Sáhtátgo oažžut Kela doarjagiid, go fárret Supmii?
Doarjagiid eavttut leat iešguđetláganat dan mielde, fárretgo Supmii
- bargin
- fitnodatdatdoallin
- sáddejuvvon bargin
- bearašlahttun
- stuđeantan dahje dutkin
- ealáhatoažžun.
Jos dus lea Suomas ruoktogielda, oaččut divššu almmolaš dearvvasvuođafuolahusas. Du dikšot dábálaččat iežat guovllu dearvvasvuođaguovddážis. Jos dus ii leat ruoktogielda, bivdde Kela čielggadit, leago dus vuoigatvuohta almmolaš dearvvasvuođafuolahussii.
Bargi ja fitnodatdoalli doarjagat
Sáhtát oažžut muhtin Kela doarjagiid, jos barggat Suomas. Dát doarjagat leat ovdamearkan buohcanbeaiveruhta ja mánáidruhta.
Jos don barggat Suomas uhcimustá 6 mánotbaji, dus sáhttá leat vuoigatvuohta Kela muhtin doarjagiidda vel bargama nohkama maŋŋá.
Jos leat bargi, dus lea vuoigatvuohta maiddái bargodearvvašvuođafuolahussii. Oaččot lassedieđuid iežat bargoaddis.
Sáddejuvvon bargit
Sáddejuvvon bargit leat olbmot, geaid olgoriikka bargoaddi lea sádden bargui Supmii.
Jos boađát sáddejuvvon bargin EU-riikkas, Eta-riikkas, Sveiccas dahje Stuorra-Británnias, don gulat vuolginriikka sosiáladorvui. Dalle dus ii leat vuoigatvuohta Kela doarjagiidda. Don dárbbašat A1-duođaštusa vuolginriikkastat.
Jos don boađát sáddejuvvon bargin riikkas, mainna Suomas lea sosiáladorvosoahpamuš, dárkkis Kelas, sáhtátgo oažžut doarjagiid. Soahpamušat leat iešguđetláganat sierra riikkaiguin.
Bearašlahtut
Jos fárret Supmii bargi dahje stuđeantta bearašlahttun, fertet dábálaččat ássat Suomas bissovaččat, vai sáhtát oažžut Kela doarjagiid.
Stuđeanttat
Jos fárret Supmii earágo EU-riikkas, Eta-riikkas, Sveiccas dahje Stuorra-Británnias dušše stuđerema geažil, sáhtát oažžut muhtin Kela doarjagiid, dego buohcanbeaiveruđa dahje vánhemiidbeaiveruđa. Du oahput galget bistit uhcimustá 2 jagi.
EU-riikkain boahtán stuđeanttat eai dábálaččat oaččo Kela doarjagiid. Dus sáhttá goittotge leat vuoigatvuohta Kela doarjagiidda, jos stuđerema lassin barggat Suomas. It goittotge dábálaččat sáhte oažžut oahppodoarjaga Suomas.
Jos čađahat allaskuvladutkosa, oaččut dearvvasvuođadikšuma Studeanttaid dearvvasvuođadikšunvuođđudusas (YTHS).
Ealáhatolbmot
Jos leat ealáhatoažžu go fárret Supmii, don fertet ássat Suomas fásta, vai sáhtát oažžut Kela doarjagiid.
Man rájes sáhtát oažžut Kela doarjagiid?
Don sáhtát oažžut Kela doarjagiid dábálaččat dan beaivve rájes, go fárret Supmii dahje álggahat bargama Suomas.
Muhtun doarjagat máksojuvvojit goittotge dušše daidda, geat leat ássan Suomas dihto áiggi ovdal doarjaga mieđiheami.
Dát doarjagat leat ovdamearkka dihte
- Kela ealáhagat
- badjel 16-jahkásačča doaibmaváttolašvuođadoarjja.
Muhtun doarjagiid mieđiheamis Kela vuhtiiváldá áiggiid, goas leat ássan dahje bargan nuppi EU-riikkas, Eta-riikkas, Sveiccas dahje Stuorra-Británnias.
Dárkkis Kelas, goas sáhtát oažžut Kela doarjaga. Jeara lasi bálvalannummiris 020 634 0200.