Tuʹmmstõõǥǥ da ǩeeʹrj kuâsttje ååʹn še sääʹmǩiõllsaž äʹššeemkääzzkõõzzâst
Kela tuʹmmstõõǥǥ da ǩeeʹrj liâ tän räjja kuâsttjam äʹššniiʹǩǩid tåʹlǩ lääʹddǩiõllsaž OmaKelast da ruõccǩiõllsaž MittFPA:st. Ååʹn tõk kuâsttje še MuKela- da MuuKela- äʹššeemkääzzkõõzzin.
Kela tuʹmmstõõǥǥid da jeeʹres äʹššǩiiʹrjid leät tän räjja vuõittum lookkâd tåʹlǩ lääʹddǩiõllsaž OmaKelast da ruõccǩiõllsaž MittFPA:st. Ååʹn äʹššǩeeʹrj kuâsttje še tâʹvvsääʹmǩiõllsaž MuKelast da aanar- da nuõrttsääʹmǩiõllsaž MuuKelast.
Tuʹmmstõõǥǥi da jeeʹres äʹššǩiiʹrji ǩiõʹlle oođõõzzin jiâ leäkku vaaiktõõzz, de tõk kuâsttje še ooudâs tõin ǩiõlin, koin tõk liâ aalǥâst juʹn tuejjuum.
Nääiʹt vuõltteep tuʹmmstõõǥǥid da ǩiiʹrjid
Vuäǯǯak Kela tuʹmmstõõǥǥid da jeeʹres äʹššǩiiʹrjid pâi vuõššân lääʹddǩiõʹlle leʹbe ruõccǩiõʹlle tõn mieʹldd, kuäbbaž tuʹnne lij miõrkkum meerteâttriâžldõʹǩǩe äʹššeemǩiõllân. Vuõltteep tuʹmmstõõǥǥid da ǩiiʹrjid liâđǥlânji MuuKelaaʹje, jõs âânak MuuKela da leäk iʹlmmtam miʹjjid neʹttpååʹštaddrõõzzad leʹbe teʹlfon-nââmrad. Vuäǯǯak iʹlmmtõõzz, ǥu MuuKelast lij ođđ pååʹšt. Jõs jiõk ââʹn OmaKela, vuäǯǯak tuʹmmstõõǥǥid da ǩiiʹrjid põʹmmaipååʹšten domoi.
Jõs âânak MuuKela leša haaʹlääk tuʹmmstõõǥǥid da ǩiiʹrjid ooudâs še põʹmmaipååʹšten, vuäitak muʹtted tååimtemnääʹl lääʹddǩiõllsaž OmaKelast pääiʹǩest Päivitä omia tietojasi (Peiʹvved jiijjad teâđääd). Vuäitak še såittad Kela äʹššneǩ-kääzzkõʹsse da raukkâd, što vuäǯǯak tuʹmmstõõǥǥid da ǩiiʹrjid põʹmmaipååʹšten domoi. Tiõttum vuõʹjjin vuäǯǯak äʹššǩiiʹrjid põʹmmaipååʹšten domoi huõlǩani tõʹst, âânak-a MuuKela avi jiõk.
Nääiʹt vuõltteep sääʹmǩiõllsaž jåårǥlõõzzid äʹššǩiiʹrjin
Jõs leäk ooccâm ouddõõzz sääʹmǩiõllsaž ooccâmlomaakkin, äʹššääm Kelast sääʹmǩiõʹlle leʹbe raukkâm Kelast sääʹmǩiõllsaž jåårǥlõõzz, vuäǯǯak tuʹmmstõõǥǥin da jeeʹres äʹššǩiiʹrjin sääʹmǩiõllsaž jåårǥlõõzzid. Jåårǥlõõzz tuejjeet tõn mâŋŋa, ǥu leäk vuõššân vuäǯǯam äʹššǩeeʹrj lääʹddǩiõʹlle leʹbe ruõccǩiõʹlle.
Vuõltteep sääʹmǩiõllsaž äʹššǩeʹrjj-jåårǥlõõzzid pâi põʹmmaipååʹšten. Jåårǥlõõzz jiâ veâl ååʹn kuõsttu MuuKelast leʹbe tõn jeeʹresǩiõllsaž versioin.
Jõs jiõk leäkku vuäǯǯam tuʹmmstõõǥǥâst leʹbe äʹššǩeeʹrjest sääʹmǩiõllsaž jåårǥlõõzz leša haaʹlääk vuäǯǯad nåkam, vuõlttâd miʹjjid saaǥǥ MuuKelast leʹbe vääʹld õhttvuõđ Kela äʹššneǩ-kääzzkõʹsse.
Nääiʹt iʹlmmtep ođđ tuʹmmstõõǥǥâst
Vuäǯǯak iʹlmmtõõzz MuuKelaaʹje puättam tuʹmmstõõǥǥâst leʹbe ǩeeʹrjest Suomi.fi-saakkân: neʹttpååʹšta puätt iʹlmmtõs, ǥu MuuKelast lij ođđ tuʹmmstõk leʹbe ǩeʹrjj lookkâmnalla. Jõs leäk laaddâm teʹlfooʹne Suomi.fi-suåvldõõzz, iʹlmmtõs puätt še tõõzz. Jõs jiõk leäkku välddam Suomi.fi-saaǥǥid âânnmõʹšše, vuäǯǯak Kelast iʹlmmtõõzz teʹksttsaaǥǥin leʹbe neʹttpååʹštin.
Väʹlddveärlaž tuʹmmstõõǥǥääd da jeeʹres äʹššǩiiʹrjid vuäitak lookkâd MuuKelast pääiʹǩest Tuʹmmstõõǥǥ da jeeʹres äʹššǩeeʹrj.
Suomi.fi-saaǥǥ lij Digi- da meerteâttkonttâr kääzzkõs. Kääzzkõõzzâst vuäitak lookkâd saaǥǥid, koid veʹrǧǧneeʹǩǩ liâ vuõlttääm tuʹnne. Saaǥǥid vuäitt lookkâd juʹna Suomi.fi-mobiilisuåvldõõzzâst leʹbe addrõõzzâst www suomi.fi/viestit.
Looǥǥ lââʹzz
Vuäitak ååʹn vuõltteed Kelaaʹje še sääʹmǩiõllsa saaǥǥ (kela.fi)