Sajanmáávsuh maađhijn | Anarâškielâ | KelaMoonâ siskáldâsân

Sajanmáávsuh maađhijn

Kela sajanmáksá määđhi koloid almos tâi priivaat tiervâsvuotâhuolâttâsân, jis tun moonah tiipšon puácuvuođâ, äpittesvuođâ tâi šoddâdem keežild. Kela sajanmáksá määđhi priivaat tiervâsvuotâhuolâttâsân, jis tipšoost finnee Kela-sajanmáávsu tâi jis tust lii pyereestvaijeemkuávlu máksučonnâsem tâi palvâlemseeddâl. Määđhih sajanmáksojeh táválávt aldemuu tipšosajan já hälbimus mađhâšemvyevi mield.

Kela sajanmáksá vajoditmân rahtum maađhijd, jis vajodittem vuáđuduvá Kela tâi almos tiervâsvuotâhuolâttâs adelem vajodittemmiärádâsân.

Jis fáárust kalga leđe läiđejeijee tâi perruujeessân, te tun puávtáh uuccâđ sajanmáávsu meid sii mätkikoloin.

Kela ij sajanmäävsi talkkâsij sierâ viežžâmmääđhi apteekân.

Taksimääđhih

Jis tuu tiervâsvuotâtile tâi vááijuvliih jotolâhtileh väätih taaksi kevttim, te tun puávtáh finniđ tast sajanmáávsu. Jis tun kiävtáh taaksi jieijâd tiervâsvuotâtile tiet, tust kalga leđe tipšomlájádâs adelem Tuođâštus taaksi tarbâšlâšvuođâst, Todistus matkakorvausta varten (SV 67).

Jyehi eennâmkoddeest láá 2 tiilámnumereh, moin puáhtá tiilááđ taaksi. Tun puávtáh jieš valjiđ, ete kuábbáá numerist tun tiilááh Kela-taaksi.

Ko tun tiilááh taksi tiilámnumerist, te tun finniih sajanmáávsu tállán taaksist. Jis tun tiilááh taaksi eres saajeest, te Kela ij sajanmäävsi tuu määđhi.

Sämikielâlâš äššigâs puáhtá kuittâg tiiláđ Kela-taaksi njuolgist sämikielâlii vyeijest.

Luuvâ lase sämikielâlij fastâtaksivuoigâdvuođâst.

Tun kaavnah taaksij tiilámnumerijd Kela siijdoin (suomâkielân).

Tun puávtáh čuávvuđ tunjin ive ääigi šoddâm mätkikoloid neetist (suomâkielân).

Maađhij jiešvástádâs

Maađhij jiešvástádâs lii 25 eurod määđhist oovtâ suundán. Jis tuu mätki máksá paijeel 25 eurod, Kela sajanmáksá tunjin sume, mii mana 25 euro paijeel.

Ihejiešvástádâs ađai mätkikáttu lii 300 eurod ivveest. Jis tun lah máksám maađhijn kalenderive ääigi jieš paijeel taam, te Kela sajanmáksá loppâive ääigi mätkikoloid ollásávt.

Jis tun mađhâšah taksijn, te tun jieh taarbâš uuccâđ sajanmáávsu vuálá 25 eurod máksám maađhijn. Kela rekinist taid mieldi ihejiešvástádâsân, jis lah tiilám taaksi tuu eennâmkode tiilámnumerist.

Jis tun mađhâšah eres ko taksijn, uusâ sajanmáávsu kuittâg meid vuálá 25 eurod máksám maađhijn. Talle Kela rekinist taid mield ihejiešvástádâsân.

Sajanmáksu ijâstâlmist

Jis tun koolgah ovdâmerkkân jotolâhohtâvuođâi tiet ijâstâllâđ tipšo- tâi vajoidittemsaajeest, te tun puávtáh finniđ ijâstâllâmruuđâ. Tot lii enâmustáá 20,18 eurod pirrâmpeeivist.

Luuvâ lase

Sijđo lii peividum 8.2.2024

Mon mielâst tun lah sijđoost?