Mánná šaddamin

Juos dudnuide lea šaddamin njuoratmánná, váldde vuos oktavuođa rávvehahkii. Go áhpehisvuohta lea ovdánan, sáhtát ohcat Kela doarjagiid, dego etniiddoarjaga. Kelas oažžu maiddái mánáidruđa, Kela-koarta ja iešguđetlágan doarjagiid máná dikšumii.

Etniidrávvehat bálvala áhpehemiid ja mánnábearrašiid

Juos leat áhpeheapmen, váldde oktavuođa iežat ruoktogieldda etniidrávvehahkii. Etniidrávvehaga bálvalusat leat nuvttá. Rávvehagas bearaš oažžu ráđiid áhpehisvuođaáiggi ja riegádahttima várás. Lassin rávvehagas čuvvot eatni ja máná dearvvašvuođadili.

Eadni galgá fitnat rávvehagas dárkkástusas áhpehisvuođa álggus, maŋimustá 18. áhpehisvuođavahkus. Dárkkástusas oaččut áhpehisvuođaduođaštusa. Dárbbašat duođaštusa, go ozat Kelas doarjaga.

Etniiddoarjja lea etniidpáhkka dahje ruhtasubmi

Sáhtát ohcat etniiddoarjaga, go áhpehisvuohta lea bistán 5 mánotbaji. Sáhtát válljet etniidpáhka dahje 170 euro. Etniidpáhkas leat dikšundárbašat ja biktasat njuoratmánnái.

Oza etniiddoarjaga maŋimustá 2 mánotbaji ovdal rehkenastojuvvon áiggi.

Etniidpáhka vuosttasgirji

Sámegielat vuosttasgirjjiid sáhttá diŋgot Kelas ja dat sáddejuvvojit áššehassii sierra. Sámegielat vuosttasgirjjiid sáhttá diŋgot jagi 2022 álggu rájes. Diŋgoma sáhttá bargat Kela sámegielat telefon- dahje gáiddusbálvalussii dahje sáddemiin šleađgapoastta čujuhussii saame@kela.fi.

Jagiin 2020 ja 2021 etniidpáhka ožžon vánhemat sáhttet diŋgot sámegielat vuosttasgirjji earret láhkai maiddái máhccevaččat. 

Luđe dás etniidpáhka vuosttasgirjjiid sámegillii:

Mánáidruhta

Kela máksá juohke mánás mánáidruđa. Mánáidruhta máksojuvvo dábálaččat eadnái, áhččái dahje eará fuolaheaddjái. Máksin joatkašuvvá gitta dan mánotbaji lohppii, go mánná deavdá 17 jagi.

Mánáidruhta máksojuvvo mánáid meari mielde:

  • ovtta mánás sulaid 95 euro mánotbajis
  • guovtte mánás sulaid 200 euro mánotbajis
  • golmma mánás sulaid 334 euro mánotbajis
  • njealje mánás sulaid 497 euro mánotbajis
  • viđa mánás sulaid 679 euro mánotbajis.

Oktofuolaheaddji oažžu bajádusa, mii lea sulaid 63 euro mánotbajis máná guovdu. Mánáidruđas ii mana vearru.

Muitte ohcat mánáidruđa. Sáhtát oažžut mánáidruđa juo ovdal go mánná lea riegádan dahje máná riegádeami maŋŋá.

Kela-koarta

Go mánná riegáda Suomas, diehtu máná riegádeamis manná buohcceviesus álbmotregisttarii ja doppe Kelai. Mánná oažžu identitehtadovddaldaga.

Go mánná lea ožžon nama, Kela sádde ruoktot Kela-koartta dahje buohcooadjokoartta.

Oza 2 mánotbaji ovdal

Oza etniiddoarjaga maŋimustá 2 mánotbaji ovdal rehkenastojuvvon áiggi. Oza etniidruđa maŋimustá 2 mánotbaji ovdal rehkenastojuvvon áiggi. Dárkkis bargoaddis ovdal ohcama, oaččutgo etniidluomu áigge bálkká. Muitte almmuhit bargoaddái etniidluomus 2 mánotbaji ovdal go luopmu álgá.

Sierraetniidruhta

Juos gárttat barggustat suonjardeami, kemikálaid dahje njoammudávdda vuložin, sáhtát báhcit eret barggus dalánaga, go leat áhpeheapmin. Dákkár dilis oaččut sierraetniidruđa.

Loga lasi sierraetniidruđa ohcamis Kela siidduin (suomagillii).

Loga lasi