Maidda goluide sáhttá oažžut doarjaga? | Davvisámegiella | KelaMana sisdollui

Maidda goluide sáhttá oažžut doarjaga?

Vuođđoáigáiboahtindoarjaga ii sáhte oažžut buotlágan goluide. Dat lea oaivvilduvvon vealtameahttun goluide, dego ássamii ja borramuššii.

Vuođđoáigáiboahtindoarjagis dohkkehuvvon golut juhkkojuvvojit vuođđooassái ja eará vuođđogoluide.

Vuođđooassi

Vuođđooassái leat juo rehkenastojuvvon dábálaš árgga golut, dego borramuš ja biktasat. Go ozat doarjaga, it dárbbaš čájehit kuittiid dahje rehkegiid dáin goluin.

Guđege bearašlahttui váldojuvvo vuhtii su iežas vuođđooassi.

Vuođđooassi sisttisdoallá

  • borramušgoluid
  • bivttasgoluid
  • unnit dearvvasvuođafuolahusgoluid (ovdamearkka dihte iešdikšundálkasat, maidda ii dárbbaš reseaptta)
  • persovnnalaš ja ruovttu buhtisvuođas šaddan goluid
  • báikkálašjohtalusa geavaheami
  • áviissa diŋgoma
  • telefovnna ja diehtojohtolaga geavaheami ja neahttaoktavuođaid
  • astoáiggi doaimmaid
  • eará sullasaš beaivválaš eallimii gullevaš goluid.

Eará vuođđogolut

Sáhtát ohcat doarjaga maiddái eará vuođđogoluide.

Jos ozat doarjaga dáidda goluide, galggat doaimmahit dáidda goluide gullevaš kuittiid ja rehkegiid Kelai oktan ohcamušain.

Eará vuođđogolut leat

  • govttolaš ássangolut (ovdamearkka dihte láigu, vástta, šleađga, ruovttudáhkádus ja bearašviesu dikšungolut)
  • vealtameahttun fárrengolut
  • almmolaš dearvvasvuođafuolahusa golut, mat eai gula vuođđooassái (ovdamearkka dihte dearvvasvuođaguovddáža áššehasmávssut, reseaptadálkasat ja čalbmelásat)
  • mánáid gieldda árrabajásgeassima golut
  • skuvlalaččaid iđit- ja veaigedoaimma golut
  • dihto golut, mat bohtet gáiddusvánhemii máná deaivamis
  • dárbbašlaš persovdnaduođaštusa, orrunáššegirjji dahje mátkkoštanáššegirjji háhkangolut.
Siidu beaiváduvvon 15.2.2024

Maid jurddašat siiddu birra?