Reâuǥteʹmes oummu tuärjjõõzz
Reâuǥteʹmesvuõtt ǩieʹppad puåttjid. Täin seeidain čiõlǥtet, måkam teäʹǧǧvuâlaž tuärjjõõzzid vuäitak vuäǯǯad Kelast, jõs tuʹst ij leäkku tuâjjpäiʹǩǩ.
Kela tuärjjõs reâuǥteʹmesvuõttäigga lij takaituärjjõs. Takaituärjjõs lij puättam tuâjjmarkkântuärjjõõzz da vuâđđpeiʹvvtieʹǧǧ sâjja. Kela ij määus tuâjjmarkkântuärjjõõzz ij-ǥa vuâđđpeiʹvvtieʹǧǧ teänab vueʹssmannust 2026 ooudårra.
Jõs pääʒʒak reâuǥteʹmmen
Jõs kuâđđjak reâuǥteʹmes ooumžen, iʹlmmtõõđ tâʹlskani reâuǥteʹmes tuâjjooccjen tuâjjvuõttkääzzkõõzzid Tuâjjmarkkântorr-seiddõõzzâst (tyomarkkinatori.fi, lääddas).
Vuäitak vuäǯǯad reâuǥteʹmesvuõtt-tuärjjõõzz tåʹlǩ ääiʹjest, kuäʹss leäk reâuggooccjen reâuǥlažvuõttkääzzkõõzzin. Reâuǥlažvuõttkääzzkõõzz ouʹdde še Kelaaʹje ciâlkâlm tõʹst, vueiʹtet-a tuʹnne mäʹhssed tuärjjõõzz.
Reâuǥteʹmesvuõttäiʹǧǧen leäk õõlǥtum ooccâd aktiivlânji reâuǥ. Tuʹst feʹrttai še väʹldded vuâstta taʹrjjuum reâuǥ leʹbe škooultõõzz. Jõs tõʹst ǩeâlddââtt määintaa, vuäitt mõõnted tuärjjõõzzid.
Muuʹšt tuõʹllʼjed reâuggooccmad viõǥǥâst. Vuäǯǯak tõõzz tääʹrǩab vuäʹppõõzzid reâuǥlažvuõttkääzzkõõzzin.
Vueʹlnn åårrai kartt čuäʹjat, mâid tuʹst feʹrttai tuejjeed, jõs pääʒʒak reâuǥteʹmes ooumžen.
Kuäʹss vääldak õhttvuõđ Kelan da kuäʹss tuâjjvuõttkääzzkõõzzid?
Jõs tuʹst lij mii-ne kõõččâmnalla tuärjjõõzzin, koid Kela mähss, vääʹld õhttvuõđ Kelan. Vuäitak såittad kääzzkõsnââmra 020 692 210.
Vääʹld õhttvuõđ tuâjjvuõttkääzzkõõzzid, jõs kõõččmõõžžad kuâskk
- iʹlmmtõõttmõõžž tuâjjooccjen
- tuâjjooccâmõõlǥtõõzz
- tuâjjviõkkpoliittlaž ciâlkâlm
- reâuǥteʹmesvuõtt-tuärjjõõzz kareeʹns
- tuâjjvuäǯǯma oouʹdeei kääzzkõõzzid.
Kaaunak jiijjad kååʹdd tuâjjvuõttkääzzkõõzzi õhttvuõtt-teâđaid Tuâjjmarkkântoor vuʹvddseeidain (tyomarkkinatori.fi, lääddas). Vuäitak še såittad väʹlddkååddlaž reâuǥteʹmes oummui vuäʹpstõʹsse: 0295 020 701.