Olugo sáhtát oažžut almmolaš ássandoarjaga? | Davvisámegiella | KelaMana sisdollui

Olugo sáhtát oažžut almmolaš ássandoarjaga?

Ássandoarjja sáhttá leat eanemustá 80 proseantta dahjege njeallje viđátoassi ássangoluin. Nuba mávssátge ieš ássangoluin álot unnimustá 20 proseantta dahjege ovtta viđátoasi.

1.4.2024 rájes ássandoarjja sáhttá leat eanemustá 70 proseantta ássangoluin. Dan maŋŋá mávssat ieš álo unnimustá 30 proseantta iežat ássangoluin.

Ássandoarjja ii goittotge máksojuvvo buot ássangoluin, baicce lágas meroštallojuvvon dohkkehuvvon ássangoluin.

Lágas meroštallojuvvojit maiddái ássangoluid eanemusmearit dahjege stuorimus euromearit, maid vuođul sáhttá oažžut ássandoarjaga.

Jos ássangolut mannet badjel eanemusássangoluid, sáhtát oažžut doarjaga eanemustá eanemusássangoluid vuođul.

Eanemusássangoluide váikkuhit sihke visttis ássi ollesolbmuid ja mánáid mearri ja vistti sajádatgielda.

Vistti sajádat

Gielddat leat juhkkojuvvon njeallje sierra jovkui ássama hatti vuođul.

Vuosttas jovkui gullá dušše Helsset.

Nuppi jovkui gullet

  • Espoo
  • Kauniainen
  • Vantaa.

Goalmmát jovkui gullet

  • Hyvinkää
  • Hämeenlinna
  • Joensuu
  • Jyväskylä
  • Järvenpää
  • Kajaani
  • Kerava
  • Kirkkonummi
  • Kouvola
  • Kuopio
  • Lahti
  • Lappeenranta
  • Lohja
  • Mikkeli
  • Nokia
  • Nurmijärvi
  • Oulu
  • Pori
  • Porvoo
  • Raisio
  • Riihimäki
  • Roavenjárga
  • Seinäjoki
  • Sipoo
  • Siuntio
  • Tampere
  • Turku
  • Tuusula
  • Vaasa
  • Vihti.

Njealját jovkui gullet buot eará gielddat, muhto ii Ålánd.

Iežas joavkun leat Ålándda gielddat.

Helsset gullá 1.4.2024 rájes seamma jovkui go Espoo, Kauniainen ja Vantaa. Dan maŋŋá joavkkut leat dušše golbma.

Sáhtát ieš árvvoštallat rehkenastiin, man olu oaččut ássandoarjaga (suomagillii).

Ovdamearkkat

Máijjá ássá okto láigovisttis Helssegis. Son máksá láiggu 800 euro mánotbajis. Okto ássi eanemusássangollun sáhttá Helssegis dohkkehit 563 euro mánotbajis. Máijá ássandoarjja rehkenasto dalle 563 euro vuođul iige su máksán 800 euro láiggu vuođul.

Duommá ássá okto vuolleláigolažžan Giemas. Son máksá láiggu 291 euro mánotbajis. Okto ássi ássangollun Giemas sáhttá dohkkehit eanemustá 394 euro mánotbajis. Duommá ássandoarjaga meari sáhttá nappo rehkenastit Duommá máksán láiggu dahjege 291 euro vuođul, danin go láiggu mearri ii mana badjel eanemusássangoluid.

Siidu beaiváduvvon 15.2.2024

Maid jurddašat siiddu birra?