Divššo Kela-áššiid áiggil ovdal juovllaid – basit váikkuhit máksinbeivviide
Juovllaid ja jahkemolsuma basit rievdadit Kela áššehasbálvalusa rabasáiggiid ja ovdduid ohcama ja maid máksima áigeplánaid. Measta buot Kela-áššiid sáhttá dikšut MuKelas.
Kela-áššiid gánneha dikšut doarvái áiggil ovdal juovllaid, daningo jahkemolsun lea Kelas hohpolaš áigi ja basiid áigge bálvalanbáikkit ja telefonbálvalus leat gitta. Ođđajageruohttan suomagielat áššehasbálvalus lea rabas dii. 13 rádjai ja áigáiboahtindoarjaga gohcin dii. 16 rádjai. Juovllaid dihte bargguhisvuođadoarjaga almmuhan- ja máksinbeaivvit áraduvvojit. Juovlamánu áigáiboahtindoarjja geargá kontui ovdal juovllaid, jos ohcamuš ja čuvvosat lea doaimmahuvvon maŋimustá 10.12.2025.
Njuovžilamos vuohki lea dikšut Kela-áššiid MuKelas, gos sáhttá ohcat doarjagiid, doaimmahit čuvvosiid ja dárkkistit ohcamušaid dili ja máksinbeivviid.
Áššehasbálvalus lea gitta basiid áigge – Ođđajageruohttan rabasáigi lea ráddjejuvvon
Kela telefonbálvalus ja bálvalanbáikkit leat gitta juovllaid 24.–26.12., ođđajagebeaivve 1.1. ja loahppážiid 6.1.
Ođđajageruohttan 31.12. suomagielat telefonbálvalus bálvala dii. 9–13 ja áigáiboahtindoarjaga telefongohcin dii. 16 rádjai. Suomagielat bálvalannummirat gávdnojit čujuhusas www.kela.fi/soita-kelaan (suomagillii).
Sámegielat áššehasbálvalussii sáhtát guođđit oktavuođaváldinbivdaga čujuhussii saame@kela.fi. Lassedieđuid sámegielat bálvalusa rabasáiggiin juovllaid ja jahkemolsuma áigge gávnnat Kela sámegielat neahttasiidduin.
Oassi bálvalanbáikkiin bálvala hohpolaš áigáiboahtindoarjjadiliin dii. 16 rádjai. Muđui bálvalanbáikkit giddanit maŋimustá dii. 13. Buot bálvalanbáikkiid rabasáiggiid ja uksačujuhusaid sáhttá dárkkistit čujuhusas www.kela.fi/palvelupisteet (suomagillii).
Bálvalanbáikkit leat rabas 31.12. dii. 16 rádjai čuovvovaš báikegottiin. Helsset (Kamppi), Joensuu, Jyväskylä, Kajaani, Kuopio, Lahti, Lappeenranta, Oulu, Tampere, Turku ja Vaasa.
Doaibmaváttogiid dulkonbálvalusa juovllaid áiggi ja jahkemolsuma rabasáiggit gávdnojit čujuhusas www.kela.fi/vammaisten-tulkkauspalvelu-yhteystiedot (suomagillii).
Bargguhisvuođabeivviid almmuheapmi ja máksinbeaivvit rivdet
Juovllat áradit bargguhisvuođaáiggi almmuhanbeivviid ja bargguhisvuođadoarjaga máksinbeivviid. Oainnát MuKelas dahje almmuhanskovis, man leat ožžon, beaivvi, goas sáhtát guođđit iežat almmuhusa.
Jos bargguhisvuođaáigodaga almmuhusa áigodat nohká 19.–23.12.2025
- almmuhusa sáhttá máhcahit 19.12.2025
- ruđat leat konttus áramustá 23.12.2025.
Jos bargguhisvuođaáiggi almmuhusa áigodat nohká 24.12.2025
- almmuhusa sáhttá máhcahit 22.12.2025
- ruđat leat konttus áramustá 29.12.2025.
Jos bargguhisvuođaáiggi almmuhusa áigodat nohká 25.12.2025
- almmuhusa sáhttá máhcahit 23.12.2025
- ruđat leat konttus áramustá 30.12.2025.
Almmuhusa gánneha dahkat MuKelas jo máhcahanbeaivvi iđida, vai dan geargat gieđahallat nu johtilit go vejolaš.
Oza áigáiboahtindoarjaga áiggil
Áigáiboahtindoarjaga maŋimuš máksinbeaivi ovdal juovllaid lea 23.12.2025. Doarjja geargá kontui ovdal juovllaid, jos ohcamuš ja dárbbašlaš čuvvosat leat doaimmahuvvon maŋimustá 10.12.2025.
Hohpolaš diliin, dego dallego lea hohpolaš dárbu oažžut máksočatnašumi dálkasiidda dahje borramuššii, sáhttá váldit oktavuođa Kela bálvalannummirii 020 692 207 (suomagillii) dahje dikšut áššiid bálvalanbáikkis.
Kela rabasáiggiid olggobealde hohpolaš diliin sáhttá váldit oktavuođa buresveadjinguovllu sosiálabálvalussii, mii sáhttá guorahallama mielde mieđihit eastadeaddji áigáiboahtindoarjaga. Fáhkkatlaš kriisadilis juovlabasiid áigge sáhttá váldit oktavuođa buresveadjinguovllu sosiálagohcimii. Oktavuođadieđuid sáhttá dárkkistit Suomi.fi-bálvalusas go ohcá sosiála- ja kriisagohcin čujuhusas www.suomi.fi/kartta (suomagillii).
Rievdadusat doarjagiidda jagis 2026
Máŋggaide Kela doarjagiidda leat boahtimin rievdadusat jagi 2026 álggus. Oassi rievdadusain lea juo dohkkehuvvon riikkabeivviin, oassi lea vel gieđahallamis. Áigeguovdilis dieđut meriin ja eavttuin gávdnojit čujuhusas www.kela.fi/muutokset (suomagillii). Mii čohkket rievdadusaid maiddái sámegielat dieđáhussii, man mii almmustahttit jahkemolsuma áigge.
Vearrokoartta ii dárbbaš doaimmahit Kelai
Kela oažžu jagi 2026 ovdavearrogeassindieđuid njuolga Vearrohálddahusas, de vearrokoartta ii dárbbaš sáddet Kelai. Jos háliidat rievdadit vearroproseantta, sáhttá ođđa vearrokoartta diŋgot MuVearus.
Sávvat min áššehasaide buriid juovllaid ja lihkolaš ođđa jagi 2026!
Loga lasi