Kela-aaʹššid kaʹnnat håiddad ǩeässa še neeʹttest da teʹlfoonâst
Kela-aaʹššid kaʹnnat håiddad ǩeässa še OmaKelast leʹbe soiʹttjeeʹl teʹlfonkääzzkõʹsse. Määŋgain Kela kääzzkâʹsttempaaiʹǩin äävaiåårramääiʹj mottje ǩieʹzz ääiǥas, da ođđ äävaiåårramaaiʹjid serddjet 30.5.2022 ääʹljeeʹl.
Vuäitak håiddad jäänmõs vueʹzz Kela-aaʹššin neeʹttest: ooccâd ouddõõzzid, täʹrǩsted tuʹmmstõõǥǥ, vueiʹnned kuäʹss ouddõõzz määuʹset, tååimted mieʹlddõõzzid da vuõltteed Kelaaʹje saaǥǥid. Kela neʹttseeidain chattrobott vuäʹppast piʹrǧǧeemtuärjjõõzz, takai jälstemtuärjjõõzz, mättʼtõõđi tuärjjõõzz da piârouddõõzzid kuõskki aaʹššin. Kela kääzzkâstt äʹššniiʹǩǩid še Facebookâst da Instagraammâst.
Jõs äššʼsad ij kaunnu vasttõs neeʹttest, vuäitak soiʹttjed Kela teʹlfonkääzzkõʹsse. Teʹlfonkääzzkõs lij še ǩeässa äävai vuõssaarǥâst piâtnca čiâss 9–16. Teʹlfoonâst vuäitak håiddad puk seämma persoonlaž aaʹššid ko kääzzkâʹsttempääiʹǩest. Kääzzkâʹsttemnââmar lie jerruum jieʹllempooddi mieʹldd. Jõs jiõk kaaun heiʹvvjeei nââmar, vuäitak soiʹttjed koon nââmra täättas.
Teʹlfonkääzzkõʹsse vuäitt še vaʹrrjed ääiʹj, kuäʹss Kelast soiʹttjet äʹššnekka. Teʹlfonääiʹj vuäitt vaʹrrjed neeʹttest leʹbe soiʹttjeeʹl koon kääzzkâʹsttemnââmra täättas.
Sääʹmǩiõllsa kääzzkõõzz ǩeässa
Kela nuõrttsääʹmǩiõllsaž teʹlfon- da ougglõskääzzkõs lij äävai aarǥi čiâss 9–11 nââmrest 020 634 4795. Tâʹvv- da aanarsääʹmǩiõllsaž kääzzkõõzz vuäǯǯ tuulk ââʹneeʹl. Sääʹmǩiõllsaž äʹššneeʹǩǩ vuäiʹtte kueʹđđed õhttvuõttväʹlddemraukkmõõžž neʹttpååšta addrõʹsse saame@kela.fi. Kaaunak lââʹssteâđ Kela sääʹmǩiõllsaž kääzzkõõzzin addrõõzzâst www.kela.fi/saame.
Kääzzkâʹsttempaaiʹǩi äävaiåårramaaiʹjin muttâz 30.5.2022 ääʹljeeʹl
Määŋgain Kela kääzzkâʹsttempaaiʹǩin äävaiåårramääiʹj mottje ǩieʹzz ääiǥas. Ǩieʹssäävaiåårramääiʹj mottje 30.5.2022 ääʹljeeʹl da poʹtte mââimõsân 30.9.2022.
Šuurab gåårdi kuvddlõõzzin toiʹmmjeei kääzzkâʹsttempääiʹǩ lie äävai takainalla leʹbe âlddsin takainalla. Uuʹccab kääzzkâʹsttempaaiʹǩi vueʹzzeld muttâz lie jäänab. Kääzzkâʹsttempääiʹǩ äävaiåårramteâđaid kaʹnnat täʹrǩsted kela.fist.
Mäʹhtt hååidam Kela-äššan, jõs tõt ij oʹnnest neeʹttest ni teʹlfoonâst da ââldmõs kääzzkâʹsttempäiʹǩǩ lij ǩidd?
Määŋg päiʹǩǩ-kååʹddest lij veʹrǧǧniiʹǩǩi õhttsaž äʹššeempäiʹǩǩ, koʹst vuäʹpstet almmjallaš tääʹzzest Kela-aaʹššin. Kela-aaʹššin vuäǯǯ vuäʹpstummuž še ouddmiârkkân Ohjaamo-, Lähitori- da kääzzkâʹsttemkõõskõõzzin. Lââʹssen määŋg päiʹǩǩ-kååʹddest lij Kela ougglõskääzzkõs, leʹbe teâttmašina, koon pääiʹǩ vuäǯǯak Kela äʹšštobddja kovv- da jiõnnõhttvuõđ. Ougglõskääzzkõs vaʹsttad kääzzkõõzz Kela jiijjâs kääzzkâʹsttempääiʹǩest. Kaaunak Virtu-kääzzkâʹsttempaaiʹǩi õhttvuõtt-teâđaid da äävaiåårramaaiʹjid kääzzkâʹsttempääiʹǩ ooccmin.
Vuäitak še väʹldded õhttvuõđ dommkååddad sosiaalkääzzkõõzzid, lääʹmeskääzzkõõzzid leʹbe tiõrvâsvuõtthuõllu, koʹst tuu vueiʹtet vieʹǩǩted ouddmiârkkân teʹlfonääiʹj vaʹrrjummšest. Ko tuʹnne vaʹrrjet teʹlfonääiʹj, Kela äʹšštobddi soiʹttai tuʹnne suåppum ääiʹj, ij-ǥa teʹlfonsåitt määuʹs ni mâid.
Põʹmmaipååʹšt kaʹnnat vuõltteed Kelaaʹje addrõʹsse Kela, PL 10, 00056 Kela.
Kääzzkâʹsttempaaiʹǩi äävaiåårramääiʹj 30.5.2022 ääʹljeeʹl (lääddas)