Bearašfriijaođastusa mieldásaš vánhemiidbeaiveruđat leat ohcan láhkai muttuid mielde 1.5. rájes – pláne iežat vánhemiidfriija rehkenastiin

Bearašfriijaođastus rievdada vánhemiidfriijaid ja dain mákson vánhemiidbeaiveruđaid bisttu ja áigemeari. Ođastus guoská bearrašiid, main máná rehkenaston áigi lea 4.9.2022 dahje das maŋŋá. Ođđa beaiveruđaid ohcan álgá muttuid mielde 1.5. rájes. Bearašfriijaid plánema doarjjan sáhttá geavahit rehkenastiid.

Bearašfriijaođastusa mieldásaš vánhemiidbeaiveruđat leat dás duohko nama dáfus sierraáhpehisvuođaruhta, áhpehisvuođaruhta ja vánhemiidruhta. Ovddut gusket bearrašiid, main máná rehkenaston áigi lea 4.9.2022 dahje das maŋŋá sihke bearrašiid, main adopšuvdnamánná váldojuvvo dikšui áramustá 31.7.2022. Vánhema, guhte lea áhpeheapmin, áhpehisvuođa- ja vánhemiidruhta leat ohcan láhkai 1.5.2022. Sierraáhpehisvuođaruhta ja nuppi vánhema vánhemiidruhta leat fas ohcan láhkai 1.8.2022 rájes. Ovdduid sáhttá ohcat OmaKelas (suomagillii).

Vánhemiidbeaiveruđaid lea vejolaš juohkit beallái vánhemiid gaskkas – njuovžilvuohta doarju árgga

Vánhemiidbeaiveruhtabeaivvit leat anus oktiibuot 320 árgabeaivve. Jos mánás leat guokte vánhema, juohkásit friijat beallái vánhemiid gaskkas, elege guktuin leat anus 160 árgabeaivve. Áhpeheapmin leahkki olbmos lea nappo dáid beivviid lassin vel 40 áhpehisvuođaruhtabeaivvi ovdal vánhemiidruhtii sirdáseami. Iežas dihtoearis sáhttá soabadettiin luohpadit eanemustá 63 árgabeaivve nuppi vánhemii dahje olbmui, guhte dikšu máná.

Oassálas vánhemiidruhta ja -friija buktá bealistis njuovžilvuođa barggu ja bearašfriija oktiiheiveheapmái ja dahká vejolažžan ovdamearkan oassebeaivebarggu bargama. Okta oassálas vánhemiidruhtabeaivi golaha vánhemiidruhtadihtoearis bealle beaivve.

Vánhemat sáhttet boahttevuođasge doallat friija 18 árgabeaivve oktanaga. Vánhemiidruhtabeivviid sáhttá geavahit iežas háliidan áigge dan rádjai, go mánná deavdá guokte jagi dahje adopšuvdnamáná dikšui váldimis lea gollan guokte jagi.

–Ođđa málle mieldásaš ovdduid sáhttá ohcat miessemánu rájes ođđa neahttaskoviin, mii láidesta áššehasa. Áššedikšun álkidahtto visuálalaš sisdoaluin ja iešguđetlágan rehkenastiin. Juohkit dieđuid ovdduid birra maiddái ođđa etniidpáhka bokte sihke Kela mánnábearrašiid čielgabrošyrain, muitala Kela mánnábearašovdduid hoavda Kiti Laitinen.

Pláne ja ságastala bearašfriijaid birra ruovttus ja bargosajis

Áhpehisvuođa- ja vánhemiidruhtabeivviid rehkenasti (suomagillii) álkidahttá bearašfriijaid plánema. Rehkenastiin sáhttá rehkenastit, man áiggis áhpehisvuođa- ja vánhemiidruđa sáhttá oažžut. Rehkenasti dieđuid sáhttá maiddái geavahit ávkin ságastaladettiin vánhemiidfriijaid birra bargoaddiin.

Bearašfriijaođastus váikkuha maiddái bargosajiin ja rávvehagain. Kela lea buvttadan máŋggagielat diehtojuohkinmateriála bargoaddiid ja oktasašbargoguimmiid doarjjan.

–Rávvehagat ja bargosajit leat bearašfriijaođastusas stuorra/dehálaš rollas, danin go daid bokte bearrašat ožžot dieđuid friijaid birra. Bearašfriijat juohkásit ain eahpedássidit vánhemiid gaskkas. Bearašfriijaođastus ii leat ođastus, mii dahkko dušše Kelas, muhto nuppástus dárbbašuvvo olles servodaga dásis, vuoi bearašfriijat juohkásit dás duohko dássidabbot, muitala Kela diehtojuohkima áššedovdi Milla Vainio.

Juhkkon illu lea buoremus illu – kampánja juohká dieđuid sierra kanálaid bokte

Bearašfriijaođastusa máŋggagielat máinnuskampánja álgá miessemánu álggus. Kampánjjas juhkko diehtu viidát sierra kanálaid bokte, ja dan ulbmilin lea lasihit mánnábearrašiid ja mánáid doaivu olbmuid diđolašvuođa bearašfriijaođastusas ja dan fállan njuovžilvuođain bearrašiidda.

Bearašfriijaid guoski ođđa ja boares láhka doibmet rattát jagi 2024 loahpa rádjai. Boares láhkaásaheapmi heivehuvvo, go máná rehkenaston áigi lea ovdal 4.9.2022.