Tiânnsi vaaiktõs takaituärjjõʹsse
Puk jiijjad tiânnâz vueiʹtte uuʹcceed takaituärjjõõzz meäʹr.
Tuâjjtiânnâz
Jõs leäk kõõskâst tuâjast reâuǥteʹmesvuõđ poodd, tuâjjtiânnâz uuʹccee takaituärjjõõzz meäʹr.
Vuâđđvuâkkõs lij, što ǥu teäʹnʼjak eeuʹr, tuärjjõs occan 50 seeʹnt.
Iʹlmmet tuâjjčiâssid da tuâjjpeeiʹvid Kelaaʹje. Kela vuäǯǯ päʹlǩǩteâđaid puåđrekisteeʹrest da äuʹǩǩad tõid ǩiõttʼtõõllmõõžžâst.
Jeeʹres tiânnâz
Jõs tuʹst lie kapitaalpuåtti pâʹjjel 311 euʹrred määnpââʹjest, tõk še uuʹccee tuärjjõõzz meäʹr. Kapitaalpuåtti lie ouddmiârkkân vuåkrrpuåđ, vueiʹttemvuässõs da kaaupšemvuäitt.
Jiijjad kapitaalpuåtti jie kuuitâǥ vaaikât takaituärjjõʹsse, jõs vuässõõđak reâuggvuäǯǯmõõžž oouʹdeei kääzzkõʹsse.
Puärrsi puåtti uuʹccee takaituärjjõõzz, jõs jälstak sijvuiʹm. Vuäǯǯak kuuitâǥ 35 proseeʹnt leʹbe siõmmna pâʹjjel kuälmad vueʹzz takaituärjjõõzzâst. Puärrsi puåtti jie vaaikât, jõs vuässõõđak reâuǥ vuäǯǯmõõžž oouʹdeei kääzzkõʹsse.
Määŋg tuärjjõõzz jie vaaikât takaituärjjõʹsse. Tõk lie ouddmiârkkân
- päärnažlââʹss
- jeäʹltemveäʹǩǩ
- piʹrǧǧeemtuärjjõs
- jälstemtuärjjõs
- lääʹmesvuõtt-tuärjjõs.
Vuäitak ärvvtõõllâd laʹsǩǩeem-mašina veäkka, mõõn jiânnai vuäǯǯak takaituärjjõõzz (lääddas).