Puárásijiäláttâh

Puárásijiäláttâh puáhtá leđe pargoiäláttâh, aalmugiäláttâh teikâ kuohtuuh.

Jis tuu puárásijiäláttâh máksoo aalmugiäláttâhhân, te tot álgá 65-ihásâžžân.

Jis tun lah aassâm tâi porgâm olgoenâmijn, te puárásijiäláttuv meeri puáhtá pääcciđ uccen. Tun puávtáh kuittâg finniđ iäláttuv olgoenâmijn.

Luuvâ lase pargoiäláttuv ucâmist (suomâkielân).

Iäláttâhân ovdláhháá

Jis tust lii vuoigâdvuotâ aalmugiäláttâhân, te tun puávtáh meridiđ, ete vááldáh-uv tom muuneeld ovdilgo tun tiävdáh 65 ihheed. Taat kočoduvvoo toledum puárásijiäláttâhhân.

Jis tun lah šoddâm ovdil ive 1962, te tun puávtáh väldiđ toledum puárásijiäláttuv tolemustáá 64-ihásâžžân.

Toledum iäláttâh lii pisovávt ucceeb ko aalmugiäláttâh, mii álgá 65-ihásâžžân. Iäláttâh kiäppán 0,4 prooseent jyehi mánuppaajeest, moin tun toledah tom. Kannat čielgâdiđ muuneeld, ete mon stuárusâš toledum puárásijiäláttâh ličij.

Iäláttâhân maŋeláá

Tun jieh taarbâš uuccâđ iäláttuv vala 65-ihásâžžân. Talle tun puávtáh majediđ adai sirdeđ iäláttuv älgim majeláhháá. Tot aaleed iäláttuv. Iäláttâh stuáru 0,6 prooseent jyehi mánuppaajeest, moin tun majedah tom.

Pargottesvuotâ já iäláttâh

Jis tun lah kuhháá pargottem já alda iäláttâhave, tun puávtáh motomijn tiilijn peessâđ iäláttâhân jo 64-ihásâžžân.  Taat kuáská tunjin, jis tun lah šoddâm ovdil ive 1962.

Tun puávtáh finniđ taam iäláttuv

• jis tun lah finnim vuáđupeiviruuđâ lasepeeivijn já finniih tääl almostorjuu
• jis tun finniih ánsupeiviruuđâ lasepeeivijn.

Taat ij lah siämmáš äšši ko toledum puárásijiäláttâh. Tondiet tuu iäláttâh ij uco, veikâ tot álgá ovdil 65 ive ave.

Jis tun jieh uusâ iäláttuv, tun puávtáh finniđ pargottesvuotâtorjuu tassaaš, ko tiävdáh 65 ihheed.