Sajanmáávsuh priivaat pyecceetipšoost já pänitipšoost | Anarâškielâ | KelaMoonâ siskáldâsân

Sajanmáávsuh priivaat pyecceetipšoost já pänitipšoost

Sajanmáávsuh priivaat pyecceetipšoost

Kela máksá sajanmáávsu, ko tun iäláh puácuvuođâ tiet priivaat tuáhtár vuástáväldimist. Kela máksá sajanmáávsu meid tutkâmušâin já tipšoin, maid lii meridâm spesiaaltuáhtár, njälmi- já käibikirurgia spesiaaltuáhtár tâi pänituáhtár. Tun finniih sajanmáávsu meid psykolog toohâm tutkâmušâin.

Kela ij määvsi sajanmáávsu, jis tun uusah priivaat tuáhtárist tuáhtárciälkkámuš ovdâmerkkân vyeijimkoortâ, iäláttuv tâi oppâlájádâsân uuccâm várás.

Koijad lase palvâlemnumerist 020 692 204.

Sajanmáávsuh priivaat  pänitipšoost

Kela máksá sajanmáávsu meid njäälmi já paanij tipšoost priivaat pänituáhtárist.

Puávtáh finniđ sajanmáávsu pänituáhtár toohâm njäälmi já paanij tutkâmušâst jyehi nube ivveest. Jis tuu pänituáhtár avžut tärhistem ohtii ivveest, puávtáh finniđ sajanmáávsu ohtii kalenderivveest.

Kela máksá sajanmáávsu meiddei röntgen- já laboratoriotutkâmušâin, maid priivaat pänituáhtár meerrid.

Kela máksá sajanmáávsu njälmihygienist adelem tipšoost, jis tot vuáđuduvá priivaat pänituáhtár miärádâsân.

Kela ij táválávt sajanmäävsi päniproteesáid lahtojeijee koloid.

Luuvâ lase pänitipšo sajanmáávsuin (suomâkielân).

Koijad lase palvâlemnumerist 020 692 204.

Tun puávtáh finniđ sajanmáávsu tállán

Tun finniih sajanmáávsu távjá jo vuástáväldimist, ko čááitáh tuu Kela-koortâ. Tun puávtáh uuccâđ sajanmáávsu Kelast meid maajeeldkietân.

Kela máksá tutkâmušâin já tipšoin sajanmáávsu enâmustáá Kela meridam hade ađai enâmushade mield. Kela ij sajanmäävsi toimâttahkoloid.

Tiipšon olgoenâmijn

Jis tun moonah tiipšon nube EU- teikkâ Eta-enâmân, Sveitsân, Stuorrâ-Britannian teikkâ Tave-Irlandân, tun puávtáh táttuđ tipšo várás Kelast ovdâlove teikkâ moonnâđ tiipšon jieštoimâlávt ovdâlovettáá. Jis tun máávsáh tipšo jieš, tun puávtáh uuccâđ Kelast sajanmáávsu koloin.

Luuvâ lase tiervâsvuotâpalvâlusâi kevttimist olgoenâmijn (suomâkielân).

Maid sajanmäksih tuáhtár kulen elimist?

Kela sajanmáksá priivaat tuáhtár máávsust 30 eurod. Psykiatrâ máávsust Kela sajanmáksá 30–40 eurod.  Summe šadda vuástáväldimääigi kukkoduv mield.

Jis tun iäláh priivaat spesiaaltuáhtár kulen já tot máksá 100 eurod, te Kela sajanmáksá 30 eurod. Tun máávsáh jieš loopâid 70 eurod.

Jis tun iäláh priivaat psykiatrâ kulen, já 20 miinuut vuástáväldim máksá 150 eurod, te Kela sajanmáksá 33 eurod. Tun máávsáh jieš loopâid 117 eurod.

Sijđo lii peividum 8.2.2024

Mon mielâst tun lah sijđoost?