Kela aalgât nuorttâlâškielâlii puhelin- já káiduspalvâlem
Kela aalgât vuossaargâ 7.2. nuorttâlâškielâlii puhelin- já káiduspalvâlem tavesämikielâlii palvâlem paaldân. Nuorttâlâš- já tavesämikielâliih palvâlusah láá puátteevuođâst ávus jyehi argâpeeivi iđedispeeivi. Sämikielâlii palvâlusân puáhtá meid kyeđđiđ ohtâvuotâväldimpivdem.
Kela falâškuát puhelin- já káiduspalvâlem tavesämikielâ lasseen meid nuorttâlâškielân. Nuorttâlâškielâlii puhelin- já káiduspalvâlem lekkâs vuossaargâ 7.2.2022. Puhelinpalvâlem lii ávus tuáistáážân argâpeeivij tme 9–11. Puhelinpalvâlem nummeer lii 020 634 4795. Káiduspalvâlem njuolgâ liŋkkâ kávnoo nuorttâlâškielâlijn kela.fi-siijđoin. Siijđoin almotteh meid máhđulijn palvâlemaaigij spiekâstmijn.
Kela lii faallâm nuorttâlâškielâlii palvâlem meid ovdâlist. Palvâlem jooskâi ive 2019 loopâst ko nuorttâlâškielâlâš pargee sirdui eres pargoadeleijee palvâlusân. Täst kooskâst nuorttâlâškielâlâš palvâlem lii uárnejum táárbu mield tuulhâ peht.
Tavesämikielâlii palvâlem palvâlemäigi nubástuvá
Meid tavesämikielâlii palvâlem palvâlemäigi nubástuvá 7.2.2022 rääjist. Palvâlem lii puátteevuođâst ávus argâpeeivij tme 9–11. Puhelinpalvâlem nummeer lii 020 634 2894. Káiduspalvâlem njuolgâ liŋkkâ kávnoo tavesämikielâlijn kela.fi-siijđoin. Siijđoin almotteh meid máhđulijn palvâlemaaigij spiekâstmijn.
Tun puávtáh kyeđđiđ ohtâvuotâväldimpivdem sämikielâlii palvâlem šleđgâpostâčujottâsân jo-uv suomâkielân tâi sämikielân. Vuolgât ohtâvuotâväldimpivdem čujottâsân saame@kela.fi. Muštâl viestâst jieijâd noomâ já puhelinnummeer sehe tom, et moos äšši kuáská já mon kielân tun tarbâšah palvâlem. Kela sämikielâ mättee palvâlemäššitobdee lii tunjin ohtâvuođâst.
Anarâškielâlii palvâlem finnee táárbu mield tuulhâ peht. Kela ornim tulkkâ lii tunjin ohtâvuođâst hiäivulii ášástâllâmääigist.
Kela sämikielâliih palvâlusah palvâleh aassâmpääihist peerusthánnáá puoh sämikielâlijd, kiäh kuleh Suomâ sosiaaltoorvon. Kela sämikielâlijn nettisiijđoin muštâleh tärhibeht Kela faallâm sämikielâlijn palvâlusâin já Kela hiäđuin sierâ eellimtiilijn.
Sämmilii äššigâsâst lii säämi kielâlaahân vuáđuduvvee vuoigâdvuotâ hoittáđ jieijâs Kela-aašijd jieijâs kielân.