Taalkâskoʹrvvõõzz

Koovv, kååʹtt kovvad taalkâskoʹrvveemriâšldõõǥǥ.

Kela vuäitt mäʹhssed koʹrvvõõzz reseʹptt-talkksin, koid dåhttar leʹbe puõccihoiʹddjeei lij mieʹrrääm puõʒlmad håiddma. Koʹrvvõõzz määuʹset tõn mâŋŋa, ko alggjiõččvasttõs lij teâuddjam. Alggjiõččvasttõs lij 50 euʹrred eeʹjjest.

Kela ij määuʹs koʹrvvõõzz pukin talkksin.

Kaaunak neeʹttest teâđ koʹrvvuum talkksin (lääddas).

Apteekkin da Kelast lij ääiʹjtässʼsaž teâtt alggjiõččvasttõõzz meäʹrest, koon leäk mähssam. Ko alggjiõččvasttõs lij teâuddjam, apteekk ǩieʹppad talkkâz hââʹddest Kela mäʹhssem koʹrvvõõzz. Loopp hââʹddest määusak jiõčč.

Koʹrvvõshâʹdd da talkkâz vaajtummuš hääʹlbʼba

Vueʹss talkksin kooll koʹrvvõshâʹddriâšldõʹǩǩe. Täid talkksid lij mieʹrruum koʹrvvõshâʹddjoukk da koʹrvvõshâʹdd. Talkkâz kaaupšemhâʹdd vuäitt leeʹd šoorab ko koʹrvvõshâʹdd. Kela kuuitâǥ mähss koʹrvvõõzz koʹrvvõshââʹdd mieʹldd.

Seämma koʹrvvõshâʹddjooukâst lie talkkâz, koid ââʹnat vaajted kõskkneez.

Vuäitak vaajted reseptta mieʹrǩǩuum talkkâz apteekkast vaʹstteei leâša hääʹlbab talkksa. Apteekk ij vuäǯǯ vaajted talkkâz, jõs talkkâz mieʹrreei ǩeâldd vaajtummuž.

Jõs talkksest ij leäkku koʹrvvõshâʹdd, vuäǯǯak koʹrvvõõzz kaaupšemhââʹdd mieʹldd.

Mäʹhtt koʹrvvõshâʹddriâšldõk toiʹmmai?

Dåhttar mieʹrreem taalkâs mähss 30 euʹrred. Taalkâs kooll koʹrvvõshâʹddjouʹǩǩe, koʹst koʹrvvõshâʹdd lij 10 euʹrred.

Kela mähss koʹrvvõõzz 40 % koʹrvvõshââʹddest leʹbe 10 eeuʹrest. Koʹrvvõs lij nääiʹt 4 eeuʹr. Määusak jiõčč loopp leʹbe 26 euʹrred.

Apteekkast lij kuuitâǥ taʹrjjeed seämmanallšem peʹce hääʹlbab taalkâs. Tõt mähss tåʹlǩ 10 euʹrred. Jõs vaajtak talkksad tõõzz, vuäǯǯak 4 eeuʹr koʹrvvõõzz da määusak jiõčč talkksest tåʹlǩ 6 eeuʹr.

Spesiaalkoʹrvvõs

Måtmin talkksin vuäitak vuäǯǯad spesiaalkoʹrvvõõzz, kååʹtt lij šoorab ko vuâđđkoʹrvvõs. Tõn vuäǯǯ tiõttum vaiʹǧǧes da kuʹǩesäiggsaž puõʒlmi håiddma mieʹrruum talkksin. Vuõiggâdvuõđ spesiaalkoʹrvvõʹsse âlgg ooccâd Kelast. Taarbšak tõn vääras dåhttar ǩeeʹrjtem B-ceâlkalm.

Taalkâskoʹrvvõõzz vuäitt vuäǯǯad še måtmin porrmõšvalmštõõzzin. Koʹrvvõõzz porrmõšvalmštõõzzin vuäǯǯ ouddmiârkkân mieʹlǩǩallergia leʹbe njammjemstamldõõzz puõcci ooumaž. Vuõiggâdvuõđ koʹrvvõʹsse porrmõšvalmštõõzzin ooʒʒât Kelast. Taarbšak tõn vääras dåhttar ǩeeʹrjtem B-ceâlkalm.

Jõnn taalkâskool

Jõs jooudak vuäʹstted jiânnai talkksid, vuäitak vuäǯǯad lââʹsskoʹrvvõõzz taalkâskoolain.
Taalkâskoolai jiõččvasttõs lij nuʹtt 578 euʹrred. Ko koʹrvvuum talkksin mäʹhssmad taalkâskool mâʹnne pâʹjjel tän meäʹr, vuäǯǯak vuõiʹǧǧest apteekkast lââʹsskoʹrvvõõzz talkksinad eeʹjj loopp räjja.

Lââʹsskoʹrvvõs miârkkšââvv tõn, što määusak talkksest tåʹlǩ 2,50 eeuʹr, håʹt tõt leʹčči kaallšab.

Vuäitak ǩiõččâd tuʹnne eeʹjj äiʹǧǧen nårrjam taalkâskoolaid neeʹttest.

Talkkâz vuästtmõš ålggjânnmin

Jõs ääiǥak vuäʹstted talkkâz nuuʹbb EU-jânnmest, Etv-jânnmest leʹbe Sveiʹccjânnmest, vuäitak raukkâd dåhttrest jeäʹrben taalkâsmeärrõõzz, koin vuäitt vuäʹstted talkkâz ålggjânnmin.

Vuäitak ooccâd koʹrvvõõzz ålggjânnmin vuåsttum talkksest mââiǩiõʹtte Kelast. Koʹrvvõõzz vuäǯǯmõõžž õudldõssân lij, što taalkâs lij primmum koʹrvvuum talkksen Lääʹddjânnmest.

Looǥǥ lââʹzz