Dálkkasbuhtadusat

Minsttar, mii govvida dálkkasbuhtadanortnega.

Kela sáhttá máksit buhtadusa reseaptadálkasiin, maid doavttir dahje buohccedivššár lea mearridan buohcuvuođat dikšui. Buhtadus máksojuvvo dan maŋŋá, go álgoiežasvástu lea dievvan. Álgoiežasvástu lea 50 euro jagis.

Kela ii mávsse buhtadusa buot dálkasiin.

Geahča Kela siidduin, main dálkasiin sáhtát oažžut buhtadusa (suomagillii).

Apoteahkain ja Kelas lea áigedási diehtu álgoiežasvástu mearis. Go álgoiežasvástu lea dievvan, apoteahka geahpeda dálkasa hattis Kela máksán buhtadusa ja mávssát ieš loahppaoasi hattis.

Čujuhanhaddi ja dálkasa molsun hálbbibui

Oassi dálkasiin gullet čujuhanhaddevuogádahkii. Dáidda dálkasiidda lea meroštallon čujuhanhaddejoavku ja čujuhanhaddi. Dálkasa vuovdinhaddi sáhttá leat stuorát go čujuhanhaddi. Kela goittotge máksá buhtadusa čujuhanhatti vuođul.

Seamma čujuhanhaddijoavkkus leat dálkasat, maid sáhttá molsut gaskaneaset.

Sáhtát molsut reseapttas mearriduvvon dálkasa apoteahkas sullasaš muhto hálbbit dálkasii. Apoteahka ii oaččo molsut dálkasa, juos dálkasa mearrideaddji gieldá dálkasa molsuma.

Juos dálkasis ii leat čujuhanhaddi, de oaččut buhtadusa vuovdinhatti vuođul.

Ovdamearka čujuhanhattis ja dálkasa molsumis hálbbibui

Doaktára mearridan dálkkas máksá 30 euro. Dálkkas gullá čujuhanhaddejovkui, mas čujuhanhaddi lea 10 euro.

Kela máksá buhtadusa 40 % čujuhanhattis nappo 10 euros, buhtadus lea 4 euro. Mávssat ieš loahppaoasi dahjege 26 euro.

Apoteahkas gávdno goittotge seammalágán muhto hálbbit dálkkas. Dat máksá dušše 10 euro. Juos molssut dálkasat sullasaš hálbbit dálkasii, oaččut 4 euro buhtadusa ja mávssat ieš dálkasis dušše 6 euro.

Sierrabuhtadus

Muhtun dálkasiin sáhtát oažžut sierrabuhtadusa, mii lea stuorát go vuođđobuhtadus. Dan oažžu dihto váigadis ja guhkesáigásaš buohcuvuođaid dikšui mearriduvvon dálkasiin.
Vuoigatvuohta sierrabuhtadussii ohccojuvvo Kelas. Dárbbašat dan várás doaktára čállán B-cealkámuša.

Dálkkasbuhtadusa sáhttá oažžut maiddái muhtun biebmobuktagiin. Buhtadusa biebmobuktagiin oažžu ovdamearkan olmmoš, geas lea mielkeallergiija dahje njammadanhehttehus. Vuoigatvuohta biebmobuktagiid buhtadussii ohccojuvvo Kelas. Dárbbašat dasa doaktára čállán B-cealkámuša.

Stuorra dálkkasgolut

Juos gárttat oastit olu dálkasiid, sáhtát oažžut lassebuhtadusa dálkkasgoluin. Dálkkasgoluid jahkeiežasvástu lea sulaid 578 euro. Go buhttejuvvon dálkasiin máksojuvvon dálkkasgolut mannet dan supmi badjel, de oaččut apoteahkas lassebuhtadusa dálkasiin gitta jagi lohppii.

Lassebuhtadus oaivvilda dan, ahte mávssat ieš dálkasis dušše 2,50 euro, vaikke dat livččii divrasut.

Sáhtát čuovvut dutnje jagi áigge čohkkon buhtadusaid áššiiddikšunbálvalusas.

Oza dálkkasbuhtadusa skoviin Suomas šaddan dálkkasgolut SV 178sme (pdf), juos it leat ožžon Kela buhtadusa apoteahkas.

Dálkasa oastin olgoriikkain

Juos áiggot oastit dálkasa nuppi EU-riikkas, Edg-riikkas dahje Šveiccas, sáhtát bivdit doaktáris sierra dálkkasmearrádusa, mainna sáhtát oastit dálkasa olgoriikkain.

Sáhtát ohcat buhtadusa olgoriikkain ostojuvvon dálkasa hattis maŋálgihtii Kelas. Eaktun lea, ahte dálkkas lea dohkkehuvvon buhttejuvvon dálkkasin Suomas.

Loga lasi