Buohcuvuođabeaiveruhta | Davvisámegiella | KelaMana sisdollui

Buohcuvuođabeaiveruhta

Kela máksá buohcuvuođa áiggis buohcuvuođabeaiveruđa. Sáhtát oažžut buohcuvuođabeaiveruđa, jos leat 16–67-jahkásaš itge buohcuvuođa dihtii nákce bargui.

Buohcuvuođabeaiveruhta máksojuvvo dábálaččat dan maŋŋá, go leat leamašan buohccin 10 beaivvi. Jos leat fitnodatdoalli, sáhtát oažžut buohcuvuođabeaiveruđa juo árabut.

Maiddái studeanta, gii oažžu oahpporuđa, dahje bargguheapme sáhttá oažžut buohcuvuođabeaiveruđa.

Jos oaččut buohcuvuođafriija áigge bálkká, Kela máksá buhtadusa du bargoaddái.

Oza buohcuvuođabeaiveruđa 2 mánu siste das, go bargonávccahisvuohta álgá.

Man olu oaččut buohcuvuođabeaiveruđa?

Buohcuvuođabeaiveruđa mearri rehkenastojuvvo jahkeboađuid vuođul. Jahkeboađuin oaivvildit boađuid 12 mánotbaji áigodagas. Jos doavttir gávnnaha du bargonávccaheapmen ovdamearkan miessemánu 2024 rájes, Kela rehkenastá buohcuvuođabeaiveruđa meari daid boađuid vuođul, maid leat ožžon 1.4.2023–31.3.2024.

Beaiveruhta lea álo unnit go jahkeboađut.

Sáhtát ieš árvvoštallat rehkenastiin, man olu oaččut buohcuvuođabeaiveruđa (suomagillii).

Sáhtát maiddái jearrat lasi bálvalannummiris 020 692 204.

Man guhká buohcuvuođabeaiveruhta máksojuvvo?

Buohcuvuođabeaiveruhta máksojuvvo eanemustá sulaid jagi áigge. Kela čielggada buohcuvuođabeaiveruđabaji áigge, livččiigo veajuiduhttimis ávki buohcuvuođat dikšumis.

Jos don leat bargi, Kela bivdá du sáddet bargodearvvasvuođadoaktára cealkámuša du bargonávccain ja vejolašvuođain joatkit dálá barggus. Kela dárbbaša cealkámuša maŋimustá dalle, go leat ožžon buohcuvuođabeaiveruđa 90 árgabeaivve.

Bargodearvvasvuođadikšun sáhttá čielggadit du dili maiddái maŋŋeleappos. Doaimmat Kelai maiddái dasa gullevaš cealkámušaid.

Lassebeaivviid buohcuvuođabeaiveruhtii

Muhtin dáhpáhusain Kela sáhttá mieđihit buohcuvuođabeaiveruhtabadjái lassebeivviid.

Dábálaččat buohcuvuođabeaiveruđa sáhttá oažžut eanemustá sulaid ovtta jagi. Jos máhcat dan maŋŋá bargui, muhto de geavvá nie, ahte buohcuvuohta ainge hehtte bargama, Kela sáhttá máksit buohcuvuođabeaiveruđa 50 beaivvi lasi.

Lassebeivviid eaktun lea goittotge dat, ahte leat leamaš barggus ovttatmano 30 beaivvi nappo sulaid mánotbaji dan maŋŋá, go buohcuvuođabeaiveruđa eanemusáigi lea nohkan.

Jos bargonávccahisvuohta joatkašuvvá itge sáhte máhccat bargui, Kela dahje bargoealáhatlágádusa áššedovdit dutket, sáhtátgo báhcit bargonávccahisvuođaealáhahkii.

Loga lasi

Siidu beaiváduvvon 15.2.2024

Maid jurddašat siiddu birra?