Talhâssajanmáávsuh

Kela puáhtá mäksiđ sajanmáávsu reeseepttalkkâsijn, maid tuáhtár tâi pyecceitipšoo lii meridâm tuu puácuvuođâ tiipšon. Uážuh sajanmáávsu ton maŋa, ko algâjiešvástádâs lii tievâm. Algâjiešvástádâs lii 50 eurod ivveest.

Kela ij määvsi sajanmáávsu puoh talkkâsijn.

Sajanmäksimnáál talkkâsijn lii tiätu viermist (suomâkielân).

Apteekijn já Kelast lii meid tiätu, mon ennuv tun lah máksám algâjiešvástádâs. Ko algâjiešvástádâs lii olášum, te apteek keeppid talkkâs haddeest Kela mäksim sajanmáávsu njuolgist. Loppâuási haddeest tun máávsáh jieš.

Myenster, mii kovvee talhâssajanmáksuvuáháduv.

Čujoshadde já talkkâs lonottem hälbibân

Uási talkkâsijn lii meridum čujoshadde. Talkkâs vyebdimhadde puáhtá leđe stuárráb ko čujoshadde. Tun uážuh sajanmáávsu kuittâg čujoshade mield.

Apteek puáhtá lonottiđ talkkâs västideijee mutâ häälbib talkkâsân, jis halijdah. Apteek ij uážu lonottiđ talkkâs, jis talkkâs merideijee kiäldá lonottem.

Jis talkkâsist ij lah čujoshadde, te tun finniih sajanmáávsu vyebdimhade mield.

Ovdâmerkkâ čujoshaddeest já talkkâs loonootmist häälbib talkkâsân

Tuáhtár meridem taalhâs máksá 30 eurod. Taalhâs kulá čujoshaddejuávkun, mast čujoshadde lii 10 eurod.

Kela máksá sajanmáávsu 40 % čujoshaddeest ađai 10 eurost. Sajanmáksu lii tienuuvt 4 euro. Tun máávsáh jieš loopâid ađai 26 eurod.

Apteekist lii kuittâg fáállun siämmáálágán mutâ häälbib taalhâs. Tot máksá tuše 10 eurod. Jis tun lonottah tuu talkkâs toos, tun uážuh 4 euro sajanmáávsu já máávsáh jieš talkkâsist tuše 6 euro.

Sierânâssajanmáksu

Motomijn talkkâsijn tun puávtáh uážžuđ sierânâssajanmáávsu, mii lii stuárráb ko vuáđusajanmáksu. Tom uážžu tiätu vaigâdvuođâi já kuhesáigásij puácuvuođâi tiipšon meridum talkkâsijn. Uusâ vuoigâdvuođâ eromâšsajanmááksun Kelast. Tun tarbâšah tađe várás tuáhtár čäällim B-ciälkkámuš.

Talhâssajanmáávsu puáhtá uážžuđ meid motomijn raavvâdvalmâštuvâin. Sajanmáávsu raavvâdvalmâštuvâin uážžu ovdâmerkkân mielkkiallergia tâi njommâsemhemâdâs pyeccee. Uusâ vuoigâdvuođâ raavvâdvalmâštuvâi sajanmäksimân Kelast. Tun tarbâšah tađe várás tuáhtár čäällim B-ciälkkámuš.

Stuorrâ talhâskoloh

Jis tun koolgah uástiđ ennuv talkkâsijd, te tun puávtáh uážžuđ lasesajanmáávsu talhâskoloid. Tun uážuh lasesajanmáávsu, jis máávsáh talkkâsijn ive ääigi paijeel 580 eurod. Loppâive máávsáh jyehi talkkâsist tuše 2,50 euro, veikâ taalhâs ličij tivrâsub.

Tun puávtáh čuávvuđ tunjin ive ääigi šoddâm talhâskoloid viermist.

Talkkâs uástim olgoenâmijn

Jis tun ááiguh uástiđ talkkâs nube EU-enâmist, Eta-riijkâst tâi Sveitsist, te tun puávtáh pivdeđ tuáhtárist sierâ talhâsmiärádâs, moin puáhtá uástiđ talkkâs olgoenâmijn.

Tun puávtáh uuccâđ sajanmáávsu olgoenâmijn ostum talkkâsist maajeeldkietân Kelast. Sajanmáávsu uážžum váátá, ete taalhâs lii tuhhiittum sajanmäksimnáál Suomâst.

Luuvâ lase