Suomas olgoriikkaide
Jos oaččut man nu Kela doarjaga ja fárret olgoriikkaide, almmut fárremis Kelai.
Almmut Kelai maiddái, jos du eallindilli nuppástuvvá dan bottas go leat olgoriikkain. Nuppástus sáhttá leat ovdamearkan
- oahpuid álggaheapmi dahje heaittiheapmi
- barggu álggaheapmi dahje heaittiheapmi
- nuppástus bearašgaskavuođain, dego earráneapmi dahje oktiifárren beallelaččain.
Gaskaboddasaš dahje fásta fárren?
Vuoigatvuođat Kela doarjagiidda čovdojuvvo dábálaččat dan vuođul, man guhká don áiggot leat olgoriikkain. Maiddái dat váikkuha, manin fárret ja man riikii fárret.
Jos fárret olgoriikii bissovaččat, it dábálaččat sáhte šat oažžut Kela doarjagiid. Fárren gehččojuvvo bissovažžan, jos du ulbmilin lea ássat olgoriikkain badjel 6 mánotbaji. Dalle vuoigatvuohta Kela doarjagiidda nohká dábálaččat dalán, go fárret eret Suomas. 6 mánotbaji áigerájis sáhttá ložžet, jos fárret gaskaboddasaččat Suomas EU-riikii, Edg-riikii, Sveicii dahje Stuorra-Británniai.
Maiddái ovdamearkan stuđeanttain ja sáddejuvvon bargiin sáhttá leat vuoigatvuohta Kela doarjagiidda, vaikke sii orošedje olgoriikkain badjel 6 mánotbaji.
Go fárret nuppi riikii, váldde čielgasa, sáhtátgo oažžut doarjagiid ođđa ássanriikkas.
Oassi jagis olgoriikkain
Jos lávet orrut olgoriikkain badjel jahkebeali jahkásaččat, dus ii dábálaččat leat vuoigatvuohta Kela doarjagiidda. Áigerájis sáhttá ložžet, jos ásat oassi jagis muhtun EU-riikkas, Edg-riikkas, Sveiccas dahje Stuorra-Británnias.
Guđe riikii fárret?
Doarjagiid oažžumii váikkuha dat, guđe riikii fárret Suomas.
Kela doarjagiidda váikkuha dat, leago riika Eurohpá uniovnna (EU) dahje Eurohpá dállodoalloguovllu (Edg) riika, Sveica, Stuorra-Británnia dahje dakkár riika, mainna Suomas lea sosiáladorvvu guoskevaš soahpamuš.
EU-riikkat leat
- Suopma
- Belgia
- Bulgaria
- Dánmárku
- Duiska
- Espánnja
- Estteeana
- Frankriika
- Greika
- Hollánda
- Irlánda
- Itália
- Kroatia
- Kypros
- Latvia
- Lietuva
- Luxemburga
- Malta
- Nuortariika
- Portugala
- Polska
- Romania
- Ruoŧŧa
- Slovakia
- Slovenia
- Čekkia
- Ungar.
Edg-riikkat leat
- Eurohpá uniovnna riikkat
- Islánda
- Liechtenstein
- Norga.
Suomas lea sosiáladorvosoahpamuš čuovvovaš riikkaiguin:
- Austrália
- Chile
- Davviriikkat
- India
- Israel
- Jáhpan
- Kanáda (ja Quebec)
- Kiinná
- Mátta-Korea
- Ovttastuvvan Stáhtat.
Eurohpálaš buohccedikšunkoarta
Sáhtát diŋgot Kelas eurohpálaš buohccedikšunkoartta. Koarta lea nuvttá. Go dus lea koarta, oaččut buohccádettiin divššu EU-riikkas, Edg-riikkas, Sveiccas ja Stuorra-Británnias seamma hattiin go báikkálaš ássit.
Sáhtát diŋgot koartta neahtas. Neahtas sáhtát diŋgot koartta maiddái iežat mánnái. Sáhtát diŋgot koartta maiddái bálvalannummiris 020 692 204.
Jos dus ii leat šat vuoigatvuohta Kela doarjagiidda, it sáhte geavahit eurohpálaš buohccedikšunkoartta.