Koʹrvvõõzz privatt puõccihååidast da pääʹnnhååidast
Kela mähss koʹrvvõõzz, ko jeälak puõʒʒâlm diõtt privatt dåhttrest. Kela mähss koʹrvvõõzz še privatt dåhttar mieʹrreem tuʹtǩǩummšin da hååidain. Näkam lie ouddmiârkkân fysioterapia da laboratoriotuʹtǩǩummuž.
Kela ij määuʹs koʹrvvõõzz, jõs ooʒʒak privatt dåhttrest dåhttartuõđštõõzz ouddmiârkkân vuejjamkoort, jeältõõǥǥ leʹbe mättstroiʹttla põrggâm vääras.
Kõõjj lââʹzz kääzzkâʹsttemnââmrest 020 692 204.
Kela raʹvvai dåhttarpaaʹlǩid, tuʹtǩǩummšid da hååidaid koʹrvvõõzzid leʹbe taksaid. Vuäǯǯak Kela koʹrvvõõzz jäänmõsân taksa mieʹldd, håʹt määusčiǩ dåhttrest jeällmõõžžâst jäänab.
Vuäitak täʹrǩsted taksaid neeʹttest (lääddas).
Kela ij koʹrvved koontârkoolaid.
Vuäǯǯak koʹrvvõõzz täujja juʹn vuâsttaväʹlddmest, ko čuäʹjtak Kela-koortad. Vuäitak ooccâd koʹrvvõõzz Kelast še mââiǩiõʹtte.
Jõs mõõnak hoiddu nuuʹbb EU-jânnmest, Etv-jânnmest leʹbe Sveiʹccjânnmest, vuäǯǯak hååidast seämma koʹrvvõõzz, koon vuäǯǯčiǩ Lääʹddjânnmest.
Lââʹssteâtt tiõrvâsvuõttkääzzkõõzzi ââʹnnem pirr ålggjânnmin (lääddas).
Koʹrvvõõzz privatt pääʹnnhååidast
Kela mähss koʹrvvõõzz še njääʹlm da paaʹni hååidast privatt pääʹnndåhttrest. Vuäitak vuäǯǯad koʹrvvõõzz privatt pääʹnndåhttar tuejjeem njääʹlm da paaʹni tuʹtǩǩummšest juõʹǩǩ nuuʹbb kaʹlndareeʹjj. Jõs tuu pääʹnndåhttar siâzztââll täʹrǩstummuž õʹhttešt eeʹjjest, vuäitak vuäǯǯad koʹrvvõõzz õʹhttešt kaʹlndareeʹjjest.
Kela mähss koʹrvvõõzz še rõntgen- da laboratoriotuʹtǩǩummšin, koid privatt pääʹnndåhttar mieʹrrad.
Kela mähss koʹrvvõõzz njäʹlmmhygieniist uʹvddem hååidast, jõs tõt vuâđđââvv privatt pääʹnndåhttar meärrõʹsse.
Kela ij takainalla koʹrvved pääʹnnproteeʹsid õhttneei koolaid.