Vuäitak ååʹn vuõltteed Kelaaʹje še sääʹmǩiõllsa saaǥǥ
Kela lij välddam ââʹnnma saakk-kääzzkõõzz še sääʹmǩiõllsaž äʹššeemkääzzkõõzzâst. Taarbšak sääʹmǩiõllsa saaǥǥ vuõlttummša sääʹmǩiõllsa puällpååʹrd.
Persoonlaž Kela-aaʹššid ij vueiʹt håiddad neʹttpååʹšt mieʹldd tõn diõtt, što tõt ij leäkku teâttstaanlaž nääʹll. Tõn sâjja saaǥǥi vuõlttummuš da vuâsttavälddmõš MuuKelast lij teâttstaanlaž. Kela lij ååʹn välddam ââʹnnma saakk-kääzzkõõzz še sääʹmǩiõllsain OmaKela versioin.
Saaǥǥin vuäitak kõõččâd jiijjad tuärjjõsaaʹššid, vuäǯǯad vuäʹpstummuž ǩirrsateʹmes aaʹššid da vuõltteed lââʹssteâđaid. Vuäitak še vuõltteed saaǥǥ, ǥu äʹššääk nuuʹbb oummu peäʹlest.
Jiijjad saakk ohjjââvv Kela sääʹmǩiõllsa kääzzkõʹsse. Hoʹhsse, što saaǥǥid vaʹsttummuš vuäitt jaukkâd.
Jõs tuu ääʹššest lij ǩiirâs, vääʹld õhttvuõđ Kela teʹlfonkääzzkõʹsse leʹbe täätt, što Kelast soiʹttjet väʹst tuʹnne. Vuäitak nuʹt haaʹleen kueʹđđed õhttvuõttväʹlddemraukkmõõžž neʹttpååʹšt mieʹldd addrõʹsse saame@kela.fi. Ǩeeʹrjet neʹttpååšta jiijjad nõõm da teʹlfoon-nââmar, što Kelast vueiʹtet väʹldded tuu tuʹnne õhttvuõđ. Jeäʹl vuõlttâd neʹttpååʹšt mieʹldd ni mâiʹd jeeʹres persoonteâđaid leʹbe äʹššummša kuulli teâđaid.
Kela taarbaš lååʹv saaǥǥi vuõlttummša
Kela ij vueiʹt vuõltteed tuʹnne jiiʹjjes alttõõzzâst saaǥǥ MuuKelast tuu lååʹvtaa. Lååʹv saaǥǥi vuõlttummša vuäitak uʹvdded OmaKelast.
Lååʹv vuäitt veâl uʹvdded tåʹlǩ lääʹdd- leʹbe ruõccǩiõllsaž OmaKelast. Ǩeeʹrjtõõđ OmaKela sizz da sirddu Päivitä omia tietojasi. Mõõn päikka Omat tiedot da vaʹlljed Viestit OmaKelaan. Vaʹstted ”kyllä” kõõččmõʹšše ”Saako Kela lähettää sinulle viestejä OmaKelaan?” Vaʹlljed looppâst, haaʹlääk-a iʹlmmtõõzzid ođđ saaǥǥin neʹttpååʹšt mieʹldd avi teʹksttsaaǥǥin.
Vaajtõsmäinnan lij uʹvdded lååʹv saaǥǥi vuõlttummša sååiteeʹl teʹlfonkääzzkõʹsse.
Nääiʹt vuõlttääk saaǥǥ MuuKelast
Ǩeeʹrjtõõđ MuuKela sizz juõʹǩǩ vuâra staanlânji addrõõzzâst kela.fi. Sääʹmǩiõllsaž äʹššeemkääzzkõʹsse lij vuõigg liŋkk sääʹmǩiõllsai kela.fi-seeidai vuäʹljspeäʹlnn pâʹjjruõbdâst.
Kaaunak saaǥǥid MuuKela vaʹljstõõǥǥ pääiʹǩest Vuõlttâd da looǥǥ saaǥǥid leʹbe ouddseeid pääiʹǩest Vuõiggpälggaz. Vuäitak ǩeeʹrjted ođđ saaǥǥ pääiʹǩest Vuõlttâd ođđ saaǥǥ. Vaʹlljed ouddõõzz, koozz tuʹst saakk kooll, da mâŋŋa tõʹst veâl täʹrǩǩõõǥǥ.
Vuäinak Kelast vuäǯǯmad saaǥǥid seämma seeidast, pääiʹǩest Vuõlttuum da puättam saaǥǥ.
Taarbšak sääʹmǩiõl puällpååʹrd
Ǥu haaʹlääk vuõltteed Kelaaʹje sääʹmǩiõllsa saaǥǥ, taarbšak tõn ǩeeʹrjtummša sääʹmǩiõllsa puällpååʹrd ohjjeei prograamm. Jõs tuʹst ij veâl leäkku nåkam, vuäitak šiõtteed tõn jiõčč saakkneävvsad.
Kaaunak vuäppõõzzid da veäʹǩǩneävvaid sääʹmǩiõllsai puällpååʹrd ohjjeei prograammi da vuõigglookkâmprograammi šiõttummša addrõõzzin divvun.no da borealium.org.