Kela tuärjjõõzz reâuǥteʹmes ooumže

Vuäitak vuäǯǯad reâuǥteʹmesvuõtt-tuärjjõõzzid Kelast, jõs tuʹst ij leäkku tuâjjpäiʹǩǩ jiõk-ǥa vuäǯǯ reâuǥteʹmesvuõtt-tuärjjõõzz jeeʹresåʹrnn.

Kela tuärjjõõzz reâuǥteʹmesvuõđ äigga lie

  • reâuǥteʹmesvuõttpeiʹvvteäʹǧǧ
  • reâuggmarkkântuärjjõs.

Reâuǥteʹmesvuõtt-tuärjjõõzzid määuʹset oummid, kook jälste põõššjen Lääʹddjânnmest. Sij lââʹssen reâuǥteʹmesvuõtt-tuärjjõõzzid määuʹset EU-jânnmin puättam oummid, kook lie mââimõssân reâuggam Lääʹddjânnmest.

Tääʹrǩest še, vuäitak-a vuäǯǯad måtam jeeʹres Kela tuärjjõõzzid, ouddmiârkkân jälstemtuärjjõõzz.

Jõs pääʒʒak reâuǥteʹmmen

Jõs pääʒʒak reâuǥteʹmmen, iʹlmmtõõđ tâʹlles reâuǥteʹmes reâuggooccjen tuâjj- da jieʹllemvueʹǩǩ-konttra leʹbe TJ-konttra. Reâuǥteʹmesvuõtt-tuärjjõõzz määuʹset tåʹlǩ ääiʹjest, kuäʹss leäk reâuggooccjen TJ-konttrest. TJ-koontâr oudd še Kelaaʹje ciâlkâlm tõʹst, vueiʹtet-a tuʹnne mäʹhssed tuärjjõõzz.

Tuejjed ooccmõõžž reâuǥteʹmesvuõtt-tuärjjõõzzâst Kelaaʹje, ko leäk leämmaž reâuǥteʹmmen jiõččvasttõsääiʹj leʹbe 5 arggpeeiʹv. Vuäitak vuäǯǯad reâuǥteʹmesvuõtt-tuärjjõõzz mââiǩiõʹtte jäänmõsân 3 määnpââʹj ääiʹjest.

Reâuǥteʹmesvuõttäiʹǧǧen leäk õõlǥtum ooccâd aktiivlânji reâuǥ. Ton õõlǥak še väʹldded vuâstta taʹrjjuum reâuǥ leʹbe škooultõõzz. Tõʹst ij vueiʹt ǩeâlddõõttâd määintää, muđoi seuʹrrjõssân vââjj leeʹd tuärjjõõzzi mõõntem.

Muuʹšt tuõʹllʼjed reâuggooccmad viõǥǥâst. Tõn tuejjeet TJ-konttâr neʹttseeidain (lääddas da vuässas še säämas).

Reâuǥteʹmesvuõttääiʹj iʹlmmtõs

Jõs reâuǥteʹmesvuõtt juätkkai, ton õõlǥak tååimted Kelaaʹje reâuǥteʹmesvuõttääiʹj kuõskki iʹlmmtõõzz 4 neäʹttel kõõski. Reâuǥteʹmesvuõttääiʹj iʹlmmtõõzz vuäitak tuejjeed neeʹttest leʹbe lomaakkin, koon vuäitak priʹnttjed Kela neʹttseeidain leʹbe viǯǯâd Kela konttrin.

Mieʹrǩǩed iʹlmmtõʹsse, tõid peeiʹvid, ko leäk leämmaž reâuǥteʹm, da tõid peeiʹvid, ko leäk vuässõõttâm TJ-konttrin suåppum toiʹmmjummša. Jõs leäk reâuǥteʹmesvuõttääiʹj leämmaž aaiʹji mieʹldd reâuǥast, mieʹrǩǩed iʹlmmtõʹsse tõid peeiʹvid, ko leäk leämmaž reâuǥast. Kela mähss tuʹnne tuärjjõõzz iʹlmmtõõzzad vuâđald.

Looǥǥ lââʹzz