Hoittáá Kela-aašijd oornigân ääigild ovdil juovlâi – paseh vaigutteh torjui mäksimpeivijd
Juovlâi já uđđâive paseh tovâtteh nubástusâid Kela äššigâspalvâlem ávusorroomaigijd sehe hiäđui uuccâm já mäksim äigitavluid. Masa puoh Kela-aašijd puáhtá hoittáđ MuuKelast.
Kela-ášástâllâm kannat hoittáđ puorijn aaigijn ovdil juovlâi, tastko ive jorgáldâh lii Kelast huápulâš äigi já poosijn palvâlemsajeh sehe puhelinpalvâlus láá kiddâ. Uđđâvuođááptu suomâkielâlâš äššigâspalvâlem lii áávus tme 13 räi já áigápuátutorjuu kocceem lii áávus tme 16 räi. Juovlâi tiet pargottesvuotâtorjuu almottâs- já máksupeeivih láá tolebáá. Juovlâmáánu áigápuátutoorjâ kiergân tilin ovdil juovlâi, jis ucâmuš já lahtoseh láá toimâttum majemustáá 10.12.2025.
Pyeremus vyehi hoittáđ Kela-aašijd lii MuuKelast, mast puáhtá uuccâđ torjuid, toimâttiđ lahtosijd já tärhistiđ ucâmušâi tile já máksupeeivijd.
Äššigâspalvâlem lii kiddâ poosijn – uđđâvuođááptu räijejum ávusorroom
Kela puhelinpalvâlus já palvâlemsajeh láá kiddâ juovlâi 24.–26.12., uđđâvuođpeeivi 1.1. sehe luáppijái 6.1.
Uđđâvuođááptu 31.12. suomâkielâlâš puhelinpalvâlus palvâl tme 9–13 já áigápuátutorjuu puhelinkocceem tme 16 räi. Suomâkielâliih palvâlemnumereh kávnojeh čujottâsâst www.kela.fi/soita-kelaan (suomâkielân).
Sämikielâlii äššigâspalvâlusân tun puávtáh kyeđđiđ ohtâvuođâväldimtáttum čujottâsân saame@kela.fi. Lasetiäđuh sämikielâlii palvâlus ávusorroomaaigijn juovlâi já ive jorgálduv ääigi tun kaavnah Kela sämikielâlijn nettisiijđoin.
Uási palvâlemsoojijn palvâleh huápulijn áigápuátutoorjâtiilijn tme 16 räi. Mudoi palvâlemsajeh maneh kiddâ majemustáá tme 13. Puoh palvâlemsoojij ávusorroomaaigijd já čujottâsâid puáhtá tärhistiđ čujottâsâst www.kela.fi/palvelupisteet (suomâkielân).
Palvâlemsajeh láá áávus 31.12. tme 16 räi čuávuváin päikkikuudijn: Helsig (Kamppi), Joensuu, Jyväskylä, Kajaani, Kuopio, Lahti, Lappeenranta, Oulu, Tampere, Turku já Vaasa.
Vádulij tulkkumpalvâlus juovlâi já ive jorgálduv ávusorroomääigih kávnojeh čujottâsâst www.kela.fi/vammaisten-tulkkauspalvelu-yhteystiedot (suomâkielân).
Pargottesvuotâpeeivij almottem já máksupeeivih nubásmeh
Juovlah toledeh pargottesvuotâääigi almottempeeivijd já pargottesvuotâtorjuu máksupeeivijd. Tun uáináh MuuKelast teikâ tuu finnim almottâsluámáttuvâst peeivi, kuás tun puávtáh kyeđđiđ jieijâd almottâs.
Jis pargottesvuotâääigi almottâs paje nohá 19.–23.12.2025
- almottâs puáhtá macâttiđ 19.12.2025
- ruuđah láá tilist tolemužžân 23.12.2025.
Jis pargottesvuotâääigi almottâs paje nohá 24.12.2025
- almottâs puáhtá macâttiđ 22.12.2025
- ruuđah láá tilist tolemužžân 29.12.2025.
Jis pargottesvuotâääigi almottâs paje nohá 25.12.2025
- almottâs puáhtá macâttiđ 23.12.2025
- ruuđah láá tilist tolemužžân 30.12.2025.
Almottâs kannat toohâđ MuuKelast jo macâttempeeivi iđedist, vâi kiergânep kieđâvuššâđ tom nuuvt jotelávt ko máhđulâš.
Uusâ áigápuátutorjuu ääigild
Áigápuátutorjuu majemuš máksupeivi ovdil juovlâi lii 23.12.2025. Toorjâ kiergân tilin ovdil juovlâi, jis ucâmuš já tárbuliih lahtoseh láá toimâttum Kelan majemustáá 10.12.2025.
Huápulijn tiilijn, tego kivkked šoddâm tárbu finniđ máksučonnâsem talkkâsáid tâi purrâmušân, puáhtá väldiđ ohtâvuođâ Kela palvâlemnumerân 020 692 207 (suomâkielân) tâi ášástâllâđ palvâlemsaajeest.
Huápulijn tiilijn Kela ávusorroomaaigij ulguubeln puáhtá leđe ohtâvuođâst pyereestvaijeemkuávlu sosiaalpalvâlusân, mii puáhtá kuorâttâllâm mield mieđettiđ estâdeijee áigápuátutorjuu. Aakuut kriisâtiileest juovlâpoosij ääigi tun puávtáh leđe ohtâvuođâst pyereestvaijeemkuávlu sosiaalkocemân. Ohtâvuotâtiäđuid puáhtá tärhistiđ Suomi.fi-palvelusâst ucâmáin sosiaali- ja kriisipäivystys (sosiaal- já kriisâkocceem) čujottâsâst www.suomi.fi/kartta (suomâkielân).
Nubástusah torjuid ive 2026
Maŋgáid Kela mäksim torjuid láá puátimin nubástusah ive 2026 aalgâst. Uási nubástusâin láá jo tuhhiittum ovdâskoddeest, uási láá vala kieđâvušmist. Ääigi tääsist orroo tiäđuh meerijn já iävtuin kávnojeh čujottâsâst www.kela.fi/muutokset (suomâkielân). Mij nuurrâp nubástusâid meid sämikielâlii tiäđáttâsân, mon mij almostittem ive jorgálduvâst.
Viärukoortâ ij taarbâš toimâttiđ Kelan
Kela finnee ive 2026 muneviärutiäđuid njuolgist Viäruhaldâttuvâst, te viärukoortâ ij taarbâš vuolgâttiđ Kelan. Jis haalijd nubásmittiđ viäruprooseent, uđđâ viärukoortâ puáhtá tiiláđ OmaVerost.
Mij tuáivuttep äššigâsâidân puorijd juovlâid já luholii uđđâ ive 2026!
Luuvâ lase