- leʹbe Eta-jânnma, Sveiʹccjânnma leʹbe Jõnn-Britanniaaʹje, looǥǥ lââʹzz vuõiggâdvuõđâst Kela tuärjjõõzzid da puõccihoiddu tääiʹben (lääddas).

Piârvuäzzlain juuʹrdet veäʹncc- leʹbe äävkueiʹm leʹbe rekisterõsttum paarkõskkvuõđ vueʹssbeäʹl. Še seämma täälast jälsteei vueʹllâkksa päärna liâ piârvuäzzla.

Jõs leäk vuõlttuum reâuggla, diplomaatt, eeʹttkâʹsttʼtõõzz reâuggla leʹbe veʹrǧǧoummu piârvuäzzlaž, tobdstõõđ vuõlttuum reâuggla piârvuäzzla vuäppõõzzid (lääddas).

Vuäitak-a vuäǯǯad Kela tuärjjõõzzid?

Tuärjjõõzzi vuäǯǯmõʹšše vaaikat jeäʹrben tõt, jälstak-a ålggjânnmin põõššjen. Jõs ärvvtõõllâp, što jälstak ålggjânnmin põõššjen, jiõk vueiʹt teänab vuäǯǯad Kela tuärjjõõzzid. Ǥu ärvvtõõllâp jälstummuž põõššivuõđ, tõõzz vaaikat še tõt, mäʹhtt ärvvtõõllâp tõn oummu ålggjânnmid serddmõõžž põõššivuõđ, ǩeän årra leʹbe mieʹldd siʹrddiǩ.

Tiõttum ooumažjoouk, mâʹte mättʼtõõđi da vuõlttuum reâuggla, vueiʹtte kuuitâǥ vuäǯǯad Kela tuärjjõõzzid ålggjânnmin, håʹt-i sij ålggjânnmest åårmõõžžâs peeštči kuuʹǩǩ. Jos seerdak näkam oummu mieʹldd, še tuʹst lij piârvuäzzliʹžžen vuõiggâdvuõtt Kela tuärjjõõzzid ålggjânnmin.

Vuâmmâž, što tåʹlǩ nåkam piârvuäzzla vueiʹtte vuäǯǯad Kela tuärjjõõzzid ålggjânnmid, ǩeäin lij leämmaž vuõiggâdvuõtt Kela tuärjjõõzzid juʹn ouddâl serddmõõžž. Tät vuâkkõs ij kuuitâǥ kuõskk ålggjânnmest šõddâm päärnaid.

Jõs seerdak piârvuäzzliʹžžen EU- leʹbe Eta-jânnma, Sveiʹccjânnma leʹbe Jõnn-Britanniaaʹje, vuäitak takainalla vuäǯǯad Kela tuärjjõõzzid, jõs tõt ooumaž, ǩeän diõtt siiʹrdid ålggjânnma, vuäitt vuäǯǯad Kela tuärjjõõzzid. Jõs alttääk reâuggmõõžžâst kooi-ne täin jânnmin, vuâkkad mõttai da kuulak reâuggamjânnmad sosiaalstaan kruuʹǧǧe. Täʹl jiõk vueiʹt teänab vuäǯǯad tuärjjõõzzid Kelast.

Iʹlmmet miʹjjid ålggjânnmid serddmõõžžstad

• MuuKelast
• lomaakkin Serddmõš ålggjânnmid leʹbe reâuggmõš ålggjânnmin Y 38sms (pdf).

Iʹlmmet še, jõs alttääk ålggjânnmin reâuggmõõžž.

Jõs tuʹst liâ vueʹllâkksa päärna, ǩeäk seʹrdde mieʹldd da ǩeäi huõlteeʹjj leäk, iʹlmmet še sij serddmõõžžâst jiijjad iʹlmmtõõzzâst.

Vuäitak-a vuäǯǯad puõccihååid?

Jõs seerdak ålggjânnmid, ođđ jälstemjânnmad meäʹrtââll, måkam puõccihååid vuäǯǯak. Vuõiggâdvuõttad vuäǯǯad puõccihååid vuäitt vaaikted še tõn oummu jieʹllemvueʹǩǩ, ǩeän mieʹldd leʹbe årra seerdak ålggjânnmid. Čiõlǥâd juʹn ääiʹjab serddmõõžžad, mäʹhtt vuäitak vuäǯǯad puõccihååid ođđ jälstemjânnmest.

Jõs tuʹst lij dommkåʹdd Lääʹddjânnmest, vuäǯǯak hååid Lääʹddjânnmest õõlmâs tiõrvâsvuõtthuâlast äʹššneǩmääus hõõʹddin.

Jõs tuʹst ij leäkku teänab dommkåʹdd Lääʹddjânnmest, leša tuʹst lij vuõiggâdvuõtt Kela tuärjjõõzzid da jälstak EU- leʹbe Eta-jânnmest, Sveiʹccjânnmest leʹbe Jõnn-Britanniast, vuäitak raukkâd Kela čiõlǥeed, lij-a tuʹst vuõiggâdvuõtt hoiddu Lääʹddjânnmest. Jõs tuʹst ij leäkku teänab dommkåʹdd Lääʹddjânnmest, leša tuʹst lij vuõiggâdvuõtt Kela tuärjjõõzzid da jälstak EU- leʹbe Eta-jânnmest, Sveiʹccjânnmest leʹbe Jõnn-Britanniast, vuäitak raukkâd Kela čiõlǥeed, lij-a tuʹst vuõiggâdvuõtt hoiddu Lääʹddjânnmest.

Jõs tuʹst ij leäkku dommkåʹdd da jälstak jeeʹres sââʹjest ǥu EU- leʹbe Eta-jânnmest, Sveiʹccjânnmest leʹbe Jõnn-Britanniast, tuʹst lij vuõiggâdvuõtt tåʹlǩ akuutt hoiddu Lääʹddjânnmest. Hååid kuul vueiʹtet laaskted tuʹst mââibeäʹlnn.

Jõs seerdak ålggjânnmid vuõlttuum reâuggla piârvuäzzliʹžžen, looǥǥ lââʹzz vuõiggâdvuõđâst Kela tuärjjõõzzid (lääddas).