Mii lea áigáiboahtindoarjja?

Sáhtát ohcat áigáiboahtindoarjaga, juos du ruđat eai reahkká vealtameahttun goluide. Vealtameahttun golut leat ovdamearkka dihte láigu, borramuš, dearvvasvuođadikšun ja biktasat.

Áigáiboahtindoarjagis leat 3 oasi:
  • vuođđoáigáiboahtindoarjja
  • dievasmahtti áigáiboahtindoarjja
  • eastádeaddji áigáiboahtindoarjja.

Vuođđoáigáiboahtindoarjja ohccojuvvo Kelas.

Dus sáhttet leat maiddái dakkár golut, maidda it sáhte oažžut vuođđoáigáiboahtindoarjaga. Dalle gieldda sosiálabálvalus sáhttá árvvoštallama mielde mieđihit dutnje dievasmahtti dahje eastadeaddji áigáiboahtindoarjaga.

Oza álo vuos Kelas vuođđoáigáiboahtindoarjaga. Sáhtát čállit ohcamuša Lassidieđut-čuoggái daid goluid, maidda dárbbašat dievasmahtti dahje eastadeaddji áigáiboahtindoarjaga. Sáhtát seammás bivdit, ahte Kela sirdá du ohcamuša gieldda gieđahallamii.

Loga lasi das, mo sáhtát oažžut vuođđoáigáiboahtindoarjaga.

Loga lasi vuođđoáigáiboahtindoarjaga ohcamis (suomagillii).

Maidda goluide sáhttá oažžut doarjaga?

Vuođđoáigáiboahtindoarjaga ii sáhte oažžut buotlágan goluide. Dat lea oaivvilduvvon vealtameahttun goluide, dego ássamii ja borramuššii.

Vuođđoáigáiboahtindoarjagis dohkkehuvvon golut juhkkojuvvojit vuođđooassái ja eará vuođđogoluide.

Vuođđooassi

Vuođđooassái leat rehkenastojuvvon dábálaš árgga golut, dego borramuš ja biktasat. Go ozat doarjaga, don it dárbbaš čájehit kuittiid dahje rehkegiid dáin goluin.

Guđege bearašlahttui váldojuvvo vuhtii iežas vuođđooassi.

Vuođđooassi sisttisdoallá

  • borramušgoluid
  • bivttasgoluid
  • unnit dearvvasvuođafuolahusgoluid (ovdamearkka dihte iešdikšundálkasat, maidda ii dárbbaš reseaptta)
  • persovnnalaš ja ruovttu buhtisvuođas šaddan goluid
  • báikkálašjohtalusa geavaheami
  • áviissa diŋgoma
  • telefovnna ja diehtojohtolaga geavaheami ja neahttaoktavuođaid
  • astoáiggi doaimmaid
  • eará sullasaš beaivválaš eallimii gullevaš goluid.

Eará vuođđogolut

Du dili mielde doarjja sáhttá mieđihuvvot maiddái eará vuođđogoluide.

Juos ozat doarjaga dáidda goluide, galggat doaimmahit dáidda goluide laktáseaddji kuittiid ja rehkegiid Kelai oktan ohcamušain.

Kela váldá vuhtii dáid goluid ollisvuođas, juos dat leat govttolaččat.

Eará vuođđogolut leat

  • ássangolut (ovdamearkka dihte láigu, vástta, šleađga, ruovttudáhkádus ja bearašviesu dikšungolut)
  • vealtameahttun fárrengolut
  • almmolaš dearvvasvuođafuolahusa golut, mat eai gula vuođđooassái (ovdamearkka dihte dearvvasvuođaguovddáža áššehasmávssut, reseaptadálkasat ja čalbmelásat)
  • mánáid gieldda beaivedivššu golut
  • skuvlalaččaid iđit- ja veaigedoaimma golut
  • dihto golut, mat bohtet gáiddusvánhemii máná deaivamis
  • vealtameahttun identitehtaduođaštusa, orrunáššegirjji dahje mátkkoštanáššegirjji skáhppongolut.

Loga lasi